“?Wanem nao mi talem long olgeta we oli no memba we oli stap askem se from wanem sam memba blong Jos oli no stap laef folem ol standet blong yumi?”

Bae i gud tumas sapos evri memba blong Jos i laef fulwan folem gospel. Bae oli gat moa blesing long laef blong olgeta, be tu, bae oli stap olsem ol moa gud eksampol long olgeta we oli stap raon long olgeta. Be yumi man we i stap long wol ia, mo yumi foldaon long sam samting. Stamba risen se sam oli laef folem gospel moa fulwan bitim sam narafala, hemi we from we wanwan long yumi i no stap long semfala ples long fasin blong jenisim laef blong yumi, mo long paoa blong testemoni blong yumi. Wanwan long yumi i gat ol defren tes, mo ol defren tul blong wok wetem, mo ol defren pipol blong helpem yumi.

Olgeta we oli no memba, ating bae oli no andastanem ol toktok olsem “jenisim laef” mo “testemoni,” be bae oli andastanem se wanwan man mo woman i save jusum olsem wanem blong laef. Yu save eksplenem se Papa long Heven i minim blong hem i olsem. Hem i givim long yumi, fridom blong joes blong mekem se yumi save gro long saed blong spirit taem yumi jusum raet. Be Papa long Heven i save tu se evriwan—be Jisas Kraes nomo—bae i mekem ol mistek, mekem se Hem i givim wan Sevya long yumi. From Atonmen, yumi save sakem sin, yumi save kasem fogivnes, yumi save lanem samting aot long mistek blong yumi, mo yumi save muv fored long laef.

Yu save eksplenem tu se yumi no stap jajem olgeta we oli no stap folem ol standet blong Jos. Be, yumi traem blong helpem olgeta, andastanem olgeta, mo stap wet longtaem wetem olgeta. Nomata we yumi no stap akseptem sin, yumi no stap panisim man we i mekem sin (luk long Jon 8:11). Fasin blong sakem sin i posibol i stap, long yumi evriwan.

Luklukgud long Ol Skripja

Ansa long kwestin, yumi save faenem insaed long ol skripja. Taem ol pipol oli no obei ol komanmen, yumi mas traem blong no stap jajem olgeta (luk long Matiu 7:1). Rom 3:23 i talem: “Olgeta evriwan oli mekem nogud finis, mo oli stap afsaed olgeta long ol gudgudfala fasin blong God.” Be, hem i tru se ol memba blong Jos oli mas traem blong stap obei.

Madison M., 13 yia, Teksas, YSA

Tij abaot Atonmen

Taem ol pipol oli talem ol samting olsem, mi no traem blong faenem rong long memba we i no stap folem ol rul, be mi yusum olsem wan janis blong tij abaot Atonmen. Mi talem long olgeta se, from se yumi ol Momon, i no minim se yumi stret evriwan, mo yumi gat Atonmen mekem se yumi save sakem ol sin blong yumi mo stretem ol mistek ia. Hemia, oltaem, i openem doa long plante moa kwestin.

Jeid H., 16 yia, Oregon, YSA

Jos I Tijim Yumi blong Mekem Gud

Semmak olsem eni narawan, ol memba blong Jos oli gotru long ol jalenj mo ol temtesen. Yumi evriwan i gat ol samting we yumi no strong long hem, be, hemia i no minim se Jos ia i no tru. Hemia i Jos blong Jisas Kraes, we i stap helpem ol pipol blong save tru gospel mo blong kasem fasin blong sevem man. Man we i folem fasin blong wol nao i man we i no stap obei long ol komanmen (luk long Mosaea 3:19), mo hemia i no rong blong Jos. Jos i tijim yumi blong mekem ol gud wok. Be yumi evriwan i save mekem joes.

Lavinia S. 19 yia, Bulakan, Filipin

Ol Standet Oli Stap blong Mekem Yumi Hapi

Kwestin ia, mi save gud long hem, from se mi save sam man o woman we oli bin mekem ol joes we i bin tekem olgeta longwe long gospel. Lod i givim yumi ol komanmen blong yumi stap hapi, mo blong mekem i hapen fasin we man i nomo save ded mo i kasem laef we i no save finis (luk long Moses 1:39). Lod i wantem yumi blong gobak long Hem; be, Hem i wantem yumi blong mekem ol joes blong yumiwan. From hemia nao sam man o woman oli no laef folem ol standet blong yumi. Ol standet oli helpem mi, miwan, from se mi save se Papa long Heven i bin givim olgeta komanmen ia long mi blong mi save gobak mo stap wetem Hem mo stap hapi. Oli pruf ia blong lav we Hem i gat long mi.

Morgan D. 18 yia, Langedok-Rusiyon, Franis

Stap Wan Eksampol

Jos i impoten tumas blong helpem yumi blong mekem ol komanmen blong Papa blong yumi long Heven oli hapen, mo blong laef wetem Hem bakegen. I no from se wan i blong Jos, nao i minim se hem i stap oltaem olsem wan gudfala man o woman. Lukluk long wol blong yumi tedei; i fulap long nogud fasin, mo rabis sin nomata we wol ia i fulap wetem ol pipol we oli bin disaed blong folem Jisas Kraes long laef bifo laef long wol ia. Mi ting se samting we i moa gud blong mekem, i blong stap olsem wan eksampol long ol fren blong yumi.

Kaden S., 15 yia, Yuta, YSA

Prea from Olgeta mo Visitim Olgeta

Ol memba we oli no laef folem ol standet blong yumi, ating oli no gat wan testemoni we i lukluk nomo long Jisas Kraes. Yumi mas prea from olgeta, se bae oli lukaotem blong Spirit i lidim olgeta, mo blong oli save kasem wan testemoni blong olgetawan. Yumi mas visitim ol pipol ia mo helpem olgeta blong kam long Kraes.

Andrea K, 13 yia, Lima, Peru

Laef Folem Ol Standet blong Yumi

Semmak olsem eni oganaesesen o relijin, i gat sam pipol we oli putum moa tingting, o oli no putum ful tingting. Yumi mas laef folem ol standet blong yumi nomo long bes wei we yumi save mekem, mo hop mo prea se ol narawan bae oli mekem tu.

Maren S.; 16 yia, Arisona, YSA