?From Wanem mo Wanem Nao Mi NIDIM blong Konfesem long Bisop blong Mi?
Blong stap helpem yu blong sakem sin, hem i wan spesel pat blong koling blong wan bisop. Tingting blong yu bae i talemaot long yu wetaem nao yu nid blong toktok long hem.
Ating yu save askem yuwan from wanem nao oli stap tijim yu blong stap konfes long bisop o branj presiden blong yu taem yu mekem ol bigfala sin. Yu save talem long yuwan: “?Be fasin blong sakem sin i wan samting blong miwan, i bitwin mi mo Lod? Sapos mi stop blong mekem rong fasin blong mi, mo mi bin konfes i go long God, ?from wanem mi nidim blong toktok wetem bisop blong mi?”
Pikja foto i kam long Kristina Smit
?From Wanem Bisop be I No Wan Narafala Man?
Plante yut oli filim gud moa blong konfesem ol sin blong olgeta long papa mo mama blong olgeta, o long yut lida blong olgeta. Nomata papa mo mama blong yu, o lida i save givhan mo givim kaonsel, Lod i bin talemaot se bisop nao i jaj blong evri man long Isrel (luk long D&C 107:72, 74). Hem nao i gat responsabiliti blong talemaot se ol memba blong wod blong hem oli klin inaf o no. Tru long odinesen mo stret fasin blong laef, bisop i gat raet ia, tru long revelesen we i kam tru long Tabu Spirit, long saed blong ol memba blong wod blong hem, mo hemia i tekem yu tu.
Bisop i save helpem yu blong gotru long rod blong fasin blong sakem sin long sam wei we papa mo mama blong yu, o ol nara lida oli no save mekem. Sapos sin i series tumas, bae hem i save talemaot wanem samting bae yu nomo mekem insaed long Jos. Eksampol, olsem pat blong rod blong yu blong sakem sin, bae hem i save askem yu blong no tekem sakramen, o no yusum prishud blong yu blong sam taem. Bae hem i wok wetem yu mo talemaot wetaem nao yu klin inaf bakegen blong statem ol tabu aktiviti ia bakegen.
Bisop bae i toktok wetem yu long wanem blong mekem blong mekem paoa blong yu blong stanap agensem temtesen i kam strong moa. Bae hem i save leftemap tingting blong yu blong stadi long wan topik blong doktrin, olsem fasin blong sakem sin, mo afta, serem wetem hem wanem nao yu bin lanem. Hem i save askem yu blong luk hem evri wik blong yu ripotem olsem wanem yu stap wokhad blong yu kamaot long ol situesen blong temtesen.
?Wanem Taem Nao bae Mi Mas Toktok long Hem?
Ating bae yu tingting: “Evri samting ia i saon gud long sora, be ?olsem wanem nao bae mi save save sapos wanem mi mekem i series inaf blong mi nid blong toktok long bisop?” Sotfala ansa: “Tingting blong yu bae i talemaot long yu.” Taem yu filim tingting blong yu i stikim yu, tekem aksen kwiktaem (luk long Alma 34:31–34).
Long saed blong fasin blong sakem sin, King Benjamin i tijim: “Mi no save talem long yufala evri samting we yufala i save mekem sin long hem; from i gat plante defren wei mo plante fasin, hem i plante tumas mekem se mi no save kaontem olgeta” (Mosaea 4:29). Mekem se, i no nid blong givim wan ditel lis blong ol samting we yu mas konfes long bisop, be mi mas serem sam prinsipol we bae i helpem yu blong mekem desisen ia.
?Wanem Nao Mi Nidim blong Konfes?
Mi save se yu bin traem blong stap obei, be ating yu bin mekem sam mistek—sam series mistek. Plante long ol mistek we ol pipol oli stap mekem, oli save stretem nomo tru long prea blong olgetawan, mo tru long fasin blong sakem sin wetem tru hat. Sam mistek, speseli olgeta long saed blong fasin blong seks, i nidim blong yu konfesem olgeta long bisop bifo yu save kasem fogivnes blong Lod.
Taem yu stap tingting long ol mistek we yu bin mekem, ating bae yu filim gilti, yu filim se tingting blong yu i no stap kwaet, yu no hapi, o yu harem nogud evriwan. Sapos yu stap filim eniwan long ol filing ia, ating yu nid blong toktok wetem bisop blong yu long saed blong ol mistek ia.
Yu no traem blong faenem wan eskius, o faenem wan gud risen blong yu save ronwe. Ating yu tingting: “Bae mi sem tumas blong talem long bisop wanem samting we mi bin mekem. Hem i tingting se mi mi wan man o woman we i stret gud. Bae hem i sek sapos mi talem long hem wanem nao mi bin mekem. Bae hem i nomo laekem mi bakegen.”
Mi promesem yu se bae hem i no panisim yu. Olsem wan wokman blong Lod, bae hem i kaen mo i save andastanem yu taem bae hem i lisin long yu. Afta, bae hem i helpem yu tru long rod blong fasin blong sakem sin. Hem i mesenja blong Lod we i gat sore blong helpem yu blong kam klin tru long Atonmen blong Jisas Kraes.
Lod i bin talem se hem we i sakem ol sin blong hem, bae Lod i fogivim hem mo bae i nomo tingbaot ol sin ia bakegen.
Tru long wei ia, bae yumi save sapos wan i sakem ol sin blong hem—bae hem i konfesem olgeta mo i livim olgeta fogud (luk long D&C 58:42–43).
Taem yu konfes mo livim ol sin blong yu fogud, Lod bae i fogivim yu. Bae yu no nid blong ansa long Hem from ol sin ia long taem we i kam we bae oli jajem yu.
?Wanem bae I Hapen Sapos Mi No Konfes?
Samtaem, wan i stop blong mekem rong samting be i neva konfesem, long taem we i nid, long bisop blong hem. Olsem risal, man o woman ia i stap tekem hevi blong sin ia hemwan, be i no letem Sevya i tekemaot hevi sin ia.
Bae mi givim wan eksampol long yu. Wan naet, sam yia i pas, mi bin stap intaviu long ol adalt blong riniu ol tempol rekomen. Wan woman, we i medel yia, i kam from intaviu blong hem. Hem i bin mared long tempol, mo i stap aktiv insaed long Jos long ful laef blong hem.
Mi filim se sol blong hem i no hapi. Taem intaviu i stap gohed, mi kasem wan tingting long saed blong spirit. Mi talem long hem: “Sista, mi gat filing ia se yu bin mekem wan series mistek taem yu bin yangfala, mo yu no bin konfes long wan prishud lida. ?Bae yu glad blong talemaot long mi long saed blong samting ia?
Wantaem nomo, hem i stat blong krae. Hem i talem long mi se i tru, be oltaem, hem i filim se hem i sem blong konfesem sin ia long bisop. Taem hem i konfesem wanem hem i bin mekem, hem i serem inaf ditel long mi blong mi talemaot se hem i klin inaf o no.
Taem hem i bin konfesem sin blong hem long wan prishud lida, hemia i bin makem en blong rod blong hem blong sakem sin, be i no stat blong hem. Hem i bin tekem blong nating nomo hevi blong sin ia mo harem nogud blong hem blong moa long 30 yia.
From se hem i bin finisim las step blong fasin blong sakem sin, filing blong hem blong filim gilti i lus evriwan. Bae mi luk hem wanwan taem afta long naet ia blong intaviu ia. Fes blong hem i saen gud, mo hem i bin hapi.
Mi wantem yu blong save se mi no nid blong tingbaot nem blong hem. Lod i save karemaot ol memori ia long ol bisop. Wanem we mi tingbaot, i we, tru long taem ia blong konfes long prishud lida blong hem, wan woman we i medel yia, i pulum win mo i nomo tekem hevi harem nogud we hem i bin tekem blong plante yia tumas.
Plis no mekem mistek ia. Sapos yu gat ol filing se yu rong long wan samting, be yu no save stret we yu nidim blong konfes long bisop blong yu o no, go luk hem. Letem hem i helpem yu. Yu no tekem janis ia mo tekem wan hevi samting long ful laef blong yu, we bae i livim yu stap filim nogud tumas. Tru long fasin blong konfes long bisop, mo fasin blong yu blong sakem sin, Lod bae i karemaot hevi samting ia long sol blong yu (luk long Aesea 1:18).
?From Wanem Mi Nidim blong Sakem Sin?
Jisas Kraes i bin pem praes blong ol sin blong evri man tru long sakrifaes blong Hem we i pemaot man. Hem i stap invaetem yu blong sakem sin mo stap longwe long fasin blong harem nogud mo stap safa. Hem i talem se yumi mas sakem sin sapos no, bae safaring blong yumi bae i soa tumas—bae i soa hamas, yumi no save, i bigwan olsem wanem, yumi no save, i had olsem wanem blong tekem, yumi no save.
Hem i bin talem se Hem i safa ol samting ia blong evri man blong mekem se oli no save safa sapos oli sakem sin.
Be sapos oli no wantem sakem sin, oli mas safa olsem we Hem tu i bin safa.
From hemia, Hem i givim komanmen long yumi bakegen blong sakem sin, mo blong yumi konfesem sin blong yumi, nogud bae yumi safa long ol panismen ia we Hem i bin tokbaot (luk long D&C 19:15–17, 20).
Mi testifae se tru long safaring blong Hem, Jisas Kraes i bin pem praes finis from ol sin blong yu. Yu save kasem fogivnes sapos yu sakem sin. Yu no traem blong pem praes from ol sin blong yu. I no gat wan safaring we i bigwan inaf blong i pemaot yu; hem i tru nomo long Atonmen we yu kasem fogivnes.
Bae yu yusum fet long Jisas Kraes mo Atonmen blong Hem. Mi testifae long nem blong Jisas Kraes, se tru long fasin blong sakem sin, we i tekem blong konfes long bisop blong yu taem i nid, we bae yu kam klin. Antap long hemia, tru long gladhat blong Sevya—paoa blong Hem we i save sevem man—yu save kam strong moa long paoa blong yu blong stanap agensem temtesen long fiuja. Olsem ia, bae yu gat wan pis long maen blong yu, mo bae yu hapi long laef ia, mo bae yu kasem laef we i no save finis long wol we i stap kam.