Kacivaki ena Koniferedi Raraba na Tubu ni Lewenilotu kei na iWiliwili ni Daukaulotu
Sa yacova na 15 na milioni na iwiliwili ni lewenilotu, a kacivaka o Peresitedi Thomas S. Monson ena imatai ni soqoni ni ika 183 ni Koniferei Raraba Vakayabaki ena 5 ni Okotova, 2013. A kacivaka talega o koya me tekivu mai na gauna sa sudrai sobu kina na yabaki ni veiqaravi vakadaukaulotu ena Okotova ni 2012, sa yaco e dua na tubu vakaiyanaqa ena iwiliwili ni daukaulotu era veiqaravi tu e vuravura raraba—mai na 58,500 ki na 80,333.
“Sa tubu tikoga na Lotu ka veisautaka tiko na nodra bula e oba vakaoba na tamata e vuravura e veiyabaki,” e kaya o Peresitedi Monson. “Sa roboti vuravura tiko yani ena nodra sa vakasaqarai ira tiko era vakasaqara tu na dina o ira na noda mataivalu daukaulotu.”
E vakayaloqaqataki ira na lewenilotu kei na daukaulotu me ra veitauriliga ena kena wasei na kosipeli. “Oqo na gauna me ra duavata kina na lewenilotu kei na daukaulotu, me ra cakacaka vata, me ra vakaitavi ena Nona were ni vaini na Turaga me kau mai na yalo ki Vua,” e kaya o Peresitedi Monson, ni o koya e a sa veiqaravi voli vaka-iApositolo ena 50 na yabaki.
Ena soqoni ena Yakavi ni Vakarauwai, eratou sa mai vagalalataki ena veidokai ka soli vei iratou na itutu vakaemeritesi, e tolu na lewe ni iMatai ni Kuoramu ni Vitusagavulu—o iratou o Elder John B. Dickson, Paul E. Koelliker, kei F. Michael Watson—vakakina o Elder Kent D. Watson ena iKarua ni Kuoramu ni Vitusagavulu sa mai vagalalataki talega ena veidokai. Kena ikuri, eratou sa tokoni me Vitusagavulu ni iWasewase o, Julio A. Angulo, 45, mai Bogotá, Colombia; Peter F. Evans, 54, mai Salt Lake City, Utah, Amerika; kei Gennady N. Podvodov, 47, mai Donetsk, Ukraine. Sa kacivaki talega ni rau sa vagalalataki mai na Vitusagavulu ni iWasewase o César H. Hooker kei Craig T. Wright.
E milioni e vuravura raraba era sarava se vakarorogo ki na koniferedi ena retioyaloyalo, Initaneti, retio, kei na kakaburaki ena setilaiti. Se qai imatai ni gauna, me kaburaki kina ena retioyaloyalo ka vakarautaki ena Initaneti ena kena gauna dina na soqoni ni matabete ena yakavi ni Vakarauwai. E sivia na 100,000 na tamata era tiko rawa ena lima na soqoni ena Vale ni Koniferedi e Salt Lake City, Utah, ena ika 5 kei na 6 ni Okotova. A vakarautaki talega na koniferedi ena veitabana eso ni vakau itukutuku ena 95 na vosa ka kaburaki ki na 197 na matanitu kei na yasana.
A tinia na koniferedi o Peresitedi Monson ena dua na kerekere vei ira na lewe ni Lotu me ra vakalevutaka cake nodra veilomalomani vakataki ira ka “me ra dau kunei tikoga ena cakacaka ni Turaga.”
O Thomas S. Monson ena Valecavu e Lomanibai ni Valetabu ena 1963, ni vakarau me tokoni me Vakaitutu Raraba.
iTaba mai na Valenivolavola ni Peresitedi