Kacivi Mai Vua Meu Vunautaka na Nona Vosa
Kevaka o sa yalomalumalumu, ka talairawarawa, ka vakarorogo ki na domo ni Yalotabu, ko na kunea na marau sa cecere sara ena nomu veiqaravi vaka-daukaulotu.
Ena gauna au a tokoni kina meu lewe ni Vakaitutu Raraba ena Epereli sa oti, au a peresitedi tiko kina ni kaulotu mai Idia. Au a raica dina na ka a tukuna vei au e dua tale na peresitedi vakacegu ni kaulotu: “Era sa veivakurabuitaki dina o ira na daukaulotu ni Lotu oqo.”1
E dua vei ira na daukaulotu cecere oqo ka keirau veiqaravi tiko kina kei Sisita Funk o ya o Elder Pokhrel mai Nepal. Ni se qai oti toka ga e rua na yabaki na nona lewena na Lotu, a kacivi me laki kaulotu ena Tabana ni Kaulotu e India Bangalore, oqo e dua na tabana ni kaulotu vosa Vakavalagi. E dau kaya ni sega soti ni vakavakarau vakavinaka. Sa kilai vakavinaka tu o ya. A se bera mada ni raica e dua na daukaulotu me yacova ni sa yaco o koya me dua na daukaulotu baleta ni a sega ni dua na daukaulotu gone a veiqaravi mai Nepal. E sega soti ni vinaka na nona wili vosa Vakavalagi me kila vakavinaka kina na idusidusi e okati tiko ena nona ivola ni veikacivi. Ni sa tadu yani ki na koronivuli veivakarautaki ni kaulotu, a sega ni kauta yani na tarausese vinaka, se sote vulavula, kei na neketai, a kauta tu ga yani me vaka a kaya, “lima na pea tarausese vavaku, e vica toka na siqeleti, kei na levu na ilumu ni ulu.”2
Ena gauna mada ga sa tu kina vua na isulu rakorako, a kaya o koya ni vaka me sega ni vinaka na bula ena veisiga ena imatai ni vica na macawa. A vakamacalataka na gauna o ya ni nona kaulotu: “A sega walega ni dredre na vosa Vakavalagi, ia a dredre sara mada ga na kaulotu. … Me qai kena ikuri kece, au sa walokai, wawale, ka vakanananu i vale. … E dina ni dredre na veika kece oqo, au sa sasaga ga vakaukauwa. Au malumalumu ka yalolailai. Au qai dau masu ena gauna vakaoqo me vukei au o Tamaqu Vakalomalagi. E sega ni cala, ni gauna yadua au masu kina, au dau vakacegui.”3
E dina ga ni ka vou ka veibolei sara na cakacaka ni kaulotu vei Elder Pokhrel, a veiqaravi yani o koya ena vakabauta kei na yalodina e cecere sara, ka vakasaqara me kila vakavinaka ka muria na veika e vulica tiko mai na ivolanikalou, mai na Vunautaka Noqu Kosipeli, vakakina mai vei ira na nona iliuliu ni kaulotu. A yaco sara o koya me dua na qasenivuli kaukauwa ni kosipeli—ena Vakavalagi—ka yaco me dua na iliuliu vinaka sara. Ni oti na nona kaulotu kei na vica na gauna e Nepal, a lesu ki Idia me laki tomana na nona vuli. Vakatekivu mai na Janueri sa veiqaravi sara ena itutu vaka-peresitedi ni tabana mai New Delhi. Ena vuku ga ni tubu dina a yaco vua ena kaulotu, sa tomana kina me cau ena kena tubu na Lotu e Idia.
E yaco vakacava vua e dua na cauravou se bera vakadua ni raica e dua na daukaulotu ka yaco me dua na daukaulotu na kaukauwa vakayalo vaka o ya? O na ciqoma vakacava na kaukauwa vakayalo mo daukaulotu ka dolavi vei iko na vale, itukutuku, kei na yalodra na tamata ena itikotiko ni kaulotu o na laki veiqaravi kina? E kena ivakarau, na kena isau sa tiko ga ena ivolanikalou kei na nodra vosa na parofita kei na iapositolo bula.
Ena isevu ni gauna e vunautaki kina na kosipeli mai Igiladi ena Julai 1837, a vakaraitaka mai kina na Turaga, “Ko koya dou sa digitaka mai na Le Tinikarua, mo lesia ka tala yani ena yacaqu, ia ena soli vua na kaukauwa me dolava kina na katuba ni noqu matanitu ki na veivanua kece ga dou sa talai koya kina.”4
Na vanua cava ga o sa talai kina, ki na tabana ni kaulotu cava ga o lesi kina, mo kila tiko ni dua na lewe ni Tinikarua a vakatura na lesilesi o ya ka sa kacivi iko na parofita ni Turaga. O sa kacivi “ena parofisai, kei na veitabaki ni liga.”5
Sa lavaka tale tu ga na Turaga eso na ka me baleta na kena yaco na yalayala oqo. A kaya, “Ia [e kena ibalebale ni na yaco na veika a yalataki kevaka] o ira na [vakaibalebaletaki vei ira na daukaulotu era sa talai yani] mera [1] vakamalumalumutaki ira vei au, ka [2] mera muria na noqu ivakaro, kei [3] na veivakauqeti ni noqu Yalo Tabu.”6
Sa matata vinaka tu na yalayala ni Turaga. Ni gadrevi me rawati na kaukauwa vakayalo me tadolavi kina na katuba ni matanitu ni Kalou ena vanua o sa lesi kina, e dodonu mo vakamalumalumutaki iko ka talairawarawa ka rawa mo rogoca ka muria na Yalotabu.
Na tolu na ivakarau oqo e ratou veisemati vakavoleka. Kevaka o sa yalomalumalumu, o na gadreva mo talairawarawa. Kevaka o sa talairawarawa, o na vakila na Yalotabu. Sa rui ka yaga sara na Yalotabu, me vaka a vakavulica o Peresitedi Ezra Taft Benson, “Ni sega na Yalotabu, o na sega sara ni qaqa rawa se vakacava tu na levu ni nomu taledi kei na rawa ka.”7
Niu a se peresitedi ni iteki, au dau vakatarogi ira vakawasoma na daukaulotu era sasaga dredre tiko ena vuku ni ra se bera ni savasava vakataucoko. Era bula voli ena nodra ivakatagedegede vakayalo e ra. Se cava sara na kaukauwa ni nodra cakacaka se na vinaka sara ni nodra cakacaka, era sega ni tiko vakacegu rawa ka marautaka na veitokani ni Yalo Tabu me yacova na gauna era sa yalomalumalumu kina, veivutuni vakataucoko, ka rawata na loloma veivueti kei na loloma soli wale ni iVakabula.
Sa vakasalataki ira na Nona italai na Turaga mera yalomalumalumu baleta na cakacaka ni veivakataucokotaki vakayalo e tekivu ga ena yalo sa raramusumusu. Vakasamataka mada na veika vinaka e yaco mai na veika sa raramusumusu: Ena kakavuruvuru na qele me tei kina na witi. Ena kakavuruvuru na witi me madrai. Ena kakavuruvuru na madrai me ivakatakarakara ni sakaramede. Ni dua sa veivutuni ka kania na sakaramede ena yalo sa raramusumusu kei na yalo sa bibivoro, sa yaco o koya me taucoko.8 Ni da sa veivutuni ka vakataucokotaki ena Veisorovaki i Jisu Karisito, eda sa qai solibula vakalevu cake vua na iVakabula ni da sa qaravi Koya yani. “Ia dou lako mai ka cabora na yalomudou taucoko me isoro ki vua.”9
Kevaka o sa vakaogai bibi tu ena ivalavala ca ka gadreva mo veivutuni, mo vakayacora sara ga ena gauna o ya. Ena gauna sa vakabulai ira kina na vakararawataki na iVakabula, e dau sureti ira o Koya mera tucake. E tukuni ena ivolanikalou ni ra dau cakava ena gauna sara ga o ya, se vakatotolo sara.10 Ni gadrevi mo vakabulai mai na nomu rarawa vakayalo, yalovinaka mo ciqoma na Nona veisureti mo tucake. Kakua tale ni wawa, drau veivosaki kei nomu bisopi, peresitedi ni tabana, se peresitedi ni kaulotu ka tekivu mo sa veivutuni ena gauna oqo.
Na kaukauwa veivakabulai ni Veisorovaki ena kauta mai na vakacegu ki na yalomu ka rawa vei iko mo vakila na Yalo Tabu. E sega ni yalani rawa na solibula ni iVakabula, ia na noda ivalavala ca, e dina ga ni levu sara ka ca vakalevu, ena rawa ni wiliki ka vakatusai, biu laivi ka vosoti. “Raica sa levu vakaidina na nona marautaki ira era sa veivutuni!”11
E kaukauwa sara na yalayala oqo ena Vunau kei na Veiyalayalati: “Mo qarauna me savasava tikoga na nomu vakanananu, ia ena taucoko sara kina na nomu vakabauta e na mata ni Kalou.”12 Ni ko bula voli ena dodonu, ko na vakila e dua na yalonuidei veivakacegui ena kemu ituvaki e mata ni Kalou ka na tiko kei iko na kaukauwa ni Yalotabu me nomu itokani.13
Eso era se qai lewena walega oqo na Lotu se o ira era sa lesu tale mai ki lotu era na rairai kaya, “Au sa bula kilikili kau sa gadreva meu laki veiqaravi, ia au sega mada ni kila se sa rauta na veika au sa kila rawa.” Ena Epereli a vakavulica kina o Peresitedi Thomas S. Monson, “Na kilai ni dina kei na isau ni taro levu duadua ena yaco mai vei keda ni da sa talairawarawa tiko ki na ivunau ni Kalou.”14 Sa veivakadeitaki dina meda kila tiko ni noda talairawarawa ena kauta mai na kila-ka.
Eso tale era na vakila ni vakaiyalayala ga na nodra taledi, gugumatua, se kila vakacakacaka mera cau kina. Kevaka o iko o dau vakasama vakaoqo, mo nanuma na veika a sotava o Elder Pokhrel. Vakavakarautaki iko ena kena vinaka duadua o rawata rawa, ka mo kila tiko ni o Tamada Vakalomalagi ena vakalevutaka na nomu yalomalumalumu kei na sasaga ni talairawarawa. A veivakasalataki kina vakaoqo o Elder Richard G. Scott: “Ni da sa talairawarawa ki na ivunau ni Turaga ka qaravi ira na luvena ena yalodina, na kena revurevu ga sa ikoya na kaukauwa mai vua na Kalou—na kaukauwa meda cakava na ka ena sega ni rawa meda cakava ena noda kaukauwa ga vakai keda. Na ka eda kila, na noda taledi, na noda kaukauwa, sa na vakalevutaki baleta ni da sa ciqoma na veivakaukauwataki mai vua na Turaga.”15
Ni ko sa vakararavi vua na Turaga kei na Nona vinaka, ena vakalougatataki ira na Luvena na Tamada sa Cecere Sara mai vei iko.16 A vulica o Elder Hollings mai Nevada na ka oqo ni se qai tekivu kaulotu. Na siga a yaco yani kina i Idia, a sala vata kei au kei Sisita Funk ki Rajahmundry, na imatai ni nona yasana ni kaulotu. Ena yakavi o ya rau a laki sikova o Elder Hollings kei Elder Ganaparam e dua na lewe ni Lotu kei tinana. A gadreva o tinana me vulica na veika e baleta na Lotu baleta ni sa raica o koya ni sa vakalougatataki tiko kina o luvena yalewa. A tomani rau yani o Sisita Funk me laki vakaveiwekanitaki. Ena vuku ga ni na laki vakavulici na lesoni ena Vakavalagi ka rawa ga vei tinana me vosa Vaka-Telugu, a tiko kina e kea e dua na baraca ena tabana me vakadewataka na veika e vakavulici.
Na ilesilesi nei Elder Hollings ena imatai ni nona itavi ni veivakavulici o ya me vakavulica na iMatai ni Raivotu, ka me vakayagataka na vosa nei parofita Josefa. Ena gauna ni lesoni a rai yani vei Sisita Funk ka taroga, “Meu cavuta beka na veivosa yadudua?” ka kila tu ni na vakadewataki.
A sauma o Sisita Funk, “Cavuta yadudua na vosa me na qai vakadinadinataka na Yalotabu na ka o cavuta.”
Ena gauna sa vakavulica kina na daukaulotu oqo na Matai ni Raivotu, ena nona cavuta na vosa nei Parofita, sa veisau mai na irairai nei koya na sisita lomani o ya. Sa tonawanawa na matana. Ni sa mai vakacavara o Elder Hollings na itukutuku lagilagi o ya ni qai bera ni vakadewataki na veika a cavuta, sa kerea na sisita o ya ena tuturu ni wai ni mata ena vosa vaka-nodratou, “E rawa beka meu sa papitaiso? Ena rawa tale beka ga mo drau vakavulici luvequ tagane?”
Kemuni na noqu italai itabagone lomani, ena tadola na katuba kei na yalo ni tamata ki na itukutuku ni kosipeli e veisiga—na itukutuku ena kauta mai na inuinui kei na vakacegu kei na reki kivei ira na luve ni Kalou e vuravura taucoko. Kevaka o sa yalomalumalumu ka talairawarawa, ka vakarorogo ki na domo ni Yalotabu, ko na kunea na marau sa cecere sara ena nomu veiqaravi vaka-daukaulotu.17 Sa dua na gauna talei oqo mo daukaulotu kina—e dua na gauna sa kusata tiko kina na Turaga na Nona cakacaka!
Au sa vakadinadinataka na iVakabula, o Jisu Karisito kei na Nona “ivakaro vakalou”18 o ya “mo dou qai lako ka vakalotutaki ira na lewe ni veivanua kecega.”19 Oqo na Nona Lotu. E liutaka tiko mai vei ira na parofita kei na iapositolo bula. Ena auwa e tarava, e ratou na vakavulici keda kina na Mataveiliutaki Taumada. Meda sa qai “yalomatua ka dauvakarorogo,”20 me vakataki Momani, ni qai yaco mai na veikacivi, eda sa kilikili ka rawa ni vosa ena kaukauwa ni Yalotabu: “Raica koi au na tisaipeli i Jisu Karisito, na Luve ni Kalou. Sa kacivi au ko Koya meu vunautaka na nona vosa vei ira na tamata, me ra rawata kina na bula tawamudu.”21 Ena yaca i Jisu Karisito, emeni.