Na iVunau kei na iVakavuvuli Era Tu ena Yavu ni Vakabauta

Mai vei Elder L. Tom Perry

Ena Kuoramu ni iApositolo Le Tinikarua

Na yavu yadua ni vakabauta e vakaikuritaka vakabibi sara na noda kila na kosipeli i Jisu Karisito.

Ena gauna a soli kina vei au na ilesilesi meu vosa ena soqoni ni matabete ni koniferedi raraba oqo, au vakasamataka sara e dua na qasenivuli vakasakiti ni Lalai. Na nona gagadre cecere me vakarautaki keimami me keimami kilikili ni ciqoma na matabete. E dau vakatovolei keimami vakalevu ena veika e gadrevi me keimami taurivola kina mai na Lalai—me keimami nanuma na yacadra na lewe ni Kuoramu ni iApositolo Le Tinikarua kei na Yavu ni Vakabauta. A yalataka talega vei keimami—kevaka keimami rawata kece me keimami cavuqaqataka na tinikatolu na Yavu ni Vakabauta, keimami na digitaka e dua na vanua ka lako vata kina ena iotioti ni neimami kalasi.

Keimami a digitaka e dua na vanua keimami dau taleitaka me keimami taubale kina ena veibaba vatuvatu ena dela ni imatai ni baniwai ena icurucuru e Logan Canyon, ena vualiku kei Utah. E tiko e dua na vanua tautauvata ena veidelana vatuvatu oqo ka toka kina e dua na matadravu sega ni dua a cakava ka rawa ni da caka bani vakasoseti ka tavu masimelo kina. Ni keimami digia na vanua oqo, keimami a sega ni vakasamataka na neimami qasenivuli, sa qase ka sega soti ni waribariba. Kevaka keimami a vakasamataka vakavinaka, keimami a rawa ni kila ni na dredre vua na marama oqo na kaba ulunivanua. Sa vauci ena nona yalayala, ka mani vakamuri keimami ga.

Taumada keimami kabata cake na delana lailai. Ena neimami gauna oya e sega na wa ni livaliva me dredre kina na lako. A kabata rawa na delana na neimami qasenivuli ena neimami a vukei koya. Ni keimami yaco i cake keimami sirova sobu edua na tokaitua vatu ki na dua na vanua keimami vakatoka me “Daku ni Vonu.”

Ni keimami yaco yani, a taura e dua na gauna na neimami qasenivuli me cegu vinaka kina. Ni keimami sa vakarau dabe sobu ka kana, sa vakacegu toka vakavinaka o koya me vakavulica vei keimami na iotioti ni neimami lesoni. E tukuna vei keimami na nona marautaka ni dau vakavulici keimami ena Lalai ena rua na yabaki sa oti. E vakacaucautaki keimami ena neimami sa kenadautaka na Yavu ni Vakabauta. Sa rawa me kacivaka ga mai na kena naba e dua vei ira ka keimami cavuqaqataka lesu yani vua. Oti qai kaya ni kena cavuqaqataki na Yavu ni Vakabauta e sega ni dua na kena ibalebale levu cake mai na noda kila ga e levu na vosa vakavo kevaka eda kila na ivunau kei na ivakavuvuli era tu kina. A vakayaloqaqataki keimami me keimami vulica na ivunau ni kosipeli e vakavuvulitaki ena Yavu ni Vakabauta yadua. E vakamacalataka ni wasei tu ena veiwasewase na ivunau e kunei ena Yavu ni Vakabauta.

I. Na Lewetolu Vakalou kei na Vunau Taumada i Karisito.

Eda vulica mai na imatai ni yavu ni vakabauta ni ratou lewe tolu na Lewetolu Vakalou: na Kalou na Tamada, o Jisu na Karisito, kei na Yalo Tabu.

Na ikarua ni yavu e vakavulica vei keda ni da na saumi taro ena noda dui ivalavala e vuravura.

Na ikatolu e vakaraitaka na nona veiqaravi na iVakabula me baleta na nodra vakabulai na luvena na Tamada Vakalomalagi.

Na ikava e vakavuvulitaka na bibi ni ivakavuvuli taumada kei na cakacaka vakalotu.

Na qaqa ni nona vosa na neimami qasenivuli sa ivurevure ni veivakauqeti vei au baleta na nona vakabibitaka na vulici ni kosipeli. Na ivolanikalou ena tuberi keda ki na dua na ivakatagedegede ni dina ka da na rawa ni vakatulewataka kina na kila-ka eda sa ciqoma, se dina se lasu. Na ivunau dina e lako mai vua na Kalou, na ivurevure ka yavu ni ka dina kecega. Na ivakavuvuli kei na vakasama ni ivunau dina era kunei ena kosipeli ni noda Turaga ka iVakabula. Na ivakavuvuli lasu e lako mai vei Setani, na tama ni ka lasu kecega. Na nona gagadre me vakacacana, veisautaka, ka moica na dina sa vakatakilai mai. E vinakata o koya me lawakitaki keda me rawa ni so vei keda e butusevata na nona sala ena noda ilakolako lesu ki na noda itikotiko vakalomalagi.

E vakavulica vei keda na ivolanikalou na ivakarau me da levea kina na ivakavuvuli lasu. Me vakataka, na ivola nei Paula vei Timoci eda wilika kina:

“Sai koya na Kalou sa vakavuna na ivolatabu kecega, a sa yaga oqo me ivakavuvuli, me vunauca na ca, me ia kina na vakadodonutaki, me ia kina na vakatavuvuli ena ka e dodonu:

“Me yaco kina na tamata ni Kalou me vakarau tu, ni sa vakarautaki ki na ivalavala vinaka kecega” (2 Timoci 3:16–17 ).

Na ivunau oqo ki na Lotu sa vaka na batiri ena dua na selevoni (cell phone). Ni o kauta tani na batiri mai na nomu selevoni, sa sega ni dua na betena. Sa vakakina ni sa sega na betena na lotu e sega ni vakavuvulitaki kina na ivunau dina. Ena sega ni rawa ni tuberi keda lesu vua na Tamada Vakalomalagi kei na noda itikotiko tawamudu.

II. Tauyavu kei na iVakarau ni Matabete

Ni da sa tekivu kila na ivunau taumada i Karisito, e vakavuvulitaki vei keda ena ikalima kei na ikaono ni yavu ni vakabauta e vakavuvulitaki kina vei keda na veika e baleta na tauyavu kei na ivakarau ni matabete. Ena nona veiliutaki na Turaga, a tauyavutaka o Josefa Simici na nona Lotu na iVakabula ena kena vakayagataki na lewa ni matabete—na kaukauwa ni Kalou. Na Lotu i Jisu Karisito ni Yalododonu Edaidai sai koya na isoqosoqo vata ga a tauyavutaka ka liutaka na Karisito ni se tiko voli e vuravura.

Sa dua na siga lagilagi vei rau o Josefa Simici kei Oliver Cowdery ena Me ni 1829 ena nodrau gole yani ki veikau me rau masulaka na ivunau ni papitaiso me baleta na vakabokoci ni ivalavala ca ka rau a wilika ena nodrau vakadewataka tiko na iVola i Momani. E vuqa na ivakavuvuli me baleta na papitaiso era vakavuvulitaka na veimatalotu ena itekivu ni 1800 vakacaca, ka rau kila o Josefa kei Oliver ni sega ni rawa ni ra dina taucoko. Erau vinakata me rau kila na ivakarau dodonu ni veipapitaisotaki kei koya talega e tu vua na dodonu me veipapitaisotaki.

Me isau ni nodrau vakatakekere vua na Turaga, a rairai mai vei rau e dua na italai mai lomalagi, o Joni na Dauveipapitaisotaki. A tabaka yadudua na uludrau ka solia vei rau na dodonu me rau veipapitaisotaki ena malanivosa oqo: “Oi kemudrau na noqu itokani, au sa lesi kemudrau ena yaca ni Mesaia ki na itutu ni bete vaka-Eroni” (V&V 13:1).

Sa dua na siga vakasakiti ena itukutuku kei vuravura! Sa vakalesui mai ki vuravura na matabete.

Ni da ciqoma na matabete, eda sa ciqoma na dodonu me da cakacaka ena yaca ni Kalou ka veiliutaki ena sala ni dina kei na ivalavala dodonu. Na dodonu oqo sa ivurevure bibi ni qaqa dodonu kei na veivakauqeti me yaga vei ira na luve ni Kalou e vuravura ka na curubasikata yani na ilati. A gadrevi me vakalesui rawa mai na matabete ni se bera ni qai tauyavutaki na Lotu dina i Jisu Karisito. Oqo na veika bibi eda vulica mai na ikalima kei na ikaono ni yavu ni vakabauta.

III. iVurevure Tawamudu ena iLakolako ena Bula Oqo

Na tolu na Yavu ni Vakabauta e tarava—vitu, walu, kei na ciwa—eratou tuva na ivurevure sa vakarautaki tu me dusimaki keda ena noda ilakolako ena bula oqo. Sa soli vei keda na isolisoli vakayalo me dusimaki keda ena noda muria na nona ivakavuvuli na Turaga ka me taqomaki keda mai na ca. E dua tale na idusidusi na ivolanikalou; kevaka eda tautauri matua ena vosa ni Kalou, ena vakaraitaka o Koya na sala lesu ki na bula tawamudu.

Na ikaciwa ni yavu ni vakabauta e vakavuvulitaka vei keda ni Kalou sa vakatakila mai, sa vakatakila tiko mai, ka na qai vakatakila mai ena veisiga e muri e vuqa tale na dina cecere ka bibi vei ira na Nona parofita, daurairai, ka dauvakatakila. Eda vulica me ikuri ni noda vakarorogo ki na domo malua ka lailai ni Yalotabu kei na wili ivolanikalou, ni dua tale na ivurevure ni noda tuberi o ira na noda iliuliu ena Lotu, o ira era sa digitaki, kacivi, ka vakatikori me ra vakalougatataka na noda bula mai na veilesoni era vakavuvulitaka.

IV. Lewenilotu Daukaulotu

Na ikatini, tinikadua, kei na ika tinikarua ni yavu ni vakabauta era dusimaki keda ena ivakarau me da cakava kina na cakacaka ni kaulotu ka wasea na kosipeli ena dua na vuravura ni veimatanitu e vuqa kei na veimataqali lawa. Eda vulica na kena vakasoqoni vata ko Isireli ena vakavakarau ki na iKarua ni Nona Lesu Mai na iVakabula. Eda sa vakaroti ni o ira na tagane kei na yalewa era na dui matataki ira ga, ka rawa ni ra ciqoma se besetaka na vosa ni Kalou me vaka na nodra dui lewa eloma. Kena iotioti, eda vulica ena noda vakatetea na kosipeli i Jisu Karisito ki na tutu e va kei vuravura ni sa dodonu me da rokova na matanitu ni veivanua eda curuma yani. Sa dina sara, eda vakabauta ni dodonu me da talairawarawa, rokova, ka tokona na lawa ni veivanua yadua.

V. iVakarau me da Segata

Na ikatinikatolu ni yavu ni vakabauta e vakarautaka na rai bibi eso ena ivakarau ni noda bula kei na itovo me da vakaitovotaki keda kina. E kaya vaqo: “Keimami vakabauta ni sa kilikili me da yalododonu, yalodina, talairawarawa, lomasoli, ivalavala savasava, ka da caka vinaka vei ira na tamata kecega; sa rawa ni tukuni ni keimami sa muria na vunau nei Paula—Keimami sa vakabauta na ka kecega, keimami sa vakanuinuitaka na ka kecega; keimami sa vosota oti na ka e vuqa, ka keimami nuitaka ni na rawa me keimami vosota na ka kecega. A ka kecega e vinaka, na ka e totoka, se rogorogo vinaka, se daudokai se vakaturaga, keimami sa gadreva na veika oqori.”

O keda kece e dodonu me da segata me da vakaitovotaki keda ena veitovo oqo ka bulataka na bula era vakavotukanataki kina. Na dina era vakavuvulitaki ena Yavu ni Vakabauta era veitokoni me vaka na nodra cakacaka veitokoni na veitikina lalai ni dua na selevoni. Me vaka na cakacaka matailalai ena kena buli ka biu vata na veitiki lalai ni selevoni, na yavu ni Vakabauta e solia vei keda na ivunau idola ni Veivakalesui mai. Na yavu yadua ni vakabauta e vakaikuritaka vakabibi sara na noda kila na kosipeli i Jisu Karisito.

A conaka ki yaloqu na noqu qasenivuli ni Lalai na yalo meu vulica na ivunau ni matanitu. E vakavuvulitaka vei au meu vakasaqara na ibalebale titobu cake ni Yavu ni Vakabauta rawarawa oqo. E yalataka vei au kevaka au taura na gauna meu vulica na veidina tabu oqo, ena veisautaka na noqu bula meu vinaka cake, kau vakadinadinataka vei kemuni ni sa vaka dina kina.

Ni oti na nona lesoni vakasakiti na noqu qasenivuli ena ulunivanua oya mai Logan Canyon, keimami qai kila ni sa balavu cake na neimami tiko voli kina mai na ituvatuva taumada. Sa karobo sobu na vanua, ka keimami vakila ni sa tiko e dua na leqa.

A bau saga dredre toka o qasenivuli me yaco mai ki na neimami vanua digitaki, ia na ilesulesu ena leqataki vakalevu. Sa qai vakavotuya tale mai na leqa oqo ni sa dua dina na digidigi ca na vanua keimami digitaka oqo. A dredre sara vei keimami na kaba lesu mai, ia qai dredre vakalevu cake sara vua ena nona yabaki o ya.

Ni keimami tovolea dredre toka me keimami vukei koya lesu mai ki delana, rau sa basika mai e rua na ovisa. A talai rau mai na peresitedi ni Lalai me rau vaqarai keimami, ena nona leqataka de keimami sa lakosese. Na veika duatani a yaco kei na lesoni e vakavuvulitaki sa yaco kina me guiguilecavi dredre ena noqu bula.

Kemuni na cauravou—au vakauqeti kemuni mo ni vakayagataka nomuni vakasama vinaka mo ni vulica ka vuli mai na Yavu ni Vakabauta kei na ivunau era vakavuvulitaki kina. Era oka ena veitukutuku bibi ka leleka duadua ena ivunau ni Lotu. Kevaka o na vakayagataka me idusidusi ni nomu vulica na kosipeli i Jisu Karisito, o na raica ni o sa vakarau tu mo na tukuna na nomu ivakadinadina me baleta na dina vakalesui mai ki vuravura. Ena rawa mo tukuna ena dua na sala rawarawa, dodonu, ka bibi na veivakabauta titobu o dau vakamareqeta ni o lewena na Lotu i Jisu Karisito ni Yalododonu Edaidai.

Au vakuria na noqu ivakadinadina ki na dina ni tinikatolu na Yavu ni Vakabauta ena yaca ni noda Turaga ka iVakabula, io ko Jisu Karisito, emeni.