Qaqaco Yadudua kei na Veisorovaki i Jisu Karisito

Mai vei Elder Richard G. Scott

Ena Kuoramu ni iApositolo Le Tinikarua

Ena Veisorovaki i Jisu Karisito, o keda kece eda na vakasavasavataki ka sa na kau laivi na icolacola ni talaidredre.

Wale tikoga oqo au a kalougata ni sotava e dua na ilawalawa itabagone mai na vanua o Idaho. Tarogi au kina e dua na goneyalewa matavinaka sara se cava na ka bibi duadua mera sa tekivu cakava sara tikoga ena gauna oqo. Au a vakatura vua mera tovolea mera raica na kaukauwa ni Veisorovaki i Jisu Karisito ena nodra bula. Nikua, au na via vosa ga ena dua vei ira na ivurevure ni kaukauwa ni Veisorovaki i Jisu Karisito.

Eda wilika na veika baleti Amoni kei iratou na tacina mai na iVola iMomani ena nodra laki vakavulica na kosipeli vei ira e dua na mata tamata era sa “kila, yalokaukauwa, ka itovo vakarerevaki.”¹ E levu na tamata era qai veisau ka digitaka mera sa biuta na nodra itovo ca. Ena taucoko ni nodra sa veisau, era buluta sara ga na nodra iyaragi ka yalayala vua na Turaga ni ra na sega ni qai vakayagataka tale.²

E muri e so na tacidra ka ra a sega ni veisau era sa qai mai via vakamatei ira tiko. O ira era sa veisau era sa nanuma mera sa na mate ga ka kakua ni taura cake tale na nodra iyaragi. Na nodra ivakaraitaki oqori sa vukei ira sara ga e levu tale mera saumaki ka biuta laivi na nodra iyaragi ni talaidredre.³

Ena veituberi nei Amoni e a maroroi ira vaka ise ni valu ena kedra maliwa na Nifai ka ra sa mai vakatokai tu mera tamata i Amoni na Turaga.⁴ Era a maroroi ira tu mai me vica vata na yabaki o ira na Nifai, ia sa vaka mera malumu mai ka ra sa vinakata sara vakalevu na veivakaukauwataki.⁵

Era sa yacova mai na Amoni e dua na gauna dredre ena nodra bula vakayalo. Era sa dina tu ki na nodra veiyalayalati mera kakua tale ni qai taura na iyaragi ni ivalu. Ia, era kila vinaka tu ni itavi ni tama na taqomaki ni matavuvale.⁶ Na gagadre o ya sa iulubale vinaka ni nodra voroka na yalayala.⁷

Na nodra iliuliu ni matabete vuku o ya o Ilamani e a kila vinaka tu ni na sega vakadua ni ciqomi na voroki ni yalayala ni Turaga. Sa qai solia okoya e dua tale na vakatutu veivakauqeti vei ira. A vakananuma vei ira ni o ira na luvedra era se bera vakadua ni bau cakacala ena ka vata ga oya, ka sa sega kina ni dodonu mera cakava na veiyalayalati vata ga oya.⁸ Dina ga ni ra a tamata gone sara na luvedra tagane, ia era tamata kaukauwa ka vakabibi ni ra dau bula dodonu ka savasava. Ka ra a vakacokotaki ena nodra vakabauta na tinadra.⁹ Ena veiliutaki ni nodra parofita iliuliu, era taura na nodra itutu na tamadra ka lako yani ka veitaqomaki vei ira na nodra matavuvale kei na itikotiko.¹⁰

Na veika e yaco wavokita na vakatulewa sa vakaraitaka na kena rawa ni veivakaukauwataki na Veisorovaki i Jisu Karisito ena nodra bula na luve ni Kalou. Vakasamataka mada na nodra vakanananu na tamadra. Na cava soti era vakila ni sa mai vakataotaka na nodra dodonu mera taqomaki ira na watidra kei ira na luvedra ena veika cacawale era a dau cakava tu mai liu? Ni ra kila na dredre ni veika era sa na sotava oqo na luvedra, era na rairai qusi wainimata vuni beka. Sa nodra itavi na tama, ka sega ni o ira na gone, me ra taqomaka na nodra matavuvale!¹¹ Sa na bau vaka sara ga o ya na nodra rarawa.

Na cava e leqataka kina na nodra matabete iliuliu vakauqeti na nodra na laki kelia tale mai na nodra iyaragi, “de … ra na qai sega ni rawata na bula tawamudu”?¹² Sa vakaraitaka na Turaga, “Raica ko koya sa veivutunitaka na nona ivalavala ca ena vosoti, ia koi au na Turaga au na sega ni nanuma tale.”¹³ O ira na tama vakabauta oqo era sa veivutunitaka makawa sara na nodra cala ka ra sa vakasavasavataki ena Veisorovaki i Jisu Karisito, ia na cava ga era vakasalataki kina mera kakua ni taqomaki ira na nodra matavuvale?

E dua na ka dina ni da na vakasavasavataki ena Veisorovaki i Jisu Karisito. E da na savasava ka savavuka kina. Ia, ena so na gauna ena vakaleqai keda na revurevu ni noda digidigi. E dua na ka bibi me na taucoko na veivutuni, sa ikoya meda na colata na revurevu ni ivalavala ca eda sa cakava oti. Na nodra ivalavala ca ena veigauna sa oti na Amonaiti sa biuti ira sara ga ena dua na vanua dredre ka na rawa kina vei Setani me valuti ira ka rawai ira ena veigauna ga e vinakata.

O Setani ena tovolea me vakayagataka na noda vakasamataka nai ivalavala ca eda sa cakava oti me vakalesui keda vua. Meda sa na yadrava sara ga na tikina oqo meda na valuti koya rawa kina. O ya na ka e yaco vei ira na tama yalodina ni Amonaiti. Mai na vica vata na yabaki ni nodra a bula sautu tu, sa dodonu mera na taqomaki ira tikoga vakayalo mai na veivakayarayarataki ni vuni ca kei na vakanananu ni ivalavala ca era sa vakayacora oti.

Ena maliwa ni veivaluvaluti, e dau vakarota o Turaganivalu Moronai na nodra taqomaki na veikoro malumalumu. “a sa lewa o Koya me keli na bai kau ki na tai ni ikeli ki na koro ka qai bili yani ki na qele … me wavokita na koro … e dua na bai kau kei na qele ka sa kaukauwa sara.”¹⁴ Kila vinaka tu o Turaganivalu Moronai na bibi ni kena vakaukauwataki na vanua malumalumu me vakavuna na kaukauwa.¹⁵

Era tautauvata sara ga kei ira na tamadra na Amoni. Era na gadreva na veitaqomaki e balavu ka rabailevu ena nodra bula ni vakabauta kei na veika cacawale era sa vakayacora oti mai liu. O ira na luvedra tagane era sa vakalougatataki ena ivalavala dodonu. Era sega ni rawai vakarawarawa rawa tiko kina ena veitemaki vata ga. Era taqomaka matua na nodra matavuvale ka sega ni vakawaletaka na nodra bula vakayalo.

Na itukutuku marautaki ga vua e dua e gadreva me quata laivi na revurevu ni digidigi cala mai liu sa ikoya na Turaga ni sa duidui na nona raica na malumalumu mai na talaidredre. Ni Turaga ena totogitaka na talaidredre,¹⁶ ka dau yalololoma vua e malumalumu.¹⁷

Sega ni vakabekataki ni ra a vakavulici na tamadra na Amoni ena ivakavuvuli lasu mai vei ira na nodra qase, ia o ira kece na luvena na Tamada Vakalomalagi era lako vata mai kei na Rarama i Karisito ki vuravura. Veitalia ga na ivalavala ca era sa cakava, na kena revurevu ga sa ikoya na nodra vakaweleweletaka na nodra bula vakayalo ka na tovolea o Setani me vakayagataka.

Era a vakavulici ena kosipeli ena loloma, era veivutuni, qai ena Veisorovaki i Jisu Karisito era a vaqaqacotaki vakayalo me ra vorata na veitemaki nei Setani. E dina ni ra sega ni vakila na veitemaki mera na lesu tale kina ki na nodra cala mai liu, ena nodra sa muria na nodra iliuliu ka parofita, era sa sega ni solia kina vei Setani na madigi, me “[lawakitaka] na yalodra, ka [me liutaki] ira sobu yani vakamatau ki eli.”¹⁸ E sega walega ni vakasavasavataki ira mai na nodra ivalavala ca na Veisorovaki ni iVakabula, ia sa baleta talega na nodra talairawarawa vua ki na ivakasala ni nodra iliuliu ni matabete, sa rawa kina vua na iVakabula me taqomaki ira ena nodra malumalumu ka vaqaqacotaki ira. Na nodra vakanamata vakabalavu kina mera guilecava na nodra ivalavala ca e vakatorocaketaka na nodra taqomaka na nodra matavuvale mai na veika e ra dau vakayacora ena rara ni valu. Na nodra vakatutu e sega ni vakuwai ira mai na nodra vakalougatataki. E vaqaqacotaki ira ka vakalougatataki ira ka vakalougatataka na nodra kawa mai muri.

Na itinitini ni italanoa e vakararamataka ni nona loloma soli wale na Turaga ena rawa ni “vaqaqacotaka na malumalumu na kaukauwa.”¹⁹ O ira na tama vakabauta oqo era soli ira na luvedra tagane vei Ilamani me maroroi ira. Dina ni ra a valu na luvedra ena ivalu vakarerevaki sara ka so vei ira era vuetaki, ia e sega ni dua vei ira e mate.²⁰ Era a vakavure kaukauwa na ilawalawa oqori kivei ira na mataivalu ni Nifai. Era vakabauta ka vakaukauwataki vakayalo ena nodra sa lesu mai ki vale. Era kalougata na nodra matavuvale, taqomaki, ka vaqaqacotaki.²¹ Nikua, era lewe levu sara na vulica tiko na iVola i Momani era sa vakararamataki ena nodra ivakaraitaki na ilawalawa gonetagane buladodonu oqo.

O keda yadua sa yaco oti ena noda bula na gauna eda digidigi cala kina. Eda na gadreva kece sara na veivueti kaukauwa ni Veisorovaki i Jisu Karisito. O keda kece meda na veivutunitaka na noda talaidredre. “Raica koi au na Turaga, au sa sega sara ni vakadonuya na ivalavala ca.”²² Ena sega ni rawa, baleta ni kila o Koya na veika ena gadrevi me da na qai laki vakataki Koya.

E levu vei keda sa vakatara na malumalumu mera yaco ena noda bula. Ena Veisorovaki i Jisu Karisito, sa na rawa kina vei keda meda vakataki ira na Amoni ena taraicake ni noda bai ni bula vakayalo meda taqomaki kina mai na veitemaki nei Setani ena nona saga me rawai keda ena veika eda a dau cakava tu mai liu. Na veitaqomaki e wavokita tu na nodra bula na Amoni e vakalougatataki ira ka vaqaqacotaki ira, na nodra matavuvale, nodra vanua, kei na nodra kawa. Ena rawa talega ni vaka o ya vei keda.

Ia, meda na tara vakacava na bai tawamudu oqo? Na imatai na noda veivutuni me ka dina ka me taucoko. Ena Veisorovaki i Jisu Karisito, o keda kece eda na vakasavasavataki ka sa na kau laivi na icolacola ni talaidredre. Nanuma, ni veivutuni e sega ni totogi. Sa ikoya ga na sala ni vakanuinui ki na dua na bula lagilagi mai muri.

Na Tamada Vakalomalagi sa vakarautaka na iyaragi me vukei keda ni tara na bai meda taqomaki kina ena noda rawa ni rawai kei na noda yalodina. Vakasamataka na veivakatutu oqo:

Cakava na veiyalayalati ka ciqoma na nomu cakacaka vakalotu. Qai vakayacora vakamatau ka vakadua tu ga yani na nomu laki qarava ki na valetabu na veika baleti ira na nomu qase.
Wasea na kosipeli vei ira era sega ni lewenilotu kei ira era sa mai luluqa tu se o ira na itokani. Na wasei ni veika dina oqo ena rawa ni vakavouia na nomu bula.
Qarava vakadodonu na nomu itavi ena Lotu, vakabibi na nomu itavi ni veisiko kei na siko vuvale. Kakua ni dua na dauveisiko vakavula ni 15 ga na miniti. Dodoliga yani ka veivueti mai vei ira na lewe ni matavuvale. Sasagataka mo kilai ira. Saga mo dua na nodra itokani. Ena nomu ivakaraitaki ni loloma, vakadinadinataka ni ko kauwaitaki ira dina.
Bibi duadua, mo qaravi ira na lewe ni nomu matavuvale vakaiiko. Cakava me tiko sara e cake na vakatorocaketaki ni bula vakayalo nei watimu kei ira na luvemu. Kauwai dina ena ka o kila ni rawa ni o cakava mo vukei ira yadudua kina. Tu vakarau mo solia na nomu gauna kei na nomu yalodina.

E tiko vei ira yadua na vakatutu oqo e dua vata ga na inaki: Vakasinaita na nomu bula ena nomu veiqaravi vei ira na tani. Ni ko sa vakayalia na nomu bula ena nomu qaravi ira tiko na luvena na Tamada Vakalomalgi,²³ sa na malumalu na nona rawa ni rawai iko o Setani.

Baleta ni lomani iko na Tamada Vakalomalagi, sa na vaqaqacotaka na Veisorovaki i Jisu Karisito na kaukauwa o ya. Sega li ni dua na ka totoka o ya? E lewe levu vei kemuni o ni sa vakila na bibi ni icolacola ni digidgi cala, ka o ni sa vakila yadudua na kaukauwa ni veilaveti ni Turaga ena nona veivosoti, loloma, kei na kaukauwa. Au sa vakila oti, kau vakadinadinataka ni sa vakarautaki tale tu ga kivei kemuni vakayadua, ena yaca i Jisu Karisito, emeni.