Laiva na Nomu Veivakabauti Vua na Turaga

Mai vei Elder M. Russell Ballard

Ena Kuoramu ni iApositolo Le Tinikarua

Vakaitavitaki iko ena nomu cakava na veika o rawata ena kena wasei na itukutuku cecere ni kena Vakalesui mai na kosipeli i Jisu Karisito.

Keirau se qai lesu walega mai kei Sisita Ballard ena dua na ilesilesi ki na lima na matanitu mai Iurope. A ka dokai vei keirau mai kea me keirau sota kei na vuqa sara vei ira na noda daukaulotu, de rairai eso beka na luvemuni. Me tekivu mai na gauna e kacivaka kina o Peresitedi Thomas S. Monson na kena sa vakalailaitaki na yabaki me ra laki veiqaravi kina na cauravou kei na goneyalewa, sa ka dokai vei au meu sota vata kei na sivia e lewe 3,000 vei ira. E serau mai matadra na rarama i Karisito, ka ra sa nanamaki tu me ra tosoya ki liu na cakacaka—me ra kunea ka vakavulica, me ra papitaisotaka, me ra vakabulabulataka, ka me ra vaqaqacotaka ka me tarai cake na matanitu ni Kalou. Ni da sota kei ira, ena totolo na nona kila e dua, ni ra na sega ni rawa ni cakava duadua na cakacaka oqo. Nikua au vinakata meu vosa vei kemuni kece sara na lewe ni Lotu, baleta ni sa gadrevi vakatotolo vei keda yadua me da vakaitavitaki keda ena kena wasei na kosipeli.

Me vaka sa dau cavuti oti vakavuqa, a tukuna na Parofita o Josefa Simici “mai na veika kece sara sa tukuni oti, sa itavi cecere ka bibi duadua oya na kaburaki ni Kosipeli” (Nodra iVakavuvuli na Peresitedi ni Lotu: Josefa Simici [2007], 330).

Ena 1974 a kaya kina vaqo o Peresitedi Spencer W. Kimball: “E rairai na inaki cecere duadua beka ni kaulotu me soli kina ki vuravura na madigi me rogoca ka ciqoma na kosipeli. E sinai tu na ivolanikalou ena ivakaro kei na yalayala kei na veikacivi kei na icocovi ni kena vakavulici na kosipeli. Au nakita ena noqu vakayagataka na vosa ivakaro baleta ni vaka e dua na idusidusi ena sega ni rawa vei keda yadua se o keda taucoko me da dro tani mai kina” (“When the World Will Be Converted,” Ensign, Okot. 1974, 4).

Ena Julai ni yabaki vata oya, keirau a biubiu kei Sisita Ballard kei ira na luvei keirau me keirau laki vakatulewa ena Tabana ni Kaulotu e Canada Toronto. A voqa tiko e daligaqu na vosa nei Peresitedi Kimball, vakauasivi ena nona tukuna: “Kemuni na taciqu, au vakataroga se da sa cakava tiko li na veika kece e dodonu me da cakava. Eda sa yalovakacegu tiko beka ena veika eda sa cakava tiko me baleta na veivakavulici e vuravura taucoko? Eda sa cakava tiko na cakacaka ni kaulotu me 144 na yabaki. Eda sa vakarau tiko li me da vakabalavutaka na noda ikalawa? Me da vakarabailevutaka noda rai?” (Ensign, Okot. 1974, 5).

A kerei keda talega o koya me da vakatotolotaka noda toso, ena noda cakacaka vata me da tara cake na Lotu kei na matanitu ni Kalou.

Ena June sa oti oqo a vakavoqataka kina o Peresitedi Thomas S. Monson na itukutuku vata oqori vei keda na lewe ni Lotu. E kaya kina na Peresitedi: “Oqo na gauna me da lako vata mai kina na lewenilotu kei na daukaulotu …[ka] cakacaka ena were ni vaini ni Turaga me kau mai Vua na yalo. Sa vakarautaka o Koya na ivakarau vei keda me da wasea kina na kosipeli ena veisala e vuqa, ka na vukei keda o Koya ena noda cakacaka kevaka eda na cakacaka ena vakabauta me da qarava na Nona cakacaka” (“Faith in the Work of Salvation” [itukutuku a tukuni ena dua na kakaburaki, June 23, 2013]; lds.org/broadcasts).

Kemuni na taciqu kei na ganequ, e vinaka me da dau vakananuma na nodra ivakavuvuli na parofita mai na gauna nei Josefa Simici ki na gauna oqo. Era dau veivakayaloqaqataki ka kacivi keda na veiliutaki kei na lewe ni Lotu me da vakaitavi vagumatua ena kena kau mai na itukutuku ni kena Vakalesui mai na kosipeli vei ira kece na luvena na Tamada Vakalomalagi e vuravura taucoko.

Na noqu itukutuku ena yakavi nikua sai koya ni sa vakatotolotaka tiko na Turaga na Nona cakacaka. Ena noda gauna ena rawa ni caka walega oqo ni da sa dolele yani na lewe ni Lotu yadua ena loloma me da wasea na dina ni kosipeli vakalesui mai i Jisu Karisito. Eda na gadreva me da cakacaka vata vakaveitokani kei ira na noda daukaulotu e 80,00 era sa veiqaravi tiko. Na itukutuku me baleta na cakacaka cecere, vakauasivi na ilesilesi me baleti ira na iliuliu ena matabose ni iteki kei na tabanalevu, sa tuvai tu vakamatata ena mataveilawa na LDS.org ka yacana na “Hastening the Work of Salvation.”

Eda sa raica rawa mai na noda vakadidike ni vuqa cake vei ira na lewe ni Lotu bulabula era vinakata na veivakalougatataki ni kosipeli me tiki ni nodra bula o ira era dau lomana, o ira sara mada ga era se bera ni sotava. Ia eda sa kila talega ni vuqa na lewenilotu era dau lomalomarua ni cakava na cakacaka ni kaulotu ka wasea na kosipeli me baleta e rua na ka.

• Na kena imatai na rere. E vuqa na lewenilotu era sega mada ga ni dau masulaka na madigi me ra wasea na kosipeli, ena nodra leqataka de yaco mai vei ira na veivakauqeti vakalou me ra cakava e dua na ka era na sega ni rawa ni cakava.

• Na kena ikarua sai koya nodra sega ni kila vinaka se cava na cakacaka ni kaulotu.

Eda kila ni gauna e tu kina e dua me vosa ena dua na soqoni ni sakaramede ka kaya, “Nikua au na vosa tiko me baleta na cakacaka ni kaulotu,” se tucake sara mada ga o Elder Ballard ena koniferedi raraba ka tukuna na veika vata qo, eso beka vei kemuni na vakarorogo tiko ena nanuma, “O sega, kua ni baci tukuni tale; eda sa rogoca oti mada oqo.”

Eda sa kila oqo ni sega ni dua e taleitaka me kilai yalonataka tiko nona cala. O na nanuma beka de na kerei mo cakava e dua na ka sega ni veiganiti ena kemu isema vei ira nomu itokani se wekamu. Ena veivuke ni Turaga, meu kauta tani mada na rere ena tu vei kemuni se vua e dua vei ira na noda daukaulotu tudei ena kena wasei na kosipeli vei ira na tani.

Vakatulewataka mo cakava na ka sa kerea vei keda o Jisu Karisito. Sa kaya na iVakabula:

“Dou kerekere ka na soli vei kemudou; dou vakasaqara, ka dou na kunea; dou tukituki, ka na dolavi vei kemudou:

“Ni sa rawata ko koya yadua sa kerekere; ka sa kunea ko koya sa vakasaqara ka na dolavi vua sa tukituki.

“Se ko cei mada vei kemudou, kevaka e kere madrai na luvena, ena solia vua e dua na vatu?

“Se kere ika ena solia vua e dua na gata?

“Ia kevaka dou sa kila … mo dou solia na ka vinaka vei ira na luvemudou, sa na gu vakalevu cake, me solia na veika vinaka na Tamamudou mai lomalagi vei ira sa kerekere vua?” (Maciu 7:7–11).

Kemuni na taciqu kei na ganequ, ena vakaisosomitaki na rere ena vakabauta kei na yalodei ni ra tekiduru na lewenilotu kei ira na daukaulotu tudei ena masu ka kerea na Turaga me vakalougatataki ira ena veimadigi eso ni kaulotu. Ni oti oya, me da cakacakataka na noda vakabauta ka vakaraica na madigi eso me da vakaveikilaitaka kina na kosipeli i Jisu Karisito vei ira na luvei Tamada Vakalomalagi, ena yaco dina mai na veimadigi oqori. Na madigi oqori ena sega ni gadrevi kina me da cavuta e dua na ka eda sega ni vakadinata sara. Era na taladrodro ga mai me vaka ni ra vua ni noda loloma vei ira na tacida kei na ganeda. Raica tikoga na yasana vinaka, era na vakila o ira o veivosaki vata kaya na nomu loloma. Era na sega ni guilecava na yalo oqori e dina ni se bera beka na kena gauna me ra ciqoma kina na kosipeli. Oqori talega ena veisau ena veigauna mai muri ni sa veisau na ituvaki ni nodra bula.

Ena dredre sara me da druka ni da solia noda vinaka duadua ena noda qarava na cakacaka ni Turaga. Na veika ena yaco e vua ni nona vakayagataka e dua na nona galala ni digidigi, na wasei ni kosipeli e noda itavi.

Vakabauta na Turaga. O Koya na iVakatawa Vinaka. E kilai ira na Nona sipi, ka ra kila na domona na Nona sipi; nikua na domo ni iVakatawa Vinaka sai koya na domomu kei na domoqu. Kevaka eda sega ni vakaitavi, era na lakosiviti e vuqa e dodonu me ra rogoca na itukutuku ni Veivakalesui mai. Kena itukutukuni rawarawa ga, sa ka ga ni noda vakabauta kei na cakacaka. Era rawarawa na ivakavuvuli—masuta, yadua ka vakamatavuvale, na madigi ni kaulotu. Sa kaya na Turaga ena Vunau kei na Veiyalayalati ni vuqa na tamata era sega ni raica rawa na dina baleta ni ra “sa sega ni kila na vanua me ra vakasaqara kina” (V&V 123:12).

E sega ni gadrevi sara mo tamata dau veimaliwai se dau vakamacala, mo qasenivuli dau veirawai kina. Kevaka e tiko e yalomu na loloma kei na inuinui, sa yalataka na Turaga kevaka dou “tabalaka cake na domomu[dou]; [ka] tukuna yani na ka au sa vakatakila e lomamu[dou], … [dou] na sega ni vakamaduataki e matadra na lewevuqa;

“[Ka] na soli vei kemu[dou] ena gauna ko ya … io ena tiki ni siga ko ya na ka mo [dou] vosataka” (V&V 100:5–6).

E vakananuma vei keda na Vunautaka na Noqu Kosipeli ni “se bera ni tekivu na cakacaka ni kaulotu me yacova na gauna o sa kunea kina e dua mo vakavulica. Mo ni dau veivosaki vakalevu kei ira na tamata ena veisiga yadua. Sa itovo ni bula na kena rivarivabitaki na veivosaki kei ira na tamata, ia sa rawa mo masuta na vakabauta kei na kaukauwa mo ni doudou ka dolava na gusumuni mo ni vunautaka na kosipeli vakalesui mai” ([2004], 177). O kemuni na daukaulotu tudei, kevaka o ni vinakata mo ni veivakavulici vakalevu, mo ni dau vosa vei ira e levu na tamata e veisiga. Oqori ga na ka e dau talai ira yani kina na daukaulotu na Turaga me ra lai cakava.

E kilai keda na Turaga. E kila ni tu na noda dui bolebole. Au kila ni so vei kemuni ena bibi tu beka na nomuni icolacola, ia au masuta me kakua ni dua vei kemuni e nanuma ni colacola na noda dolele yani ena kena ivakarau sa matau tu, ka talei, me da wasea na kosipeli. Ia, e dua na ka dokai! E sega tale ni dua na ka cecere ena bula oqo mai na noda vakaitavi vagumatua ena veiqaravi vua na Turaga.

Na kena idola me da vakauqeti mai vua na Kalou, me da kerea na Nona veidusimaki ka qai lako yani ka kitaka me vaka e vakauqeti iko kina na Yalotabu. Ni ra nanuma na lewenilotu ni nodra itavi duadua ga na cakacaka ni veivakabulai, e rawa ni yaco me veivakadrukai. Ni ra raica me vaka ni nona veisureti na Turaga ena kena vakalesui mai Vua na yalo me vakavulici mai vei ira na cauravou kei na goneyalewa daukaulotu tudei, ena veivakauqeti, veivakayavalati, ka veilaveti.

Keimami sega ni kerea tiko na tamata kecega me ra cakava na ka kecega. Keimami kerei kemuni tikoga na lewenilotu kece mo ni masu, keimami kila kevaka o keda yadua na lewenilotu, gone kei na qase, me da dolele yani vua e “dua’ mada ga, mai na maliwa ni gauna oqo ki na Kirisimasi, era na vakila e milioni na nona loloma na Turaga o Jisu Karisito. Ka sa dua na iloloma vakasakiti vua na iVakabula.

Ena ono na macawa sa oti au ciqoma e dua na ivola mai vei iratou e dua na matavuvale qaqa ena cakacaka ni kaulotu vakamatavuvale, na matavuvale na Munns mai Florida. Eratou vola mai:

“I Elder Ballard, ni oti e 30 na miniti mai na kakaburaki ki vuravura raraba me baleta na vakatotolotaki ni cakacaka ni veivakabulai, keitou a dabe ena neitou matabose ni kaulotu vakamatavuvale. E veivakurabuitaki ni ra sa vinakata talega na makubui keirau yalewa yabaki tinivakacaca me ra vakaitavi. Keitou marau me keitou tukuna ni tekivu mai na neitou soqoni ni matabose, keitou sa vakalevutaka na neitou tobu ni veivakavulici ena 200 na pasede.

“Era sa kauti ira mai nodra itokani na makubui keirau ki na lotu, keitou dau marautaka na soqoni ni sakaramede vata kei ira na itokani luluqa, ka so vei ira na neitou itokani vovou era sa yalataka me ra taura na lesoni mai vei ira na daukaulotu. E dua vei ira na marama luluqa e sega walega ni sa lesu tale mai ki lotu ia sa kauta mai eso na dauvakadikeva vou na lotu.

“E sega ni dua e bau vakasuka na veisureti me rogoca na lesoni ni daukaulotu. Sa dua na gauna talei me da lewena na Lotu oqo” (ivola, 15 ni Okosi. 2013).

Rogoca na veivakauqeti ni Yalotabu. Dau vakatakekere vua na Turaga ena masu vakaukauwa. Vakaitavitaki iko ena nomu cakava na veika o rawata ena kena wasei na itukutuku cecere ni kena Vakalesui mai na kosipeli i Jisu Karisito.

Au cavuvosa mada mai vua e dua tale na lewenilotu daukaulotu qaqa, o Clayton Christensen: “Ena veigauna kece ni o taura na ligana e dua ka vakaveikilaitaki koya vei Jisu Karisito, o na vakila na titobu ni nona lomani iko na iVakabula kei na nona lomana na tamata e tu e ligamu na ligana” (The Power of Everyday Missionaries: The What and How of Sharing the Gospel [2013], 1).

Me vakalougatataki kemuni na taciqu kei na ganequ na Kalou, mo ni kunea na reki cecere e dau yaco mai ena noda sotava na veicakacaka mana ena nomuni vakabauta. Me vaka sa vakavulici vei keda ena Moronai wase 7:

“A sa kaya na Karisito: Kevaka dou sa vakabauti au, dou na kitaka na ka kecega ena vukuqu. …

“… Raica na vakabauta ga sa vakayacori kina na cakacaka mana, ia sa vakabauta ga era sa rairai mai kina na agilosi ka vakavulici ira na tamata; ia, kevaka sa mudu na veika kece oqo, sa vu ga mai na nodra tawavakabauta na luve ni tamata, ia ena ca vei ira ni sa tawayaga na ka kecega” (Moronai 7:33, 37).

Mai na veika au sa sotava au rawa ni vakadinadinataka vei kemuni ni na rogoca na Turaga na nomuni masu ka na levu na nomuni madigi ena gauna kei na veiyabaki sa bera mai mo ni vakaveikilaitaka na kosipeli i Jisu Karisito vei ira na luvena talei na Tamada Vakalomalagi. Peresitedi Monson, keimami sa vakarorogo tiko. Keimami na segata me keimami kunea na dua. Sa noqu masu me da sotava kece na reki cecere e yaco mai na veiqaravi vakadaukaulotu, ena yaca tabu ni Turaga o Jisu Karisito, emeni.