O Au o Dria mai le Atu Filipaina

Mabuhay, Kaibigan!*

Mai se faatalanoaga ma Amie Jane Leavitt

Pe na e moemiti e uiga i le ola ai i se motu? O Alejandria lenei, ae o lona aiga ma uo e valaau o ia o Dria mo se faapuupuuga. E nofo o ia i le motu o Cebu i Filipaina ma lona tina, tama, ma uso e toalua. E i ai foi sona tuagane e matua atu, ae na maliu o ia ae lei fanau mai Dria. “Ou te iloa o loo avea pea o ia o se vaega o lo matou aiga, ma o le a ou vaai ia te ia i se aso ona e faavavau aiga,” o lana tala lea.

O se tasi o mea ou te fiafia e fai o le siva. O au o se tagata siva palei. O le tausaga a sau ou te faamoemoe o le a siitia atu i le isi tulaga, lea e sisiva ai i luga o tamatamaivae. O lona uiga o le a ou faia ni seevae palei faapitoa e fesoasoani ia te au i le siva i luga o o’u tamatamaivae.

O le atu Filipaina e sili atu ma le 7,000 motu, lea o loo i ai le tele o nofoaga matagofie e asiasi i ai. O lo matou fale e latalata i le matafaga, ma ou te fiafia e taalo i le sami. O se tasi o mea ou te fiafia e fai o le aau. Sa ou aoaoina au lava e aau!

Ou te fiafia e o faatasi ma lo’u aiga e asiasi i matafaga eseese. O se tasi taimi na matou o ai i Palawan—o se motu o loo i ai se vaitafe i lalo o le eleele e aupito tele i le lalolagi. Sa ou maulu iina ma au mea aau ma matamata i i’a felanulanua’i.

I se tasi aso i le aoga, na fai mai ai nisi o tamaiti o le vasega e le talitonu Mamona i le Atua. Sa ou fai atu ia i latou tatou te talitonu i ai. O le aso na sosoo ai lea na ou aumaia ai ni kata fepasia’i sa i ai se ata o Iesu i le pito i luma ma mataupu Faavae o le Faatuatua i le pito i tua. Ina ua vaai tamaiti o la’u vasega i le ata ma faitau nisi o o tatou talitonuga, sa latou fiafia e iloa tatou te talitonu i le Atua.

Ou te Fia Vaai i le Malumalu

Ua matou laki i le nonofo latalata i le Malumalu o Cebu City Filipaina. Sa mafai ona matou matamata i le malumalu faatasi ma lo’u aiga, a o le’i faapaiaina. O se nofoaga matagofie, ma le toafilemu. Ou te faafetai ona o malumalu, e mafai ai e lo’u aiga ona faatasia e faavavau.