Afai E Tau Tasi o Outou Mata i Loʼu Mamalu
E nofo Katherine Nelson i Iuta, ISA. O Heidi McConkie e nofo i Delaware, ISA.
E mafai faapefea e le ola tauagafau ai i le gagana, amioga, ma foliga vaaia ona fesoasoani ia i tatou e faasusulu atu le malamalama ma faamamaluina le Atua?
I le Fonotele i le Lagi i le muai olaga, ina ua ofo mai Iesu Keriso e avea ma lo tatou Faaola, na Ia fetalai atu i le Tama, “ia faia Loufinagalo, ma e a oe pea le mamalu e faavavau” (Mose 4:2).
Na faia pea lava i taimi uma e le Alii le faataitaiga o le faamamaluina o le Tama. I le taimi o Lana galuega talai faaletino, e lei faia lava e le Faaola se faatosinaga e gauai atu ai manatu ia te Ia lava ae faasino atu lava Ona soo i le Tama, ma aoao atu, “O le faatuatua ia te au, e le faatuatua mai o ia ia te au, ae ia te ia ua auina mai a’u” (Ioane 12:44). Na aoao mai i tatou e le Faaola i le taua o le tauagafau e ala i uiga faaalia, foliga vaaia, upu, ma galuega.
I la latou tautinoga e mulimuli i le Faaola, o le autalavou matutua i lenei tusiga o loo tomanatu i a latou faaleoina i totonu ma fafo o le tauagafau ma faasoa mai auala na mafai ai e la latou tautinoga e faamamalu le Atua ona mamanuina o latou tagata ma taialaina ai a latou amioga.
Faamamaluina le Atua ma Faasusulu Atu le Malamalama
E sili atu lo tatou malamalama pe faapefea e le tauagafau ona faamamaluina le Atua pe a tatou malamalama po o le a moni le tauagafau. Ua faamatala mai e le Faamaoni i le Faatuatua: “O le tausaafia o se uiga o le lotomaualalo ma le faaaloalo e ala i laei, teuga, gagana, ma amioga. Afai e te tauagafau, e te le manao e tosina mai ni manatu e le talafeagai. Nai lo o lena, e te saili e ‘vivii atu i le Atua i o outou tino ma o outou agaga’ (1 Korinito 6:20).”1
A o tatou aoao e faaalia o le tauagafau e pei ona faia e le Faaola, tatou te talia le Agaga i o tatou olaga, faataunuuina le folafolaga e faapea “afai e tautasi o outou mata i loʼu mamalu, o le a faatumulia o outou tino atoa i le malamalama” (MF&F 88:67). A o e faitauina pe o le a le malamalama o isi talavou matutua i le tauagafau, e mafai ona e mafaufau pe faapefea ona faateleina lou lava malamalama faaleagaga e ala i le faia o ni suiga e faaleleia atili ai lau tautinoga i le loto ma uiga faaalia o le tauagafau.
Ia Tauagafau i le Gagana ma Amioga
“O au upu ma gaoioiga e mafai ona faia se aafiaga silisili mo oe ma isi. Ia faailoa atu oe lava i gagana mama, lelei, ma faagaeetia ma gaoioiga e aumaia ai le fiafia i e o loo siomia oe. O au taumafaiga ia tauagafau ma tausaafia i upu ma galuega, e faateleina ai le taitaiga ma le faamafanafanaga mai le Agaga Paia.”2
Na faamalamalama mai e Dar’ja Sergeevna Shvydko o Volograd, Rusia, faapea tatou te tauagafau i a tatou upu pe a tatou faaaloalo i isi ma faaaoga ai le “leo filemu ma malu le faaleoina o o tatou mafaufauga e aunoa ma le faaaogaina o upu paaa pe le talafeagai.” O le gagana tauagafau e saoloto mai le faitatala, faitioina, tauemuga, ma upu uīgā. E le faatiga ai isi pe faamaualugaina ai le tagata; ae na ona faaalia ai le agalelei atu ma faailoa ai le paia o fanau uma a le Tama Faalelagi.
E tatau foi ona faaalia e a tatou upu e tautala ai le faaaloalo mo le aiga Atua: “Ia aloese mai gagana le mama ma faiga masani o loo faaaogaina ai ma le le faaaloalo e le lalolagi le suafa o le Alii. … O le natura le faaaloalo o na gagana … e faataumaoia ai lo [tatou] mauaina o musumusuga filemu a le Agaga Paia.”3
E pei lava o gagana le tauagafau e pei o le faitatala ma le tauemuina e mafai ona faaleagaina ai sootaga, o le gagana tauagafau e atiina ae se tautinoga loloto atu i le Atua ma, e pei ona faamatalaina e Kelly Prue o Iuta, ISA, e “faateleina lo tatou malosi e fausia ni sootaga lelei ma isi. O la tatou gagana tauagafau e fesoasoani ia i tatou e aumaia ai uiga sili o isi.”
O le tauagafau i le gagana ma le tauagafau i amioga e o faatasi. “E taua le tauagafau i le gagana ma amioga ona o loo faaalia ai po o ai outou ma mea tou te faatauaina,” o le tala lea a Mike Olsen o Iuta. E matauina e tagata pe o a upu ma amioga e le ogatasi. O la tatou gagana e siitia ai isi ma faamamaluina ai le Atua e tatau ona o gatasi ma faatinoga felagolagomai. E ala i galuega o le auauna atu ma le agalelei, tatou te faailoa atu ai la tatou tautinoga e siitia isi ma ava i le Atua e sili atu le loloto nai lo a tatou upu. O a tatou faataitaiga o le avea ma soo i le upu ma galuega e mafai ona avea ma se faatosinaga mo le lelei.
“Ou te matua talisapaia le tauagafau i amioga ma upu,” o le tala lea a Carrie Carlson o Colorado, ISA. “E i ai se mea e matuā matagofie i se tasi e lotomaualalo ma le faia ni mea mo le faamoemoega o le tosina mai o manatu o isi. O i latou o e tautatala atu i le tauagafau e avea ma ipu mamana mo le Alii.”
Ia Tauagafau i Laei ma Foliga Vaaia
“O le tauagafau [i laei] e fesoasoani e faaalia ai lo tatou tagata sili e ala i le fesoasoani ia i tatou e taulai atu i le faaleagaga ae le o le tagata o le lalolagi,” le tala lea a Paul Cace o Iuta. E ala i le faia o laei tauagafau, ua tatou uunaia isi ina ia latou iloa i tatou ma talisapaia i tatou mo a tatou amioga ma uiga nai lo o tatou foliga vaaia.
O le ala tatou te laei ai e le gata ina faailoa atu ai i isi le auala e tatau ona latou taulimaina ai i tatou, ae e aafia ai foi pe faapefea ona tatou vaai ma taulimaina i tatou lava. “Tatou te aoao mai le talalelei, o o tatou tino o se meaalofa mai le Atua,” o le tala lea a Luis Da Cruz Junior o Pasila. “E fesoasoani o tatou tino ia i tatou e alualu ai i luma ma avea ai faapei o lo tatou Tama. O le mafuaaga lea e taua le laei tauagafau. E ala i le faia o lena mea, ua tatou faaali atu i le Atua ma isi o loo i ai lo tatou faaaloalo mo lenei meaalofa ma mo isi.”4
Ua faamatalaina e Carrie, “O laei e le tauagafau ma ua faamoemoeina e faaalia ai le tino faapea o se mea faitino faaletino ua aveese mai se agaga e i ai ni uiga lelei ma uiga tauleleia. O le tauagafau, e ui lava ua tele ai au tupe ua alu i nisi taimi ma e mautinoa lava le tele o taimi, ua fesoasoani ia te a’u ou te iloa ai o lo’u tino o le fale o se agaga faapelepele o i ai le malosiaga faalelagi ma le taunuuga, na fanauina ma tausia e ni Matua Faalelagi. E manaomia ai le tausia ma le faapelepele ma le faaaloalo nai lo le mea e mafai ona tuuina atu e le lalolagi.”
Ua aoao mai le Faamaoni i le Faatuatua: “E le gata i le aloese mai laei e vavala mai ai itutino, ae e tatau foi ona e aloese mai le soona faapapanu o au teuga, laei, ma foliga vaaia. Ia tumama e le aunoa i laei, teuga, ma amioga, ma aua nei fa’inaelo pe manatu faatalale i ai.”5 O le auala o faia ai o tatou ofu ma tuu atu ai i tatou lava, tatou te fesootai atu ai lo tatou faaaloalo mo le Atua, mo i tatou lava, ma mo isi.
Tautino ia Tumau
A o tatou taumafai e mulimuli i tulaga faatonuina o le talalelei o le tauagafau, tatou te faaali atu ai la tatou tautinoga e ala i le tumau, usitaia o poloaiga a le Alii i taimi uma, ae le faapea pe a talafeagai ai.
O le tautinoga moni e masani lava ona mauaa lava i mataupu faavae o le talalelei. Na faamatala e Anthony Roberts o Iuta, “O le Tauagafau o se tulaga o le mafaufau, o se manao e savali i aso taitasi i le malamalama o le talalelei ma le ata o le faaolataga.” A o tatou faatofu i tatou lava i le talalelei, e mafai ona faateleina lo tatou liua ma faateleina lo tatou naunau e ola i mataupu faavae o le talalelei.
Ia Malamalama i Lau Amio Atua
O le faataitai pea lava pea o le tauagafau e fesoasoani ia i tatou e malamalama ma talisapaia ai lo tatou tofi, ma le malamalama o lo tatou natura paia e mafai ona musuia i tatou ina ia sili atu ona tauagafau. Na faamatala e Raffaella Ferrini o Florence, Italia, “O le tauagafau e faamanuiaina lo’u olaga aua e fesoasoani ou te lagonaina ai le pei o se afafine faapitoa o lo’u Tama Faalelagi, ma o lena malamalama, o le a uunaia au ia manao ina ia tauagafau.”
O le faatagaina o le lalolagi e faamalamalama mai po o ai i tatou e mafai ona faaleagaina ai lo tatou naunautai faaletagata lava ia. Na faamatalaina e Julianna Auna o Iuta lona aafiaga: “Ae ou te le’i mauaina se molimau i le mataupu faavae o le tauagafau, sa ou i ai i se nofoaga o le le fiafia ma le le saogalemu faaleagaga. O le tuuina atu i le lalolagi e faamatalaina au o se faanoanoaga ma le faatamaia faaleagaga ona o le faamoemoega a le lalolagi i mea faalelalolagi, ma faaletino e saua ma e faifai pea. O le taimi lava na ou filifili ai e le faalogo i le lalolagi, ma ia tuu atu i lo’u sootaga ma le Atua e faamatalaina au, na faasolo ina sili atu ona faigofie le olaga, sili atu ona saoloto, ma sili atu le fiafia.” Pe a tatou sailia le faamaoniga mai le Tama Faalelagi nai lo le lalolagi, o le a tatou maua le olioli sili atu i le olaga ma se faaosofiaga sili atu ina ia tauagafau.
Ola i se Olaga Tauagafau
“O le tauagafau e faaalia i mea uma tatou te faia: la tatou tautala, o lo tatou foliga vaaia, o a tatou amio, ma e oo lava i nofoaga tatou te asia,” le tala lea a Galina Viktorovna Savchuk o Novosibirsk, Rusia. O le ola tauagafau e vavalalata le fesootaiga i lo tatou tuuto atu i le talalelei ma lo tatou sootaga ma le Atua.
O le tauagafau moni o se tuufaatasiga o amioga ma uiga faaalia. O le galue e faaleleia atili la tatou amioga po o lo tatou manatu o le a fesoasoani ia i tatou e faaleleia atili ai le isi. O le tauagafau i a tatou amio ma foliga vaaia e aunoa ma le atiina ae o se tautinoga mo le olaga atoa e taofia i tatou mai le mauaina o faamanuiaga atoatoa o le ola tauagafau. Ma o le talitonu ia i tatou lava ia oni tagata tauagafau e aunoa ma le mulimuli i a tatou amioga o se faa’ole’ole.6
I le talaaga o le tauagafau, o le fai atu faapea ua tau tasi o tatou mata i le mamalu o le Atua o lona uiga ua tatou tautino e le gata i le vaaiga i fafo a o totonu foi ina ia ola tauagafau. E pei lava o le mata e tatau ona faasaga atu i le Atua, o lo tatou foliga vaaia ma amioga e tatau ona ogatusa ma mataupu faavae o le tauagafau. Ae na o le faasagatonuina o le mata i le Atua e le tau tasi ai i Lona mamalu; e tatau ona taulai atu ia te Ia. E faapena foi, o laei tauagafau ma teuga e tatau ona o faatasi ma se vaaiga o mataupu faavae e faavavau.
A o tatou tausia poloaiga a le Atua, o le a sili atu ona faigofie ona tatou taulai atu o tatou mafaufau ia te Ia. E faapena foi, a o tatou taulai atu o tatou mafaufau i le Atua, o le a sili atu ona faigofie ona tatou usiusitai ia te Ia.
A o tatou taumafai e ola tauagafau, o le a tatou lagonaina le uunaiga a le Agaga ua faateleina i o tatou olaga. Na aoao mai e Elder Robert D. Hales o le Korama a Aposetolo e Toasefululua: “O le tauagafau e taua i le agavaa ai mo le Agaga. O le tauagafau o le lotomaulalo foi lea, ma o le lotomaulalo e valaaulia ai le Agaga e faatasi ma i tatou.”7 O le taialaina e le Agaga o o tatou manatu ma amioga, o le a mafai ai ona tau tasi o tatou mata i le mamalu o le Atua ma o le a faatumuina i tatou i le malamalama.