Faatalitali mo le La Oso

Julia Wagner, Ohaio, ISA

O ataata na faatumulia ai le potu i le pouliuli a o ou taotooto ma le mataala ma faalogologo atu i lo’u toalua o loo manava, ma taumafai e mafaufau po o moe o ia. Faatoa atoa le lua aso talu ona mavae le maliu o le ma afafine e 12 tausaga le matua mai se faalavelave faafuasei matautia. Na toe moeiini ou mata, ae na taumamao le moe mai ia te au. Sa faanaunau atu lo’u loto mo la’u tama teine. Sa le mafai e le malamalama o le ata o le faaolataga ona faamama le tiga o le misia o ia.

A o latalata mai le tafa o ata, sa ou lagonaina se faanaunauga faafuasei, ma le malosi. Ua toeitiiti oso le la, ma i lo’u mafaufau sa ou vaaia i le lagi ua faaofuina i le malamalama lanu piniki vaivai. Sa fiafia le ma tama teine i le lanu piniki. O se la oso lanu piniki o se mea lea e tasi na ou manaomia e toe lagonaina ai le latalata atu ia te ia.

“Sei ta o e matamata i le la oso,” sa ou musumusu atu ai i lo’u toalua fiamoe.

Na ma tutu i le auala taavale, faasaga atu i sasae, ma faatalitali… ma faatalitali. E ui ina sa faamalamalamaina le lagi, sa lei oso mai le la i le va o ao maualalalo.

Sa ou faalagolago lo’u ulu i luga o le tauau o lo’u toalua ma mapuea, ma taumafai e faafoliga e le afaina. Ae sa ou manao i se mea e sili atu. Ou te manaomia se mea e sili atu. E mautinoa lava e mafai e le Tama Faalelagi ona tuu mai ia te au lenei manao ina ua uma ona toe aveina atu la ma teine aulelei i le aiga ia te Ia.

A o liliu atu lo’u toalua e alu i totonu, na vaavaai i tua atu o i maua agai atu i le itu i sisifo, sa ia fai mai, “Vaai!”

Sa ou faliu i tua. I tua atu o i maua sa faatumulia le lagi i ao lanu piniki vaivai, ma se malamalama lanu auro o loo siomia ai. Sa ou tau manava, ma amata ona ou tagi. Sa sili atu ona matagofie nai lo le mea sa ou mafaufauina. Sa pei o se opo mai lo ma afafine. Sa ou iloaina na silafia lo’u Tama Faalelagi lou loto tiga ma sa auina mai se folafolaga o le faamoemoe mo le lumanai—o se faamanatu mālū o aiga e faavavau ma taimi matagofie uma lava o le a oo mai.

Ou te mafaufau soo i lena lava taimi matagofie ma se vaaiga fou na ia tuuina mai ia te au. O ai e vaai mo se la oso i le itu i sisifo? Ae ui i lea o iina sa faatalitali mai ai la’u vavega. E fia ni faamanuiaga ma vavega ua ou misia ona ua latou oo mai i nofoaga e le’i faamoemoeina? Pe faafia ona ou taulai atu i mea ou te manatu e tatau ona i ai ae misia ai le mamalu o le mea lea?

Sa ma tatalo pea mo se vavega sa faafitia, ae ina ua ou tilotilo solo i la’u vaaiga fou, sa ou vaaia le vavega o ola e fa na faaleleia e ala i le foai atu o totoga o le ma tama teine, o le vavega o le alofa faaleaiga ma le lotogatasi o le uarota, le vavega o le auauna atu. Sa ou lagonaina le faanoanoa maoae, ae sa ou lagonaina foi se faamoemoe malosi ua faatumulia lo’u agaga i piniki taitasi o le la oso, o lagoto mumu taitasi, ma fugalaau lanu piniki taitasi e faasalaveia lou ala.

O lenei la a oso a’e le la, ou te vaavaai i sasae ona liliu lea e vaavaai i sisifo. Ou te ataata ma le malamalama o loo i ai pea lava pea vavega ma faamanuiaga e tatau ona maua—ma o le la o le a oso pea lava tulai i luga o o tatou faanoanoaga pe afai tatou te tuu atu i ai.