Saunia e Auauna Atu,Auauna Atu e Saunia ai
Na tuuina atu e le Atua ia te oe le Perisitua Arona ona e i ai Sana galuega mo oe—i le taimi nei ma le lumanai.
Ata na tusia e Taia Morley
O Jonathan o sau uo o le na auai i le Ekalesia i le fa tausaga ua mavae. E na o ia lava le tagata o le Ekalesia i lona aiga. Ina ua uma ona ia maua le Perisitua Arona, sa amata ona ia auauna atu i isi i se auaunaga na te lei faia lava muamua. Na iloa e Jonathan o le auauna atu, sa tele ni mea na manaomia ona ia aoaoina. Sa ia manao foi ina ia agavaa ma atili faamoemoeina, o lea sa ia suesue ai i le talalelei, tatalo, ma auai i sauniga o le Aso Sa ma le seminare. Sa ia galue malosi i le tausiga o poloaiga ma tulaga faatonuina o le Ekalesia. Na ia faataunuuina ma le filiga ona tiute faaleperisitua, e aofia ai le avea ma faiaoga maoae o aiga. Na fesoasoani lana tusi o le Tiute i le Atua ia ona malamalama i na tiute ma aoao ai i le auala e faataunuuina ai.
O le auaunaga faamaoni faaleperisitua a Jonathan na tuuina atu ai ia te ia le malosi faaleagaga. Na fesoasoani e puipuia o ia mai faatosinaga amioleaga. Sa ia tuputupu ae maoae ao ia auauna atu ma saunia mo lona lumanai. O le tausaga lea ua tea, sa ia maua ai ma le agavaa le Perisitua Mekisateko ma faaeega paia o le malumalu. O loo ia auauna atu i le taimi nei i se misiona i Pasila.
E masani lava ona taua le Perisitua Arona o le “perisitua faasauniuni.” Na tuuina atu e le Atua ia te oe le Perisitua Arona ona e i ai Sana galuega mo oe—i le taimi nei ma le lumanai. O lau auaunaga faamaoni i le Perisitua Arona e saunia oe mo nisi avanoa sili ona maoae e auauna atu ai i tausaga o le a oo mai. Faapei o Jonathan, o loo e sauniuni ia “maua le Perisitua Mekisateko, e maua ai faamanuiaga o le malumalu, e faia ai se misiona talai, e avea ma se tane ma se tama alofa, ma faaauau pea ona auauna i le Alii i le olaga atoa” (Faamaoni i le Faatuatua: O Se Tusitaiala o le Talalelei [2004], 139).
Atonu e le iloaina mea uma o faamatalaga auiliili o avanoa matagofie ua faapolopolo mo oe e le Tama Faalelagi, ae ou te talitonu o le a e saunia e faafetaiai i latou pe a e manatuaina e faia mea nei o se tasi o umia le Perisitua Arona.
Mulimuli ia Iesu Keriso
I le avea ai ma se tasi o umia le perisitua, o oe o se sui o Iesu Keriso. O lona uiga ua fai atu ia te oe ia mulimuli ia te Ia ma faia mea Na te faia. O le a se mea Na te faia? I soo se tulaga lava, Na te tuuto atu Lona ola e auauna atu ai ma faamanuia i isi. E tatau foi la ia te oe. Tuu atu oe lava e auauna atu i isi—ma ia tuputupu ae ma alualu i luma ina ia sili atu lou tuuina atu o oe lava! Manatua le ala na tuputupu ae ai Iesu i Lona talavou: Na ia “tupu le poto ma le tino, ua alofagia o ia e le Atua atoa ma tagata” (Luka 2:52).
O se vaega o le mulimuli i le Faaola o le atamai lea ma ola maloloina faaletino i lou talavou. O lenei mea e manaomia ai lou galue malosi ma faia e le aunoa le mea sili e te mafaia (tagai MF&F 4:2). O le a fiafia le Atua ia te oe ao e faalatalata atu ia te Ia e ala i le tatalo i aso uma, suesue i le talalelei, usiusitai, ma auauna atu. O le a fiafia isi ia te oe ao e agalelei atu ma faamaoni i lou aiga ma avea ma uo faaKeriso i tagata uma.
Ia manatua sa faataunuuina e le aunoa e Iesu le finagalo o le Tama. E te mulimuli ia Keriso pe a e sailia le finagalo o le Atua i le aluga o le aso e taialaina ai lau auaunaga ma galue i uunaiga faaleagaga na e mauaina.
Faatautaia o Sauniga o le Perisitua
O sauniga o le perisitua e manaomia mo fanau uma a le Atua ma e faamanuia tutusa ai Ona atalii ma afafine. Mai lava i le taimi sa avea ai oe ma se tiakono, sa e fesoasoani e faatautaia se sauniga o le perisitua e ala i le tufaina o le faamanatuga. O le a faaauau pea ona e faatautaia ia sauniga o le perisitua i le Perisitua Arona i se taimi mulimuli ane ao e saunia ma faamanuia le faamanatuga, papatiso, ma auai i le faauuina o isi o umia le Perisitua Arona.
Ina ia auai i sauniga paia, e tatau ona e mama. E mafai ona faaopoopo se mana sili faaleagaga o la outou amio mama i sauniga na e faatautaia. Taumafai ina ia agavaa i soo se auala e tauaaoina ai ipu paia o le faamanatuga a le Alii (tagai MF&F 38:42). A e faia, e mafai ona e tu atu i luma o lau uarota po o paranesi o se sui moni o Iesu Keriso. O le a faamanuiaina i latou i lou naunautaiga e tausia feagaiga o loo e fesoasoani ia i latou e faafou.
Auauna Atu i Taimi Uma
I le avea ai ma se tasi e umia le Perisitua Arona, e te auauna atu. Saili avanoa i taimi uma e auauna atu ai i lou aiga, uo, uso o le korama, ma isi. O mea uma lava e te faia i le perisitua o le a fesoasoani ia te oe e auauna atu ai i isi i le faaletino ma le faaleagaga. Mo se faataitaiga, afai e te fesoasoani i la outou epikopo po o le peresitene o le paranesi e ala i le auauna atu i se aiga o e faiaoga o aiga ai, o loo e aoaoina le auala e iloa ma taulima ai manaoga o isi. O le a e auauna atu foi i isi ao e aapa atu e faamalosia uso o lau korama ma laveai mai i latou ua le o toe toaaga mai, aoina ia taulaga anapogi e fesoasoani ai i tagata matitiva ma le tagolima, faia ni galuega faatino mo e mamai ma le atoatoa le malosi, aoao ma molimau atu ia Keriso ma Lana talalelei, ma faamama ia avega o e ua lotovaivai.
E te auauna atu ao e aoao atu ia lesona i sauniga o lau korama ma a outou afiafi faaleaiga. E te auauna atu ao e valaaulia tagata uma e o mai ia Keriso (tagai MF&F 50:29)—i le aiga, i lau korama, i le aoga, ma faifeautalai faamisiona, ma soo se nofoaga lava e te i ai.
Lou Lumanai
Talanoa ma ou matua po o faufautua i mea o le a e manaomia i ou matafaioi i le lumanai o se umia le Perisitua Mekisateko, faifeautalai, tane, ma tamā. Tusi i le avanoa o loo i ai nisi o na tiutetauave sili ma le auala e mafai ona e saunia ai mo na tiutetauave i lenei vaitaimi ao e auauna atu i le Perisitua Arona. Atonu e foliga lofituina i le taimi nei, ae ia manatua o le auala sili e saunia ai o le faia lea o le mea o finagalo mai le Tama Faalelagi ia e faia i le taimi nei. Tau ina ia e maua le fiafia ao e auauna atu i le taimi nei ma saunia ai mo lou lumanai faamamaluina.