O Perofeta o le Feagaiga Tuai

Mose

“Oka se maoae o Mose, e oo lava ia Keriso o loo faamatalaina i le avea ai ma se Perofeta e pei o lenei taitai anamua o le au a Isaraelu.”¹—Elder Bruce R. McConkie (1915–85) o le Korama a Aposetolo e Toasefululua

Na ou fanau i Aikupito i le taimi sa nofopologa ai loʼu nuu, le aiga o Isaraelu. Ona o le fefe i le anoano o pologa Isaraelu, sa faatonuina e Farao alii uma o Isaraelu ia fasiotia pe a fananau mai. Ina ia puipuia au, na natia au e lo’u tina mo le tolu masina talu lo’u fanau mai a o lei tuuina au i totonu o se ato i le va o vao utuutu i le Naila. Na maua au e le afafine o Farao ma tausia au o sana lava tama tama.²

Ina ua faasolo ina ou matua, sa ou tuua Aikupito ae nofo i le laueleele o Mitiana. O iina sa fiafia ai Ietero ia te au, o se leoleo mamoe ma o se ositaulaga, ma faaipoipo ai i lona afafine o Sepora. Mai i a Ietero, sa ou maua ai le Perisitua Mekisateko.³

I se tasi aso a o ou tausia le lafu a Ietero, sa faaali mai le Alii ia te au i se laau talatala na mumu ma valaauina au e faasaolotoina le fanauga a Isaraelu mai le nofopologa.⁴

Sa ou toe foi atu i Aikupito ma ta’u atu ia Farao ia faasaoloto le nuu o le Alii, ae nai lo lena na ia faateleina a latou avega. Na auina atu e le Alii se faasologa o mala i tagata o Aikupito, ae na faamaaa e Farao lona loto ma sa musu pea e faasaoloto le aiga o Isaraelu. O le mala mulimuli o se agelu o le faafanoga lea na fasiotia atalii ulumatua o aiga uma o Aikupito. Na puipuia le aiga o Isaraelu mai le agelu o le faafanoga e ala i le sausauina o le toto o le tamai mamoe mama i luga o a latou laau faalava o le faitotoa ma ia nonofo i totonu o le fale. Na ala mai ia te au, ona faavaeina e le Alii le Taumafataga o le Paseka o se sauniga e fesoasoani ai i le aiga o Isaraelu ia manatua lenei vavega i tausaga taitasi.⁵

O lenei mala mulimuli na mafua ai ona lotomalie Farao ma faasaoloto le aiga o Isaraelu. Ae o Farao na mulimuli ane faamaaa lona loto ma auina atu ana autau e tuliloa le aiga o Isaraelu. Sa faamanuiaina au e le Alii i le mana e vaeluaina ai le Sami Ulaula, ma matou sosola ese ai i luga o le laueleele matutu a o faalolovaia e le sami le autau a Farao.⁶

Ona taitaiina lea e le Alii i matou i le vao i se ao i le ao ae o se afi faaniutu i le po. Sa ia tausia i matou i le vai, manai, ma salu.⁷

Sa ou aea le Mauga o Sinai, lea na ou nofo ai mo aso e 40 ma maua ai Tulafono e Sefulu mai le Alii. Ina ua ou toe foi mai le mauga, ua liliu ese le fanauga a Isaraelu mai le Atua ma fausia se tamai povi auro e tapuai i ai. Sa le toe agavaa i latou mo le mauaina o le tulafono na tuuina mai e le Atua ia te au, o lea na ou ta’eia ai papamaa o loo i ai. Sa ou toe foi atu i le mauga, lea na tuu mai ai e le Alii le tulafono maualalo ua taua i lo’u igoa—o le tulafono a Mose.⁸

I le vao na faaalia mai ai e le Alii ia te au le fuafuaga e fausia se tapeneko, po o se malumalu feaveai. Sa matou tauaveina le tapeneko faatasi ma i matou i a matou faigamalaga ina ia mafai ona matou tapuai ai. I le tapeneko, na maua ai e tagata sauniga ma na ou talanoa ai i le Alii “fesagai lava, faapei o le tagata ona tautalatala ma lana uo.”⁹ Na faasino mai foi e le Alii ia te au pe faapefea ona fausia le atolaau o le feagaiga, se vaega paia e teuina i le vaega aupito sili ona paia o le tapeneko, o le Paia o Paia.¹⁰

Ina ua auina mai e le Alii “gata uogo” e aoai ai le fanauga a Isaraelu, na poloaiina au e fai se gata apamemea ma sii i luga maualuga i se pou ina ia mafai e i latou uma o e sa utia e gata uogo, ona vaavaai atu i ai ma faamaloloina ai. Ae ona o lo latou faamaualuga ma le faigofie o le galuega, o le toatele na lē mafai ona vaai ma na iu ina fano ai.¹¹

Sa faia e le Alii le fanauga a Isaraelu ina ia feoai solo i le vao mo le 40 tausaga a o le’i faatagaina i latou e ulu atu i le laueleele na folafolaina.¹² Ou te lei ulufale atu ae sa “aveina ae e le Agaga” i le Alii.¹³

Faamatalaga

1. Bruce R. McConkie, Mormon Doctrine, lom. lona 2. (1966), 515; tagai foi i le Teuteronome 18:15–19.

2. Tagai i le Esoto 1; 2:1–10.

3. Tagai i le Esoto 2:11–22; Mataupu Faavae ma Feagaiga 84:6.

4. Tagai i le Esoto 3; 4:1–17.

5. Tagai i le Esoto 5–12; Esekielu 45:21.

6. Tagai Esoto 14 .

7. Tagai i le Esoto 13:21–22; 15: 22–27; 16; 17:1–7.

8. Tagai i le Esoto 24:18; 31: 18; 32; 34.

9. Esoto 33:11.

10. Tagai i le Esoto 25–29; 40: 21.

11. Tagai i le Numera 21: 6–9; 1 Nifae 17:41; Alema 33:19–20.

12. Tagai i le Numera 14:33–34.

13. Alema 45:19.

Pusa o Mea Moni: Mose

Tusitusiga a Mose: E faaopoopo atu i le tusi a Mose i le Penina Tau Tele, na tusia e Mose tusi muamua e lima i le Tusi Paia: Kenese, Esoto, Levitiko, Numera, ma le Teuteronome.

Matafaioi o le muai olaga: filifilia e pulefaamalumalu i se tisipenisione (tagai i le Aperaamo 3:22–23)

Matafaioi o le olaga nei: na taitaia le fanauga a Isaraelu mai Aikupito; maua le tulafono i luga o le Mauga o Sinai (tagai i le Esoto 12; 20)

Matafaioi pe a mavae le olaga faitino: na faaali mai i luga o le Mauga o Liua, tuuina atu ki o le perisitua i a Peteru, Iakopo ma Ioane (tagai i le Taiala i Tusitusiga paia, “Liua,” scriptures.lds.org); na faaali mai i le Malumalu o Katelani i Ohaio, ISA, i le aso 3 o Aperila, 1836, toefuatai mai ki o le faapotopotoina o Isaraelu ia Iosefa Samita (tagai i le MF&F 110:11)