O Le Mana e Faamanuia ai Tagata Uma

O taitai o le Ekalesia ua aoaoina i tatou faapea o sauniga o le perisitua ma feagaiga o loo avanoa mo fanau uma a le Atua—alii ma tamaitai.

Ata na tusia e Gail Armstrong

“O le perisitua o le mana ma le pule a le Atua ua tuuina mai mo le olataga ma faamanuiaga o tagata uma—alii, tamaitai ma tamaiti. …

“E i ai faamanuiaga faapitoa mai le Atua mo tagata agavaa uma o e ua papatiso, maua le Agaga Paia, ma aai ma feinu soo i le faamanatuga. Ua aumaia e le malumalu se malamalama ma le malosi faaopoopo, faatasi ai ma le folafolaga o le ola e faavavau [tagai MF&F 138:37, 51].”

Elder Neil L. Andersen o le Korama a Aposetolo e Toasefululua, “Mana o le Perisitua,” Liahona, Nov. 2013, 92.

“Ua tuuina mai e sauniga ma feagaiga o le perisitua le avanoa tatou te mauaina ai le atoaga o faamanuiaga na folafola mai ia i tatou e le Atua, lea ua mafai ona o le Togiola a le Faaola. Latou te faaauupegaina atalii ma afafine o le Atua i le mana, ma tuuina mai ia i tatou le avanoa e maua ai le ola e faavavau—ina ia toe foi atu i le afioaga o le Atua ma nonofo faatasi ma Ia i Lona aiga e faavavau.”

Carole M. Stephens, fesoasoani muamua i le au peresitene aoao o Le Aualofa, “Pe o Tatou Iloa ea Mea ua Tatou Maua?” Liahona, Nov. 2013, 12.

“E taua tele mo i tatou le malamalama ua uma ona saunia e le Tama Faalelagi se auala mo Ona atalii ma Ona afafine uma e maua ai faamanuiaga ma faamalosia ai e le mana o le perisitua. E totonugalemu i le fuafuaga a le Atua mo Ana fanau agaga Lana lava tautinoga: ‘O la’u galuega ma lo’u mamalu lenei—ia aumaia le tino ola pea ma le ola faavavau o le tagata’ (Mose 1:39).”

Elder M. Russell Ballard o le Korama a Aposetolo e Toasefululua, “O La’u Galuega ma Lo’u Mamalu Lenei,” Liahona, Me 2013, 19.