Fesili & Tali

“O le a se mea e tatau ona ou faia pe a aliae mai se mataupu i le aoga e le tusa ai ma aoaoga a le ekalesia, e pei o le faapau pepe?”

E tele auala e tali ai—pe leai—e faalagolago i le tulaga. Muamua, mafaufau e uiga i le mea e tupu pe afai e te tali po o le aua nei faia se upu. Afai o lou filemu o le a mafua ai ona mafaufau isi ua e ioe i se mea e te iloa e sese, atonu e te manao e sue se auala faigofie e faailoa atu ai lou le taliaina. Afai e te manatu o ou manatu ua na o se mafuaaga o finauga, ona e mafai lea ona sue se isi taimi e talanoa ai. Ae ui i lea, afai e faaaloalo le tasi i le isi i lau vasega ma o lo o fesili mai le faiaoga mo le auai atu, e mafai ona e tatalo mo le musumusuga ona faamalamalama atu lea o ou talitonuga.

E mafai foi ona e saunia muamua pe afai e te iloa o le a talanoaina e lau vasega autu patino. E le gata i tusitusiga paia ma lauga o konafesi i le autu, vaavaai i Faamaoni i le Faatuatua, o Mataupu Faavae o le Talalelei, po o le Mo le Malosi o le Autalavou. E mafai foi ona e faataitai le faamalamalamaina o le autu i le afiafi faaleaiga. Pe a e sauni, talanoa i lou faiaoga po o tamaiti o lau vasega.

O le ala e te tali atu ai e taua e pei o mea e te fai atu. Ia faaaloalo ma taumafai e aua le faaaogaina o faaupuga a le Ekalesia. O tamaiti o lau vasega o le a le malamalama i le taimi lava e te fai atu ai, “Sa aoaoina au e se faufautua o Tamaitai Talavou i la’u uarota faapea …”

O le mea e sili ona taua e mo oe ia iloa le mea o loo aoao mai e le Ekalesia ma le mea o loo tau atu e le Agaga Paia ina ia le faaseseina oe e ala i mea sese e mafai ona e faalogo pe faitau i ai i le vasega.

Faasa’o le Aoaoga Faavae Sese

Tatou te auai i se Ekalesia e mafaufau-faafaifeautalai lea e valaauina uma ai i tatou e talai atu; o le mea lea, e le mafai ona tatou faatagaina aoaoga faavae sese e faasalalauina atu ai. I ia tulaga, e tatau ona tatou tau atu ina ia faasa’o ai soo se aoaoga faavae sese ma fesoasoani i tagata ia malamalama i le vaaiga a le talalelei toefuataiina i le mataupu.

David M., 16 tausaga, Kasaï-Occidental Itumalo, Ripapelika Temokarasi o Congo

Ia Faaaloalo

Ou te lagona e tatau ona ou faasoa atu ou manatu i se auala faaaloalo ma ta’u atu foi pe aisea ou te talitonu ai i ai. Ou te le manatu e tatau ona ou faia isi ia latou iloa ou manatu, ae ou te manatu e tatau ona latou iloa le itu o loo ou tu ai ini autu faapitoa ma malamalama i o’u manatu.

Sabrina S., 16 tausaga, Oregon, ISA

Ia Faaaloalo

E taua le faalogo mai o isi ia i tatou, ae e matuai taua foi le faaaloalo i talitonuga o isi. Aua le finau. O le finau e faatupuina ai fili ma le le mautonu. Afai e tulai mai se manatu e le tusa ai ma la tatou tapuaiga, ia tumau le toafilemu, mataala, ma faaaloalo, ma aua nei galo e faalogo i le Agaga. E i ai mea tatou te le malamalama ai ae malamalama ai le Atua. E tatau ona tatou faalogo ma aoao mai Lona Agaga.

Hannah M., 18 tausaga, Iuta, ISA

Faasoa Atu Mea o loo Aoao Atu e le Ekalesia

Ou te taumafai e tali ia fesili i le mea sili ou te mafaia aua e le iloa e a’u uo ma faiaoga, sei vagana ua ou tau atu ia i latou, po o le a le tulaga o le Ekalesia i lena autu. O le faia o lena mea, e mafai ona latou iloa ai mo le fesootaiga i le lumanai, ma o le a e manuia faaleagaga. Manatua, “Ia pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi” (Mataio 5:16).

Joshua M., 16 tausaga, Maniseta, Egelani

Fesoasoani i Isi ia Mafaufau e uiga i le Mea e Sa’o

Faasoa atu ou lagona ma le faamaoni. O le tele o autu i le aoga, e pei o le faapau pepe, e matuā finauina lava, o lea, aua le maasiasi e ta’u atu. O se avanoa lelei e faasoa atu ai le talalelei ma tulaga faatonuina tatou te talitonu i ai. Afai e faasoa atu ou talitonuga, e mafai ona e fesoasoani i tagata ia mafaufau e uiga i le mea e sa’o.

Madison R., 14 tausaga, Karolaina i Matu

Ia Manatua Po o Ai o loo E Sui ai

Pe a feagai ai ma nei tulaga, taumafai e manatua atonu o isi e le mafai ona faasoa mai lagona e tutusa ma oe i le mataupu. Aua le soona mateletele pe faamalosi atu, ae aua le fefe e puipui ou talitonuga. Ia manatua, o loo e fai ma sui o Keriso.

Madeline K., 16 tausaga, Wyoming, ISA

Iloa le Tulaga o le Ekalesia

Sa ou i ai i se aoaoga sa masani ona talanoaina ai ni autu e feteenai. O le mea muamua lava e fai o le faaaloalo i talitonuga o isi, e pei ona e faamoemoeina mai au uo i le vasega. Afai o le autu e matuai feteenai lava ma le Ekalesia, ia lagonaina le saolotoga e ta’u atu lou manatu. E le tau ta’ua fua le Ekalesia i lau tali. E ui i lea, ia mautinoa ia iloa le tulaga o le Ekalesia i nei mea.

Joseph Z., 18 tausaga, Maryland, ISA

Aloese i Finauga

Ou te faamatala atu lou manatu, ma puipuia a’u mataupu ma aoaoga faavae o le Ekalesia, ma faaaloalo i manatu o isi. O le a ou le finauvale, lea o le a tuliese ai le Agaga, lea e mafai ona uunaia isi i se auala lelei.

Daiana V., 15 tausaga, Buenos Aires, Atenitina

O tali ua faamoemoe e mo se fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

Tu Mausali

“O la tatou matafaioi o le tau atu lea o lo tatou tulaga e ala i faamatalaga, faatauanau faaleuo, ma mea moni. O la tatou matafaioi o le tutu mausali ma le le mafaagaeetia i mataupu lelei o le aso ma mataupu faavae e faavavau o le talalelei, ae ia aua nei finau ma se tagata po o se faalapotopotoga. O finauga e fausia ai puipui ma ati ai papupuni. O le alofa e matala ai faitotoa.”

Elder Marvin J. Ashton (1915–94) o le Korama a Aposetolo e Toasefululua, “Leai se Taimi mo Finauga,” Ensign, Me 1978, 8.

Fesili o le a Sosoo Mai

“E mafai faapefea ona ou lagona le mafanafana e talanoa atu ai i lo’u epikopo e uiga i faafitauli po o ni atugaluga?”

Auina mai lau tali ma, afai e manaomia, se ata manino lelei ae lei oo i le aso 15 o Me, 2014, i [e-mail] pe i-meli mai (tagai i le tuatusi i le itulau e 3).

E ono faapupuuina tali mo le uumi po o le manino.

O le faamatalaga ma le faatagaga o loo i lalo e tatau ona aofia mai i lau i-meli po o le tusi: (1) igoa atoa, (2) aso fanau, (3) uarota po o le paranesi, (4) siteki po o le itu, (5) lau faatagaga tusitusia, ma, afai e itiiti ifo i le 18 ou tausaga, o le faatagaga tusitusia a ou matua (e talia foi le i-meli) e lolomiina ai lau tali ma lou ata.