Sa Tele ni Mea Ou te Faasoa Atua

Brent Fisher, Kalefonia, ISA

Sa ou mafaufau lava i taimi uma o le sauniuniga mo faalavelave faafuasei i le tulaga o le tausia o au lava ia ma lo’u aiga. Ae sa ou aoaoina e vaai i le sauniuniga i se auala ese i se tasi taeao o le Aso Sa i Florida i saute i le 1992. O le Afa o Andrew, o se tasi o afa aupito sili ona faataumaoi ma taugata na taia ai le Iunaite Setete, na faatamaia ai se taumafanafana matagofie i Miami, Florida.

Sa ou nofo na o au mo sina taimi i se fale mautotogi i le matafaga, ma auai i se polokalama o aoaoga faamasani mo le tolu masina mo la’u galuega. Ina ua oo mai le lapataiga o le afa ma sa ou iloa ai e manaomia ona matou o ese mai lo matou fale mautotogi i le aoauli, ua uma ona taofia e se paaga ni potu i le faletalimalo i se itulagi tutotonu mo au ma la matou au-faigaluega. Sa ou puipuia ou faamalama ma teuina a’u meatotino faaletagata lava ia.

I le naunautaiga mo se asiasiga mai lo’u toalua ma la’u fanau mo se vaiaso atoa, na ou faatauina mai ai talu ai nei ni meaai ma vai mo lo’u aiga e toaono. Sa faamafanafanaina au i le iloaina sa ou maua se nofoaga saogalemu e alu i ai ma ua lava ni meaai e ave mo le tele o vaiaso.

A o ou sauni e tuua le fale i le 10:30 i le taeao, sa ou mauaina se lagona lelei—ua lelei mea uma. Sa ou tootuli i le tatalo, faafetai atu i le Tama Faalelagi mo ou faamanuiaga ma ole atu mo Lana fesoasoani i le taimi o le afa o le a oo mai. A o faaiuina la’u tatalo, na musuia au e le Agaga e fai atu, “Afai e i ai soo se tasi e manaomia le fesoasoani, faamolemole fesoasoani mai ia te au ina ia ou maua o ia.”

I ni nai minute, na tuitui mai ai se tina ua oti lana tane ua 80 tausaga i lo’u faitotoa. “Ou te faamalie atu,” o lana tala lea. “Ua sese lou potu. O loo ou sailia se uo.”

Sa le mautonu lana pupula. Ina ua ou fesili pe mafai ona ou fesoasoani, sa amata ona popole o ia ma faapea mai na te le’i iloaina le mea e fai po o fea foi e alu i ai. Sa ou fesili ia te ia po o fea e nofo ai, ma ma savavali faatasi atu i lona fale mautotogi, iloilo lona tulaga, ma vaavaai i mea na te ono faia.

Sa ou fai atu ia te ia atonu e maua e la’u kamupani ae avanoa i se tasi o o matou potu i le faletalimalo, ma sa ou valaaulia o ia e faatasi mai ma la matou vaega. Sa mapuea o ia i le fiafia. Sa faavave ona matou tapenaina ma puipui lona fale mautotogi ma meatotino, ma sa ou fuafuaina se paaga e aveina lana taavale i le faletalimalo.

A o ou sauni e tuua le fale, na fesili mai nisi fafine se lua ua maliliu a la tane mo se fesoasoani. Sa ou fesoasoani ia i latou ia toafilemu ina ia mafai ona latou mafaufau manino ma fuafua po o fea e maua ai le sulufaiga. Ina ua ou aumaia au atopau mai se tasi o a’u paaga o le galuega, na fesili mai se isi fafine matua ua oti lana tane mo se fesoasoani. Sa matou tuuina ana aitema maaleale i ni eria saogalemu ma fesoasoani ia te ia e saunia ai e tuua le fale.

I le taimi lea, na valaaulia e isi paaga o le galuega ni tamaiti aoga se toalua o le kolisi o e sa nonofo i se motu e nonofo faatasi ma la matou vaega i le faletalimalo e i totonu o le motu. E pau meaai na latou maua o se luuga o meaai mamā ma se kuata (.95 L) o le vai mama. O le mea e lelei ai, sa i ai ia te au ni mea se tele e faasoa atu, e le gata ia i latou ae faapea foi ma isi tagata uma lava.

O se faamanuiaga lava le saunia ma le taitaia e le Alii. O lena mea na mafai ai ona ou tuuina atu ai se faatosinaga toafimalie i se taimi o le popole, ma faaalu toetoe lava o lo’u taimi atoa e fesoasoani atu ai i isi e aunoa ma le popole i a te au lava ia. Sa ou mauaina se tulaga fou o le agaga faafetai mo le fautuaga mai o tatou taitai perisitua ina ia saunia.