O Le Aumaia o Faamanuiaga o le Perisitua i Totonu o Lou Aiga
Pe a e tausia au feagaiga, ua e aumaia le mana o le perisitua e faamanuia ai lou aiga ma le auaiga.
Ata na tusia e Sudi McCollum
E mafai faapefea e oe o se alii talavou po o se tamaitai talavou, e tusa lava po o le a le tulaga o lou aiga, ona faalagolago i le mana o feagaiga na e osia i le papatisoga e faamalosia ai lou aiga ma le auaiga? O le malamalama i le matafaioi ma le taua o o tatou aiga i le fuafuaga a le Alii e mafai ona musuia ai i tatou e faamamaluina folafolaga na tatou faia e ala i le vaaia o tatou faia la tatou auaunaga sili ona lelei ma sili ona sagisagi fiafia i ai i totonu o o tatou lava aiga. Sei o tatou vaai i nisi o auala tatou te faalagolago ai i le mana o a tatou feagaiga e faamalolosia ma auauna atu ai ia i latou o e e sili ona taua ia i tatou.
O Le a Faapefea ona E Tali Atu?
O le po o Aso Gafua, ma e i ai sau faaputuga o meaaoga. Ua e faalogo atu i lou tama ua valaau le aiga e faapotopoto mai mo le afiafi faaleaiga. O le a se mea e te faia?
Filifiliga A: E tali atu, “Se, Tama, e leai sou taimi mo lena mea i le po nei! E tatau ona ou suesue!”
Filifiliga E: E vave lava ona e fesoasoani e faapotopoto nai ou tei ma auai ma le fiafia i tatalo, musika, ma savali.
Pe a i Ai le Taitaiga o le Perisitua i le Aiga
Lagolagoina o ou matua e ala i le naunau e auai i afiafi faaleaiga, tatalo faaleaiga, ma le suesuega i tusitusiga paia o nisi o auala e faamalolosia ai le taitaiga faaleperisitua i lou aiga. E tele isi auala, e pei o le:
-
Tatalo mo ou matua. (E mautinoa lava toetoe a tatalo i laua mo outou i aso taitasi.)
-
Lagolago ou matua i o laua valaauga i le Ekalesia ma ofo atu e fesoasoani i le fale, ae maise lava pe afai ua pisi i laua i tofiga faapitoa.
-
Fesoasoani i ou matua e faafeiloai faiaoga o aiga pe a la o mai, ona faalogo lea ma le faaaloalo i le la savali.
-
Afai e i ai se malumalu i lo outou eria, ofo atu e te tausitama i ou tei laiti ina ia mafai e ou matua ona o i le malumalu ma auai i sauniga o le perisitua.
Ia manatua e le o na o matua e nafa ma le valaauliaina ma le faatumauina o le Agaga i lou aiga. E tele mea e mafai ona e faia e valaaulia ai le Agaga e ala i au amioga ma uiga faaalia. Pe o loo e faia lau vaega ina ia valaaulia le uunaiga a le Agaga i lou aiga?
Pe a Leai Se Taitaiga Faaleperisitua i le Aiga
O aiga uma e le foliga pe faagaoioia i le ala lava e tasi. Atonu o loo e i ai i se aiga toatasi se matua pe leai foi se tasi o loo umia le perisitua e pulefaamalumalu i lou aiga. O loo i ai pea le tele o auala e valaaulia ai le mana o le perisitua e faamalosia ai oe ma lou aiga. E i ai ni mea e tatau ona tatou faia uma lava, e tusa lava po o a o tatou tulaga:
-
Ia faia tatalo faaletagata lava ia, suesue i tusitusiga paia, ma anapogi. O nei taumafaiga o le a fesoasoani ia te oe ina ia e malosi faaleagaga ma valaaulia ai le Agaga i lou olaga ma i totonu o lo outou lalolagi o uunaiga.
-
Faaalu se taimi e faalautele ai ou valaauga po o tofiga Faale-ekalesia, ma ia saunia mo lesona i Aso Sa. O le faia o lena mea o le a fesoasoani ia te oe ia e talitonu ai ia te oe lava ia ma faaalia le lagolagoina mo polokalama o le perisitua.
-
Faaalia le faaaloalo mo tagata uma o lou aiga ma lagolago a latou gaoioiga anoa. O nei filifiliga e fesoasoani e faamalosia ai le aiga atoa.
-
Faasoa atu i lou aiga mea e te aoaoina ma faia i au vasega ma korama i le Ekalesia. O se auala lea aumaia ai aoaoga o le talalelei i le aiga.
-
Saili ni auala e auauna atu ai ia i latou o loo siomia oe e ala i nai faatinoga faigofie o le agalelei.
-
Fesoasoani i le fale e ala i le faia o galuega po o le fesoasoani atu i se uso po o tuafafine.
-
Faaali atu le alofa faa-Keriso i lou aiga—o le a maua ai se aafiaga e tele atu i le fausiaina o sootaga malolosi faaleaiga nai lo soo se isi lava mea e mafai ona e faia.
O Le Faamamaluina o Au Feagaiga
E ala i le auauna atu, alofa, ma le faamalolosia o o tatou aiga, ua tatou faamaoni i feagaiga na tatou osia i le papatisoga e tutu o ni molimau a Iesu Keriso, ia tausia Ana poloaiga, ma faamalolosia i latou o siomia i tatou. E mafai ona tatou faalagolago i le malosi o feagaiga o le perisitua e avea ma se faamanuiaga ma fesoasoani i o tatou aiga ma auaiga. Perisitua, auaunaga, ma aiga o upu e tatau ona fesootai e faavavau i o tatou mafaufau. O tagata o o tatou lava aiga e tatau ona numera tasi i la tatou faamuamua a o tatou sailia auala e auai ai i le galuega o le faaolataga. Pe a tatou faamalolosia o tatou aiga, tatou te faamalolosia foi le Ekalesia, o tatou nuu, ma le lalolagi.