“E Matua Faigofie Lava, Tamamatua!”
Mai se saunoaga i le konafesi aoao ia Aperila 2013.
“E suesue outou i tusi; aua ua outou manatu tou te maua ai le ola e faavavau: o tusi foi ia o loo molimau ia te au” (Ioane 5:39).
Ou te fiafia i le Tusi a Mamona ma lo’u Faaola o Iesu Keriso. I se tasi aso na ou fesili ai i le tama teine a lou afafine o Raquel po o le a sona manatu e uiga i le faia o se sini e faitau le Tusi a Mamona. Faatoa aoao talu ai nei Raquel ia iloa faitau.
“Ae, Tamamatua,” sa ia fai mai ai, “e faigata tele. O se tusi telē.”
Ona ou fai atu lea i ai e faitau mai se itulau ia te a’u. Sa ou aumaia se uati e mafai ona taofi ma taimi ai lana faitauga. Sa na o le tolu minute na ia faitau ai le itulau.
Matou te faitauina i le gagana Sipaniolo le Tusi a Mamona, ma o le lomiga Faasipaniolo o le Tusi a Mamona e 642 itulau. Sa ou fai atu ia te ia e 1,926 minute na te faitau ai le tusi atoa.
O lenei mea atonu na atili fefe ai o ia, o lea na ou vaevaeina ai lena numera i le 60 minute. Sa ou fai atu o le a moomia tau lava o le 32 itula e faitau ai le tusi. O le a itiiti ifo nai lo le aso ma le afa!
Ona ia fai mai lea ia te a’u, “E matuai faigofie tele lena mea, Tamamatua!”
Sa manaomia e Raquel, lona tuagane, o Esteban, ma isi fanau a ma fanau sina taimi e umi atu e faitau ai le Tusi a Mamona. Ona a matou faitauina, e tatau ona matou faaaluina se taimi e tatalo ma mafaufau ai e uiga i le mea na matou faitauina.
E pei lava o Raquel ma Esteban, e mafai ona tatou aoao uma e fiafia i tusitusiga paia. Ona mafai lea e i tatou taitoatasi ona alaga atu: “Ua matua suamalie au afioga i lou gutu! ua sili i lo le meli i lo’u gutu!” (Salamo 119:103.).