Ua Molimau mai Molimau Faapitoa i le Keriso Soifua
O sui o le Au Peresitene Sili ma le Korama a Aposetolo e Toasefululua o ni perofeta o ona po nei, tagatavaai ma talifaaaliga e tutu o ni “molimau faapitoa o le suafa o Keriso i le lalolagi atoa” (MF&F 107:23). O lea tulaga, ua ia i latou le tiutetauave e molimau atu i le paia o Iesu Keriso ma Lana misiona o le Faaola ma le Togiola o le lalolagi.
I upusii nei, o nei alii filifilia ma sa tofia ua faasoa mai a latou molimau i le Togiola, Toetu, ma le soifua moni o le Faaola.
O Iesu o lo Tatou Togiola
“Ma lo’u loto atoa ma le mafanafana o le malosi o lo’u agaga, ou te sii a’e ai lo’u leo o se molimau faapitoa ma folafola atu faapea o loo soifua le Atua. O Iesu o Lona Alo, le Alo e Toatasi o le Tama i le tino. O Ia o lo tatou Togiola; o Ia o lo tatou Puluvaga i le Tama. O Ia lea na maliu i luga o le satauro e togiola mo a tatou agasala. Na avea ma uluai fua o le Toetu. Talu ai sa maliu o Ia, o le a toe ola ai tagata uma. ‘O lea, ou olioli ai: “Ou iloa o Ia soifua mai!’” [“Ua Ou Iloa Lo’u Faaola,” Viiga, nu. 73].”
Peresitene Thomas S. Monson, “Ua Ou Iloa o loo Soifua Lo’u Faaola!” Liahona, Me 2007, 25.
O Au o se Molimau
“O au o se molimau o le Toetu o le Alii ma le mautinoa e pei sa ou i ai iina i le afiafi faatasi ma soo e toalua i le fale i le ala i Emau. Ou te iloa o loo soifua o Ia ma le mautinoa e pei o Iosefa Samita ina ua ia vaai i le Tama ma le Alo i le malama o se taeao susulu i le togavao i Palamaira. …
“… Ou te molimau atu ai o se molimau o le Faaola toetu ma lo tatou Togiola.”
Peresitene Henry B. Eyring, Fesoasoani Muamua i le Au peresitene Sili, “O Mai ia te Au,” Liahona, Me 2013, 25.
O le Togiola ma le Faaolataga
“O le Atua le Tama o le tupuga o le talalelei; o se vaega autu o le fuafuaga a le Atua o le faaolataga, po o le fuafuaga o le togiola. Ua ta’ua o le talalelei a Iesu Keriso aua o le Togiola a Iesu Keriso ua mafai ai ona maua le togiola ma le faaolataga. O le Togiola e togiolaina ai alii uma, ma tamaitai, atoa ma tamaiti mai le oti faaletino e aunoa ma ni tuutuuga, ma o le a togiolaina foi tagata uma mai a latou lava agasala i luga o le tuutuuga latou te taliaina ma usiusitai i le talalelei a Iesu Keriso… .
“Ou te molimau atu ai i lenei mea, faatasi ma lo’u loto atoa ma le mafaufau atoa.”
Peresitene Dieter F. Uchtdorf, Fesoasoani Lua i le Au Peresitene Sili, “E Le Tatau Ea Ona Tatou Olioli?” Liahona, Nov. 2007, 19.
O Iesu o Le Keriso
“Ou te iloa o le Atua o lo tatou Tama. Sa Ia faailoa mai Lona Alo, o Iesu Keriso, ia Iosefa Samita. Ou te tautino atu ia te outou ou te iloa o Iesu o le Keriso. Ou te iloa o loo soifua o Ia. Sa soifua mai o ia i le vaeluaga o taimi. Sa Ia aoaoina mai Lana talalelei ma sa tofotofoina o Ia. Sa puapuagatia ma sa faasatauroina ma toetu mai i le aso tolu. O Ia, e pei foi o Lona Tama, o loo i ai se tino o aano ma ivi. Sa Ia faia Lana Togiola. Ou te molimau atu ia te Ia. O loo avea au ma se molimau ia te Ia.”
Peresitene Boyd K. Packer, Peresitene o le Korama a Aposetolo e Toasefululua, “O Le Toasefululua,” Liahona, Me 2008, 87.
O Se Togiola mo le Aiga o Tagata
“O [Iesu Keriso] o le totonugalemu o le fuafuaga faavavau a le Tama, o le Faaola na avea ma togiola mo tagata. Na auina mai e le Atua Lona Alo Pele ina ia faatoilaloina le Pau o Atamu ma Eva. Na afio mai i le lalolagi o lo tatou Faaola ma le Togiola. Sa Ia faatoilaloina puniala o le oti faaletino mo i tatou e ala lea i le ofoina atu o Lona lava soifua. Ina ua maliu o Ia i luga o le satauro, sa tuueseeseina Lona agaga mai Lona tino. O le aso tolu na toe tuufaatasia ai Lona agaga ma Lona tino e faavavau, e lei toe tuueseeseina lava.”
Elder L. Tom Perry o le Korama a Aposetolo e Toasefululua, “O Le Fuafuaga o le Faaolataga,” Liahona, Nov. 2006, 71.
O Le Vaega Autu o le Talafaasolopito o Tagata
“Na faatino [e le Faaola] lana Togiola i Ketesemane, lea na Ia afutoto ai (tagai i le Luka 22:44), ma luga i Kolokota (po o Kalevaria), lea na sii ae ai Lona tino i luga o le satauro i le “mea o i ai le ulupoo,” lea e faatusa i le oti (Mareko 15:22; Mataio 27:33; tagai foi i le 3 Nifae 27:14). O lena Togiola le iu o le a faasaoloto mai ai le tagata mai le oti e lē gata (tagai i le 2 Nifae 9:7). O le Togiola a le Faaola ua avea ai le toetu o se mea moni ma le ola e faavavau o se avanoa mo tagata uma. O Lana Togiola ua avea ma vaega autu o le talafaasolopito o tagata uma”
Elder Russell M. Nelson o le Korama a Aposetolo e Toasefululua, “O Le Filemu ma le Olioli i le Iloa o loo Soifua le Faaola,” Ensign, Tes. 2011, 20; Liahona, Tes. 2011, 22.
O Se Taulaga mo Agasala
“Na onosaia e Iesu Keriso le mafatiaga e le mafuatiaina, ina ia ositaulagaina ai o Ia lava mo agasala a tagata uma. O lena taulaga na ofoina atu ai le Tamai Mamoe e lelei atoatoa—e aunoa ma se ila—mo le aofaiga atoa o mea leaga—o agasala a le lalolagi atoa. …
“O lena taulaga—o le Togiola a Iesu Keriso—ua i ai lea i le totonugalemu o le ata o le faaolataga. …
“Ou te iloa o Iesu Keriso o le Alo Pele e Toatasi o le Atua le Tama e Faavavau. Ou te iloa ona o Lana taulaga togiola, ua tatou maua ai le faamautinoaga o le tino ola pea ma le avanoa mo le ola e faavavau. O ia o lo tatou Alii, lo tatou Faaola, ma lo tatou Togiola.”
Elder Dallin H. Oaks o le Korama a Aposetolo e Toasefululua, “Ositaulaga,” Liahona, Me 2012, 19, 22.
Ua Taialaina e le Faaola Lana Ekalesia i le Asō
“O le Togiola a Iesu Keriso o se vaega sili lea ona taua o le fuafuaga a lo tatou Tama Faalelagi mo le misiona faalelalolagi a Lona Alo faapea ma lo tatou faaolataga. E tatau ona tatou matua lotofaafetai, ona e lei faalavelaveina e lo tatou Tama Faalelagi, ae sa ia taofiofi Lona manao faatama ina ia laveaiina Lona Alo Pele. Talu ai ona o Lona alofa faavavau mo oe ma au, o lea na Ia faatagaina ai Iesu ina ia faamaeaina Lana misiona na muai faauuina ai ina ia avea ma o tatou Togiola. …
“O Iesu Keriso, le Faaola ma le Togiola o tagata uma, e le o maliu. O loo soifua o Ia—le Alo toetu o le Atua o loo soifua—o la’u molimau lena, ma o loo Ia taitaia mataupu o Lana Ekalesia i le asō.”
Elder M. Russell Ballard o le Korama a Aposetolo e Toasefululua, “O Le Togiola ma le Taua o le Agaga E Tasi, Liahona, Me 2004, 85, 86.
O Lo Tatou Faamoemoe, o lo Tatou Puluvaga, o lo Tatou Togiola
“O lo tatou puipuiga e i [lo tatou Tama Faalelagi] ma Lona Alo Pele, o Iesu Keriso. Ou te iloa e alofa le Faaola ia te outou. O le a Ia faamaonia au taumafaiga e faamalosia lau molimau ia avea ma malosi sili mo le lelei i lou olaga, o se malosi e lagolagoina oe i taimi e manaomia ai ma e maua ai le filemu ma le mautinoa i nei taimi o le le mautonu.
“I le avea ai ma se tasi o Ana Aposetolo ua faatagaina e fai ma molimau, ou te tautino atu ou te iloa o loo soifua le Faaola, ma o Ia o se tagata toetu, faamamaluina ma e atoatoa Lona alofa. O ia o lo tatou faamoemoe, o lo tatou Puluvaga, lo tatou Togiola.”
Elder Richard G. Scott o le Korama a Aposetolo e Toasefululua, “O Le Mana o se Molimau Malosi,” Ensign, Nov. 2001, 89; Liahona, Ian. 2002, 100.
Inuina o le Ipu Oona
“I le Faatoaga o Ketesemane, e lei taofia e lo tatou Faaola ma le Togiola le inuina o le ipu oona o le Togiola [tagai MF&F 19:16–19]. Ma i luga o le satauro sa Ia toe mafatia ai ina ia faia le finagalo o Lona Tama, ona Ia fetalai ane ai lea, “Ua taunuu.” [Ioane 19:30]. Na ia onosaia e oo i le iuga. I le tali atu i le Faaola ma Lona usiusitai atoatoa, na fetalai mai ai lo tatou Tama Faalelagi, ‘Faauta i lou Atalii Pele, o le ua ou fiafia lava i ai, o le ua ou faamamaluina i ai lou igoa’ [3 Nephi 11:7].
“… Ia tatou faamamaluina le suafa o le Atua e ala i le tutu malolosi ma lo tatou Faaola, o Iesu Keriso. Ou te tuuina atu la’u molimau faapitoa o loo soifua o Ia.”
Elder Robert D. Hales o le Korama a Aposetolo e Toasefululua, “Tutu Malolosi i Nofoaga Paia,” Liahona, Me 2013, 51.
O Le Alo Atoatoa e Toatasi o le Atua
“Ua ou iloa o le Atua i taimi uma ma i itu uma ma i tulaga uma o lo tatou Tama i le Lagi e alofa ma lotofaamagalo. Ua ou iloa o Iesu o Lona alo atoatoa e toatasi, o lē sa ofoina mai ma le alofa Lona soifua e ala i le finagalo o le Tama ma le Alo mo le togiolaina o i tatou uma, o ē le atoatoa. Ua ou iloa na toetu o Ia mai lena maliu ia toe soifua ai, ma e talu ai ua Ia toetu, o lea o le a toetutu ai foi i tatou.”
Elder Jeffrey R. Holland o le Korama a Aposetolo e Toasefululua, “Le Alii e, Ua Ou Faatuatua,” Liahona, Me 2013, 95.
Ou Te Iloa o Loo Soifua le Faaola
“E tautino atu la’u molimau e uiga, ma le talisapaia o le taulaga e le iu ma le faavavau a le Alii o Iesu Keriso. Ua ou iloa o loo soifua le Faaola. Ua ou tofo i Lona mana togiola ma Lona mana gafatia, ma ou te molimau atu o nei mana e moni ma o loo avanoa mo i tatou taitoatasi. E moni lava, “o le malosi o le Alii” e mafai ona tatou faia ma faatoilalo ai mea uma a o tatou fetaomi atu i luma i la tatou malaga i le olaga faitino.”
Elder David A. Bednar o le Korama a Aposetolo e Toasefululua, “O Le Togiola ma le Malaga i le Olaga Faitino,” Ensign, Ape. 2012, 47; Liahona, Ape. 2012, 19.
Na Faataunuuina e Keriso Lana Misiona
“Sa tauaveina e [le Faaola] i Ona lava luga le ‘avega o agasala a tagata’ ma ‘mea mataga e mafai ona … faaoso e Satani’ [James E. Talmage, Iesu le Keriso, 613]. I lenei faagasologa na Ia onosaia ai faamasinoga o tuuaiga sese ma mea faigata ma le mataga na faapea ona oo atu ai i Lona Faasatauroga. Sa faaiuina lenei faagasologa i le Toetu manumalo o Keriso i le Aso Sa o le Eseta. Na faataunuuina e Keriso Lana misiona paia o le Faaola ma le Togiola. O le a tatou toetutu mai le oti ma toe faatasia o tatou agaga ma o tatou tino. …
“Ou te tuuina atu la’u molimau faaaposetolo o loo soifua Iesu Keriso ma o le Faaola ma le Togiola o le lalolagi. Ua Ia saunia le ala i le fiafia moni.”
Elder Quentin L. Cook o le Korama a Aposetolo e Toasefululua, “Tatou Te Mulimuli ia Iesu Keriso,” Liahona, Me 2010, 83–83, 86.
Na Togiolaina i Tatou e le Faaola
“O puapuaga o le Faaola i Ketesemane ma Ona tiga i le satauro ua togiola ai i tatou mai le agasala e ala i le faamalieina o manaoga o le faamasinotonu i o tatou luga. Na te tuuina mai le alofa mutimutivale ma faamagaloina i latou o e salamo. Ua faamalieina foi e le Togiola le aitalafu o nofoaitalafu ai le faamasinotonu ia i tatou e ala i le faamaloloina ma le tausia o i tatou mo soo se mafatiaga tatou te onosaia ma le taumamaina. ‘Aua faauta, e mafatia o ia i tiga o tagata uma, ioe, tiga o tagata ola uma, o tane, o fafine, ma tamaiti, o e ua i ai i le aiga o Atamu’ (2 Nifae 9:21; tagai foi i le Alema 7:11–12). …
“… O le togiola sili lava ua ia Iesu Keriso ma ua na o Ia lava e maua ai. Ou te faailoa atu ma le lotomaualalo ma le loto faafetai o Ia o le Togiola.”
Elder D. Todd Christofferson o le Korama a Aposetolo e Toasefululua, “O le Togiola,” Liahona, Me 2013, 110, 112.
Le Toetu ma le Ola
“O na mea uma, tatou te folafola atu lo tatou Faaola ma le Togiola, o Iesu Keriso. O mea uma ua tatou i ai—o mea uma o le a tatou oo i ai—tatou nofo aitalafu ai ia te Ia. …
“E lagona pea Ana afioga i auga seneturi:
“O a’u nei o le toetu ma le ola: o lē faatuatua mai ia te a’u, e ui lava ina oti, a e ola lava ia:
“‘O tagata ola uma o e faatuatua mai ia te au, e le oti lava.”
“Uso e ma tuafafine, o loo soifua o Ia. Ua toetu o Ia. O loo Ia taitaiina Lana galuega paia i luga o le fogaeleele.”
Elder Neil L. Andersen o le Korama a Aposetolo e Toasefululua, “O Mai ia te Ia,” Liahona, Me 2009, 78.