O Le Faaaogaina o le Ata o le Faaolataga e Tali ai Fesili

Saunia e LaRene Porter Gaunt

Mekasini a le Ekalesia

Pe a i ai ni a tatou fesili po o isi foi e uiga i le talalelei a Iesu Keriso, pe o tatou iloa po o fea e maua ai tali?

Ua tatou ola i se taimi fiafia. Ua oo mai le talalelei toefuataiina a Iesu Keriso i “fafo mai le le mailoa” (MF&F 1:30). O se taunuuga, ua faalogo le tele o fanau a le Tama Faalelagi e le auai i lo tatou faatuatuaga e uiga i “Mamona.” Ua faalogo nisi i mea e uiga ese ma le le mautonu. O nisi ua faalogo i mea e masani ai ma le mafanafana. O tagata mai na vaega e mafai ona o mai ia i tatou e sailia ni tali i a latou fesili. E tele tali o loo maua i le ata o le faaolataga, lea e iloa foi o le “fuafuaga tele o le fiafia” (Alema 42:8).

O fesili e sili atu ona fesiligia soo o “O Fea na ou sau ai?” “Aisea ua ou i ai iinei?” ma “O Fea ou te alu i ai pe a mavae lenei olaga?” O nei fesili uma e mafai ona taliina uma e ala i upumoni o loo maua i le ata o le faaolataga. Ua faasoa mai e lenei tusiga nisi o tali ua tuuina mai e tusitusiga paia ma lo tatou perofeta, o Peresitene Thomas S. Monson, e faatatau i nei fesili.

O fea na ou sau ai?

O tatou o ni tagata e faavavau. Sa tatou ola faatasi ma le Atua a o lei oo mai i lenei olaga o Ana fanau agaga. “Sa [aoao] e le Aposetolo o Paulo faapea ‘o fanau a le Atua i tatou’ [Galuega 17:29],” na saunoa ai Peresitene Monson. “talu ai ua tatou iloa o o tatou tino faaletino o ni fanau ia a o tatou matua faaletino, e tatau la ona tatou sailia le uiga o le tala a Paulo. Ua tautino mai e le Alii e faapea ‘o le agaga ma le tino o le tagata lea’ [MF&F 88]. O le mea lea o le agaga o le atalii o le Atua. Sa faasino ia te Ia e le tusitala o le Eperu o ‘le Tama o agaga’ [Eperu 12:9].”¹

Aisea ua ou i ai iinei?

E uiga i lo tatou olaga i le lalolagi, na saunoa mai Peresitene Monson: “E tatau ona tatou maua le lotofaafetai ona ua foafoaina e le Mataisau poto se lalolagi ma tuu i ai i tatou iinei ma se ufimata o le lotogalo i lo tatou olaga sa i ai muamua, ina ia tatou oo i se taimi o tofotofoga, o se avanoa e faamaonia atu ai i tatou lava, ina ia mafai ona tatou agavaa mo mea uma ua saunia e le Atua mo i tatou ia maua.

Ua manino lava, o se tasi o faamoemoega autu o lo tatou i ai i le lalolagi o le mauaina lea o se tino o aano ma ivi. Ua uma foi ona tuuina mai ia i tatou le meaalofa o le faitalia. I le fiaafe o auala, ua faamanuiaina ai i tatou e filifili mo i tatou lava. O iinei tatou te aoao mai ai i aafiaga faigata tatou te oo i ai. Tatou te iloatino ai le lelei mai le leaga. Tatou te iloa ai le eseesega o le oona ma le suamalie. Tatou te iloa ai e i ai taunuuga o a tatou faatinoga”²

O fea ou te alu i ai pe a mavae lenei olaga?

E oo mai le oti i tagata uma o le aiga o tagata. Ae “afai e oti le tagata, e toe ola mai ea o ia?” (Iopu 14:14). “Ua tatou iloa o le oti e le o le mutaaga lea,” o le saunoaga lea a Peresitene Monson. “Sa aoao mai lenei upumoni e perofeta i augatupulaga uma. O loo maua foi i tusitusiga paia. I le Tusi a Mamona tatou te faitau ai i upu patino ma le faamafanafana:

‘O lenei, e faatatau i le tulaga o le agaga i le va o le oti ma le toetutu mai—Faauta, ua faailoa mai ia te au e se agelu, e faapea o agaga o tagata uma, o le taimi lava latou te o ese atu ai mai lenei tino faaletino, ioe, agaga o tagata uma, pe sa latou lelei pe sa leaga, e ave atu i fanua i lena Atua o le na ia tuuina ia te i latou le ola.

‘Ma ona oo lea, o agaga o i latou o e ua amiotonu e talia i se nofoaga o le fiafia, lea ua taua o le parataiso, o se nofoaga e malolo ai, o se nofoaga o le filemu o le a latou malolo ai mai i o latou faalavelave uma ma mai le popole uma, ma le faanoanoa’ [Alema 40:11–12].”³

A uma ona tatou toetutu, tatou te o i le malo selesitila i le mamalu e pei o le la, o le malo terasitila i le mamalu e pei o le masina, le malo telesitila i le mamalu e pei o fetu, po o fafo i le pogisa (tagai i le MF&F 76).

Pe i ai moni ea se Atua? E moni ea Satani?

O le Tama faalelagi, Iesu Keriso, ma Satani o vaega uma o le Fono sili i le Lagi na faia ae tatou te le’i fananau mai. O se vaega o le ata o le faaolataga, na fesili atu le Tama Faalelagi mo se tasi e alu i le lalolagi ma togiola mo a tatou agasala. Sa ia fai mai: “O ai ou te auina atu? Ma sa tali mai se tasi [Iesu Keriso] e pei o le Atalii o le Tagata: O aʼu lenei, auina atu aʼu. Ma sa tali mai le isi [Satani] ma fai mai: O au lenei, auina atu au. Ma sa fetalai mai le Alii: o le a ou auina atu le muamua.

“Ma sa ita le lona lua [Satani], ma sa lē tausia lona esetete muamua; ma, i lena aso, etoatele na mulimuli atu ia te ia” (Aperaamo 3:27–28; tagai foi i le MF&F 29:36–37; Mose 4:1–4).

Pe ua tatou maua le mana e tetee ai faaosoosoga a Satani?

O le tasi vae tolu o agaga o e na filifili e mulimuli ia Satani ina ua uma le Fono i le Lagi ona sa tuliesea faatasi ma ia. O i latou ma Satani e tumau pea o ni agaga e aunoa ma ni tino faaletino. Na aoao mai le Perofeta o Iosefa Samita: “O tagata uma e fai tino e i ai le mana ia i latou o e leai ni tino.”⁴ O le mea lea, o Satani e mafai ona faaosoosoina i tatou, ae tatou te maua le mana e tetee atu ai.

Aisea e foliga mai ai i nisi taimi e pei e le tali mai le Tama Faalelagi i au tatalo?

“O le tatalo o le tagata lea e feutagai ai le finagalo o le Tama ma le manao o le tamaitiiti. O le faamoemoega o le tatalo e le o le suia o le finagalo o le Atua” (Bible Dictionary, “Prayer”). O le tatalo o se meafaigaluega e fesoasoani ia i tatou e filifili pe o le a tatou faaaogaina lo tatou faitalia e faaogatasi o tatou loto i le Atua (tagai i le Aperaamo 3:25). E tali mai i taimi uma le Tama faalelagi i a tatou tatalo, ae o na tali e mafai ona oo mai i le ioe, leai, po o le le’i oo i le taimi. E taua le taimi.

Aisea e i ai ou luitau a o ou taumafai e ola i se olaga lelei?

O luitau o se vaega o le ata o le faaolataga. Latou te faamalolosia i tatou, faamamaina i tatou, ma faamamāina atoatoa i tatou a o tatou faalagolago ia Iesu Keriso ma Lana talalelei. E tausia i tatou e le Tama Faalelagi i le taimi o o tatou luitau. O a tatou tofotofoga o le a “[tatou] maua ai le poto masani, ma o le a avea ma o [tatou] lelei” (MF&F 122:7).

E faapefea ona ou iloa le mea sa’o ma le mea sese?

O fanau uma a le Atua e soifua mai ma le Malamalama o Keriso, lea e fesoasoani ia i tatou ia “iloa le lelei mai le leaga” (Moronae 7:16). E le gata i lea, o le Agaga Paia e mafai ona molimau mai ia i tatou i le upu moni i o tatou mafaufau ma loto i lagona o le filemu ma le mafanafana (tagai i le MF&F 8:2–3).

Pe mafai ona faamagaloina au e tusa lava pe na ou faia ni agasala matuia?

Na silafia e le Atua o i tatou uma lava o le a tatou agasala a o tatou aoao e filifili i le va o le sa’o ma le sese.⁵ Ae ui i lea, o agasala uma, e i ai le faasalaga ua noatia i ai. O le faamasinoga tonu e manaomia ai ona mafatia i le faasalaga. I Lona alofa mutimutivale, na faatagaina ai e le Tama Faalelagi Iesu Keriso e faia le Togiola ma faafetaiaia manaoga o le faamasinotonu mo i tatou uma (tagai i le Alema 42). I se isi faaupuga, o puapuaga o Keriso i Ketesemane ma le maliu i Kolokota na totogiina le tau mo a tatou agasala uma pe afai tatou te faaaogaina le Togiola a Keriso e ala i le salamo ma le mauaina o sauniga o le talalelei. O le a faamagaloina a tatou agasala (tagai i le MF&F 1:31–32).