O i Tatou o Aao o le Alii
O le sailia o e matitiva ma auauna atu ia i latou ua puapuagatia e matuai taua lava i lona uiga o le avea ma se soo o Iesu Keriso.
I le taimi o le popofou o le Pau Tele o le Tamaoaiga, e toaono peresitene o siteki mai le Vanu o Sate Leki na faapotopoto faatasi e tau foia ao pogisa o le mativa ma le fiaai lea na faamata’uina ai le ono faalofituina o le tele o tagata o le Ekalesia.1 E ui lava o le pau o le tamaoaiga na aafia ai tagata i soo se mea, o Iuta lava ia na faapitoa lava ona faataumaoia.2
O le taimi lena, o taitai o le Ekalesia na itiiti ni nai punaoa e fesoasoani ia i latou e manaomia le fesoasoani. E mafai ona latou faaaogaina le taulaga anapogi, ioe, ae o le faaauau pea o le manaomia na sili atu le maoae nai lo se isi lava mea na latou iloaina muamua. I lalo o le taitaiga a le au Epikopo Pulefaamalumalu, sa faavaeina se Matagaluega o le Tesareta mo Galuega i le amataga o le vaitau o le 1900. Ae sa lei lelei ona faaauupegaina e taulima ai sea ituaiga tulaga maoae o le manaomia.
Na iloa e nei taitai perisitua e toaono faapea afai o le a fesoasoani atu i tagata o a latou siteki, latou te le mafai ona toe faatali. Ua tatau loa ona latou faia se gaoioiga vave. Sa amata ona latou faagalueina tagata. Na latou faatulagaina alii ma ave i latou i faatoaga lea e mafai ona latou selesele ai fua o faatoaga. I le faafesuiai mo a latou galuega, o faifaatoaga loto faafetai na foaiina atu meaai ma le agalelei i alii. Sa aveina atu vaega o totoe i se fale teuoloa ma tufatufaina atu i isi o e na fia aai. A o faateleina foai, na amata ona tuuapaina e le Au Paia meaai e faasaoina ai. O le amataga lenei o le polokalama uelefea o ona po nei.
I le valusefulu tausaga mulimuli ane, ua vaai atu taitai o le Ekalesia o aso nei i a latou aulotu ma lagona lea lava naunau e tasi e aapa atu ia i latou e manaomia le fesoasoani.
I le konafesi aoao ia Oketopa 2011, na saunoa ai Peresitene Dieter F. Uchtdorf, Fesoasoani Lua i le Au Peresitene Sili: “Ua tele lava ina tatou matauina manaoga o siomia ai i tatou ma le faamoemoe o le a tu mai se tasi mai se mea mamao e faafetaia’ia na manaoga. Atonu tatou te faatalitali mo ni tagata tomai faapitoa ma se poto faapitoa e foiaina ni faafitauli maoti. A tatou faia lenei mea, ua tatou aveesea mai o tatou tuaoi le auaunaga sa tatau ona latou maua, ma ua tatou aveesea i tatou lava mai avanoa e auauna atu ai. E ui e leai se mea e leaga ai tagata tomai faapitoa, ae manatu i ai: o le a le mafai lava ona latou foiaina uma faafitauli. Ae, ua tuu e le Alii Lana perisitua ma ona faatulagaga i o tatou faitotoa i malo uma ua faatuina ai le Ekalesia.”3
O lenei valaau mo taitai o le Ekalesia i le lotoifale ma tagatalotu ia faia se gaoioiga e pei ona musuia e le Agaga Paia ua taitaiina ai le toatele i le lalolagi atoa ia, e pei ona saunoa mai Peresitene Uchtdorf, “fuafuaina lava e i latou [lava].”4 Ua latou afe i luga lima o o latou ofu ma tautino mai “ia manatua i mea uma e uamatitiva ma e ua lētagolima, e ua mamai ma e ua puapuagatia” (MF&F 52:40).
Ekuatoa
A o vaai atu Epikopo Johnny Morante i Guayaquil, Ekuatoa, i tagata o lana uarota, na matuai faapopoleina tele o ia. Na toatele naua aiga na tauivi ina ia maua e oo lava i sina mea itiiti e manaomia o le olaga. Sa manao o ia e fesoasoani ia i latou, o lea na ia talanoa faatasi ai ma taitai o le uarota, ma aveina atu le mataupu i le Alii.
Talu ai sa utiuti avanoa faigaluega i le eria, sa amata ona latou galulue faatasi ma se vaega o tuafafine e 11, uunaia i latou e tulimatai atu i le mauaina o se avanoa faapisinisi-laitiiti. Sa matauina e nei tamaitai sa i ai se manaomia mo vailaau lelei, taugofie mo le faamamaina o fale, ma sa latou mafaufau pe mafai ona latou faia ma faatau atu na mea i lo latou nuu. Ae faapefea ona latou aoao e faia nei sapalai [vailaau]?
I le taimi lea, na iloa ai e Epikopo Morante se tuafafine e leo faigaluega i lana uarota sa galue e avea ma se saienitisi o vailaau. Ina ua fesiligia e tuafafine e 11 o ia pe mafai ona fesoasoani, sa fiafia o ia e aoaoina i latou pe faapefea ona faia ni vailaau e saogalemu, ma tulaga lelei.
Na latou faia se fuafuaga faapisinisi, faailogaina eria i le nuu e galulue ai tuafafine taitasi, filifili vailaau o le a latou faia, ma mamanuina le afifiina ma le faaigoaina.
I ni nai masina, sa latou fausia se faavae mo tagata faatau ma ua lava alagatupe maua e siitia ai lo latou matitiva, ma fesoasoani e saunia ai mea e manaomia mo o latou aiga.
Ina ua iloa e pule o kamupani o vailaau i le lotoifale e uiga i lenei taumafaiga, na faagaeetia i latou i le tala e uiga i le saienitisi o vailaau e leai se galuega. Na iu lava ina latou faatalanoaina ma faafaigaluegaina o ia e taitaia la latou lava fale gaosimea.
Rusia
I le Uarota o Rechnoy i Moscow, Rusia, o Galina Goncharova, o lē sa avea ma tusitalafaasolopito a le uarota, na see i se aisa ma gau ai ona lima e lua. Sa aveina o ia i le falemai, ma faasima ai ona lima. Sa le mafai ona ia fafagaina o ia lava pe fai ona ofu. Sa le mafai ona ia selu lona lauulu e oo lava i le taliina o le telefoni.
Ina ua iloa e tagata o lana uarota le mea na tupu, sa vave ona latou tali atu. Sa tuuina atu e le au perisitua ia te ia se faamanuiaga ma galulue faatasi ma tuafafine o le Aualofa e faia se faasologa o taimi e vaaia ai lenei tuafafine lelei ma tali atu i ona manaoga.
O Vladimir Nechiporov, le taitai misiona a le uarota, na fai mai, “Tatou te manatua se saunoaga na tuuina atu i se konafesi aoao e uiga i se faatagata o Keriso lea na leai ni ona lima.5 I lalo o le faatagata sa tuu ai e se tasi se maa ua faitauina, ‘O Outou o o’u lima.’ Mo nai vaiaso na pagatia ai lenei tuafafine lelei, na lagona ai e tagata o le Uarota a Rechnoy se sootaga i lena tala. Na avea moni lava i matou ma ona lima.”
Filipaina
Ina ua oo mai le Afa o le Tau Vevela o Washi i le atu Filipaina i le 2011, sa lolovaia le eria i tatafe o vai ma le matagi. Sa faaleagaina nisi o fale e 41,000, ma e sili atu ma le 1,200 tagata na maumau o latou soifua.
A o lei oo mai le lologa, o Max Saavedra, le peresitene o le Siteki o Cagayan de Oro i Filipaina, sa lagonaina le uunaiga e fatu se au o le siteki mo faalavelave faafuasei. Sa ia faatuina ni komiti e faataunuu ni tofiga eseese—mea uma mai le sailia ma laveai i le fesoasoani muamua i le tuuina atu o meaai, vai, ma lavalava.
A o faaitiitia le lolovai i se tulaga saogalemu, sa faatulagaina loa e taitai tagata o le Ekalesia. Sa latou tulimataiina le saogalemu o tagata taitoatasi ma iloilo mea sa faaleagaina. Na tuuina mai e se tasi tagata ni vaa pa’u e aumai ai tagata sa pa’ulia i le saogalemu. Sa tatalaina falelotu e tuuina atu ai se malutaga i tagata uma e manaomia ni meaai, lavalava, palanikeke, ma se nofoaga le tumau e nonofo ai. O vai mama sa avea ma se manaoga e sili le taua, o lea na faafesootai ai e Peresitene Saavedra se pisinisi i le lotoifale na umia se loli fuimu, ma sa latou aveina atu le suavai mama i nofoaga autu o le sulufaiga i falelotu. O tagatalotu na i ai le tomai faafomai na tali atu ia i latou o e na manunua.
O le taimi lava na tausia ai tagata o le Ekalesia, na asiasi atu ai loa Peresitene Saavedra ma lana au galulue i isi nofoaga autu o le sulufaiga i le aai ma ofoina atu le fesoasoani. Na latou aumaia ia i latou meaai ma isi sapalai. O le toatele o tagata o le ekalesia, e ui ina ua leai ni o latou lava fale, ae na auauna atu i isi ma le le manatu faapito i le taimi lava na uma ai le afa. Ina ua uma timuga ma matutu le eleele, na amata loa ona galulue Lima Fesoasoani Mamona volenitia mai siteki e tolu e tufatufa atu sapalai faapea foi le fesoasoani i le faamamaina.
Pasila
I totonu o le aai o Sete Lagoas, Pasila, o loo i ai se malutaga mo tamaitai e i ai manaoga faapitoa o e na aafia o latou olaga i fualaau oona. O aso taitasi latou te tauivi ai ia feola. Sa i ai sa latou ogaumu laitiiti e faaaoga e fai ai pe tusa ma le 30 pa falaoa i le aso. E ui na maua e tamaitai se fesoasoaniga mai se faalapotopotoga fesoasoani alofa i le lotoifale, sa tau le lava a latou meaai mo i latou lava. Ina ua iloa manaoga o nei tamaitai e taitai o le Ekalesia mai le Siteki o Sete Lagoas i Pasila, sa latou mananao e fesoasoani ia i latou.
Sa latou talanoa i tamaitai e uiga i o latou manaoga. Na fai mai tamaitai pe ana mafai ona latou faia ni falaoa ia sili atu, o le a le gata ina sili atu ona lelei a latou meaai ae atonu e mafai ona faatau atu ni nai falaoa ma maua ai sina tupe e matuai manaomia lava.
Na galulue faatasi taitai ma tagata o le Ekalesia ma leoleo i le lotoifale o le militeli ma se aoga i le lotoifale e faaleleia tulaga mo nei tamaitai. Faatasi ai ma le fesoasoani o se foai agaalofa a le Ekalesia ma volenitia mai le Ekalesia ma le nuu, sa mafai ona latou faia se falefalaoa fou—lea na mafai ai e tamaitai ona gaosi ni falaoa e 300 i aso taitasi.
Faatasi ai ma tupe ua latou maua, ua mafai nei e tamaitai i le falefalaoa ona faafaigaluega le latou tagata faigaluega muamua—o se tasi o tamaitai i le malutaga.
O Le Galuega a le Uelefea
E pei o na taitai musuia o le Ekalesia i le tele o tausaga ua mavae, na vaai i le manaomia tele o le fesoasoani o siomia ai i latou ma na mumusu e liliu ese, o taitai ma tagata o le Ekalesia i le lalolagi atoa i le taimi nei o loo faia lea lava mea i o latou lava eria ma i la latou lava ala.
Ina ua saunoa mai Peresitene Uchtdorf i le Ekalesia e uiga i le tausiga o isi, sa ia fai mai: “O le ala a Le Alii e le o le saofai i autafa o le vaitafe ma faatalitali i le taimi e pe ai le vai ona tatou kolosi lea. A e ala i le o mai faatasi, afe i luga lima o o tatou ofu, ma o e galulue, ma fausia se alalaupapa po o se vaa e kolosi ai le vai o o tatou luitau.”6
O le sailia o e matitiva ma auauna atu ia i latou o e mafatia o se vaega taua o le uiga o le avea ma se soo o Keriso. O le galuega na faia e Iesu Keriso lava Ia a o Ia auauna atu i le nuu o Ona aso. “O lenei galuega o le faia i le ala a le Alii ua le na o se isi mea i le lisi o polokalama a le Ekalesia,” le saunoaga faaiu a Peresitene Uchtdorf. “E le mafai ona lafoaiina pe tuu ese. E totonugalemu i a tatou aoaoga faavae; o le uiga moni lea o la tatou tapuaiga.”7