O Le Liua ma le Ositaulaga i Finelani

Saunia e Melissa Zenteno

E faapei le avea ma se talavou matua faamaoni i Finelani? Ua faasoa mai e se tasi o alii talavou lana aganuu ma lona talitonuga.

I ni nai maila mai le talafatai o Helsinki, Finelani, o loo i ai le olo o le sami o Suomenlinna, na fausia i le seneturi lona 18 e faamalosia ai le puipuiga mai osofaiga. I le faasolosolo i atumotu e ono, o lenei olo malosi e suitulaga i le naunautaiga mausali o tagata Finelani.

Ae o tagata e lolotu i Finelani e asiasi i se fale e ese pe a latou malaga atu i la latou taulaga. O le Malumalu o Helsinki Finelani o se faailoga lea faaletino o lo latou liua ma le puipuiga latou te maua mai le ola ai i le talalelei.

Mo Niilo Kervinen, o se talavou matua e 24 tausaga le matua mai Rovaniemi, Finelani, o le malaga i le nofoaafi i le 10-itula i Helsinki o se tau laitiiti lea e totogi mo le faamanuiaga o le auauna atu i le malumalu.

A o lei faapaiaina le Malumalu o Helsinki i Finelani ia Oketopa 2006, na manaomia le malaga o Niilo ma isi tagata o lana uarota i le Malumalu o Stockholm Suetena po o le Malumalu o Copenhagen Tenimaka. “O malaga e masani lava ona alu ai le vaiaso i le taimi o le malologa i le taumafanafana,” na te manatuaina. O le malaga i le pasi ma momoe i faleie i ma malaga o nisi ia o mea e sili ona ia manatua lelei.

Ae o le i ai o se malumalu i lona atunuu o se faamanuiaga matagofie. “Ina ua latou fofogaina mai le malumalu o Helsinki, sa ou matua fiafia lava, o le tala lea a Niilo. “Ou te lagonaina pea le mana o le tatalo o le faapaiaga i taimi uma lava ou te alu ai i totonu.”

O lenei fiafia mo le malumalu ua ese ai Niilo mai i ana uo. “O tagata o Finelani e galulue malosi ma e olioli i le toaaga mai ae laitiiti le taimi mo mea faaleagaga i o latou olaga,” lana faamatalaga. E ui lava ina fai mai Niilo ua faamanuiaina o ia i ni uo lelei, ao ia tuputupu ae na amata ona manino mai le eseesega i le va o ala na ola ai ana uo ma le ala sa aoaoina ai o ia e ola ai. O le eseesega lenei na mafua ai ona saili e Niilo sana lava molimau ina ua 17 ona tausaga. “Sa tatau ona ou faia se faaiuga po o fea e tu ai ma po o ai e avea ai au,” o lana tala lea. “Faatasi ai ma faamanuiaga a le Alii ma le taitaiga a le aiga ma uo lelei, sa ou maua se molimau e malosi atu o le Ekalesia.”

I le talanoa ai e uiga i le liua, na saunoa mai Elder David A. Bednar o le Korama a Aposetolo e Toasefululua, “ou te folafola atu a tatou malamalama i le upumoni ma ua faaliliuina i le Alii, o le a mautu lo tatou tutumau ma le mausali ma o le a le pauu ese lava.”¹ E ui lava o le malaga atu i Helsinki e manaomia ai le taimi ma tupe, ua naunau lava Niilo ia avea ma soo o Keriso. Ma ia Niilo, e le’o se osigataulaga lena mea.

O nisi mea e uiga ia Niilo

O a taumafa masani a tagata o Finelani?

O nisi o a’u meaai e fiafia i ai e aofia ai supo samani ma aano o tia ma pateta palu. Matou te matele foi i le aai i falaoa eena.

O a tou mea faafiafia e fai?

Ou te fiafia e faasee i le aisa, matamata i ata tifaga, pe na o le fiafia lava i le savalivali i fafo. Sa ou faamisiona i Iapani, o lea ou te suesue ai i le faaIapani pe a ou mafaia.

E faapei le tafao faamasani i Finelani?

E leai sa matou aganuu malosi o tafaoga faamasani. E masani lava faatoa tafafao ni tagata pe a ua matuai fiafia lava ia i latou. O tafaoga faamasani iinei, e leo se auala ina ia latou masani ai i se tasi. E i ai talavou matutua faamaoni iinei, e tusa lava pe le toatele tagata lolotu O nisi taimi o talavou matutua o le ekalesia e malaga mamao mo se tafaoga faamasani ma se tagata na latou feiloai i se siva a talavou nofofua matutua.