Alii ma Tamaitai i le Galuega a le Alii
Mai se lauga sa faia i se faigalotu i le Iunivesite o Polika Iaga i le aso 20 o Aokuso, 2013. Mo le tusiga atoa i le faaPeretania, asiasi speeches.byu.edu.
I le fuafuaga sili faaeeina o le perisitua a lo tatou Tama Faalelagi, ua i ai i alii ma tamaitai ni matafaioi eseese ae tutusa lava le taua.
Ou te talitonu ua i ai sina mea moni e manaomia ona malamalama uma i ai tamaitai ma alii e uiga i le matafaioi taua o loo i ai i tamaitai i le faamalosia ma le fausiaina o le malo o le Atua i luga o le fogaeleele. I le tele lava o auala o tamaitai o le fatu lea o le Ekalesia. Faatasi ai la ma le fesoasoani a le Alii, ou te fia faamamaluina tamaitai ma tamaitai talavou faamaoni o le Ekalesia. Ia te outou tamaitai pele, po o fea lava se nofoaga o tou alala ai i le lalolagi. Faamolemole ia outou silafia le alolofa tele ma le faatuatuaina o outou e le Au Peresitene Sili ma Aposetolo e Toasefululua.
Sei ou amata atu i se lesona toe faamanatu e uiga i mea o tatou faia iinei i le lalolagi.
O i tatou o ni atalii ma afafine agaga faapelepele a lo tatou Tama Faalelagi. Sa tatou nonofo faatasi ma Ia i le muai olaga. Ina ia faataunuuina le misiona o le aumaia “o le tino ola pea ma le ola faavavau o le tagata” (Mose 1:39), ua foafoaina e le Tama Faalelagi se fuafuaga e fesoasoani ai i Lana fanau ina ia ausia o latou faamoemoega tupito ma le sili. O le fuafuaga a lo tatou Tama na valaauina ai le tagata e pau ma vavaeeseina mai ia te Ia mo se taimi e ala i le fanau mai i le olaga faaletino, mauaina o se tino, ma ulufale atu i se taimi o tofotofoga ma le olaga faataitai. O Lana fuafuaga na saunia ai se Faaola e togiola tagata uma mai le Pau. O le Togiola a lo tatou Alii o Iesu Keriso na saunia ai le auala e ala atu i sauniga ma feagaiga paia o le talalelei ina ia toe foi atu i le silafaga o le Atua. Talu ai o le a tatou ola i se siosiomaga faaletino e tumu i tulaga matautia ma mea faalavefau, na silafia e le Tama Faalelagi ma Lona Alo tatou te manaomia le mauaina o le mana sili atu nai lo lo tatou lava. Na La silafia lo tatou manaomia o le mauaina o lo Laua mana. O le talalelei ma le mataupu faavae a Keriso e tuuina atu i tagata uma o e taliaina le mana e ausia ai le ola e faavavau ma le mana e maua ai le olioli i le malaga.
O loo i ai i latou o e fesiligia le tulaga o tamaitai i le fuafuaga a le Atua ma i le Ekalesia. Ua lava le faatalanoaina o au e ala i faasalalauga faaleatunuu ma faavaomalo e tau atu ai ia te outou o le tele o le au tusitala ua leva ona faia ni manatu e uiga i lenei autu. I le aluga o tausaga o le toatele na tuuina atu ni fesili e atagia mai ai o tamaitai o ni tagatanuu lona lua i le Ekalesia. E leai se mea e mafai ona aveesea mai le upumoni.
Ou te fia fautuaina atu ni manatu autu se lima e te manatunatu loloto i ai e faatatau i lenei autu.
1. Ua I Ai se Fuafuaga a le Atua e Fesoasoani ia i Tatou e Taunuu i le Ola e Faavavau
Na foafoaina e lo tatou Tama Faalelagi ia alii ma tamaitai, o Ona afafine ma atalii agaga. O lona uiga e faavavau le itupa. Ua i ai Sana fuafuaga ua mamanuina e fesoasoani ia i tatou uma o e filifili e mulimuli ia te Ia ma Lona Alo, o Iesu Keriso, e ausia lo latou taunuuga o ni suli o le ola e faavavau.
Afai o lo tatou faaeaga mulimuli o lo Laua sini taua ma le faamoemoega lea, ma afai La te silafia mea uma ma atoatoa, e pei ona tatou iloaina i Laua, ona sili atu lea o lo Laua malamalama i le auala e saunia ai, aoao atu, ma taitai atu ai i tatou ina ia tatou maua le avanoa sili e agavaa ai mo le faaeaga.
O le toatele o tagata e i ai aiga po o uo o e na maua i faafitauli faigata eseese faaleagafesootai. O le finau e uiga i faafitauli e masani lava ina le maua ai se tali po o se faaiuga ma, o le mea moni, e mafai ona fatuai ai se fefinauaiga. O loo i ai nisi o fesili e uiga i le tulaga o le Ekalesia i ni mataupu maaleale e faigata ona tali atu e faamalieina ai soo se tasi. Ae peitai, pe a tatou saili le Alii i le tatalo e uiga i le auala e lagonaina ai ma mea e fai i nei tulaga, e oo mai le uunaiga: “E te talitonu ia Iesu Keriso ma e te mulimuli ia te Ia ma le Tama?” Ou te talitonu o le toatele lava o tagata i le Ekalesia i se tasi taimi po o le isi o le a mafaufau pe mafai ona latou faia mea uma ua talosagaina ai i latou e fai. Ae afai tatou te talitonu moni lava i le Alii, e oo mai le faamautinoaga: “Ou te talitonu ia Iesu Keriso, ma ua ou naunau e faia soo se mea ua finagalo o Ia ou te faia.” O lea la ua tatou agai i luma. Oka se mamana o upu “Ou te talitonu ia Iesu Keriso!”
O a tatou molimau ma filemu o tatou mafaufau ma lo tatou soifua laulelei e amata i le naunautai ina ia talitonu faapea e moni ua sili lava le silafia o lo tatou Tama o i le Lagi.
2. E Taitaiina le Ekalesia e ala i Ki o le Perisitua
O Le Ekalesia a Iesu Keriso o le Au Paia o Aso e Gata Ai o le Ekalesia lea a le Alii, ma o Lana Ekalesia e taitaiina e ala i le pule ma ki o le perisitua. “O ki o le perisitua o le pule lea ua tuuina mai e le Atua i taitai perisitua e faatonu ai, faafoe ai, ma pulea ai le faaaogaina o Lana perisitua i luga o le fogaeleele.”1
O i latou o e ua i ai ki o le perisitua—po o se tiakono ua i ai ki mo lana korama po o se epikopo ua i ai ki mo lana uarota po o le Peresitene o le Ekalesia, o loo umia ki uma o le perisitua—ua mafai moni ai lava mo tagata uma o e auauna atu pe galulue faamaoni i lalo o la latou taitaiga ona faatino le pule o le perisitua ma maua le mana o le perisitua.
E galulue alii ma tamaitai uma i lalo o le taitaiga o i latou o e ua i ai ki. O le ala lea e taitaia ai e le Alii Lana Ekalesia.
Sei ou toe faamatalaina se mea sa ou ta’ua i le konafesi aoao ia Aperila 2013: “I le fuafuaga sili a lo tatou Tama Faalelagi e maua ai le mana o le perisitua, ua i ai i alii le tiutetauave tupito e taitai ai le perisitua, ae e le o i latou o le perisitua. E eseese matafaioi ae tutusa lava le taua ua i ai i alii ma tamaitai. E pei lava ona le mafai i se tamaitai ona fanauina se tamaitiiti e aunoa ma se alii, e faapena foi, e le mafai i se alii ona faaaogaina atoa le mana o le perisitua e faavae ai se aiga e faavavau e aunoa ma se tamaitai. … I se vaaiga e faavavau, o le mana foafoa atoa ai ma le mana o le perisitua e faaaogaina uma e se tane ma se ava.”2
Aisea e faauuina ai alii i tofi o le perisitua ae leai tamaitai? Sa faamalamalama mai e Peresitene Gordon B. Hinckley (1910–2008) e faapea o le Alii, ae le o le tagata, “na filifili o alii i Lana Ekalesia e tatau ona umiaina le perisitua” ma o le Alii foi na faaee maia i tamaitai ia ni “gafatia e faalautele ai lenei faalapotopotoga maoae ma le ofoofogia, le Ekalesia ma le malo o le Atua.”…3 Ina ua uma ona fofogaina ma faia mea uma, e le faaalia mai lava e le Alii pe aisea ua Ia faatulagaina ai Lana Ekalesia e pei ona Ia faia ai.
Aua nei galo ia i tatou e tusa o le afa o aoaoga uma o loo faia i le Ekalesia o loo faia lea e tuafafine. O le tele o taitaiga o loo saunia e mai o tatou tuafafine. O le tele o avanoa faaleauaunaga ma gaoioiga ua fuafuaina ma taitaia e tamaitai. O fautuaga ma le auai o isi tamaitai i aufono a uarota ma siteki ma i le aufono aoao i le laumua o le Ekalesia e maua mai ai se malamalamaaga manaomia, poto, ma le paleni.
E manaomia uma alii o e faaaloalo i tamaitai ma o latou meaalofa faaleagaga tulaga ese ma tamaitai o e faaaloalo i ki o le perisitua o umia e alii e valaaulia ai faamanuiaga atoatoa o le lagi i soo se taumafaiga i le Ekalesia.
3. E Tutusa Uma le Taua o Alii ma Tamaitai
E tutusa alii ma tamaitai i fofoga o le Atua ma i le silafaga o le Ekalesia, ae e le faapea ua tutusa ona tasi ai lea. O tiutetauave ma meaalofa paia a alii ma tamaitai e eseese i lo latou natura ae le o lo latou taua po o uunaiga. E faatusatusa e a tatou aoaoga faavae o le Ekalesia ia tamaitai i alii ae e eseese foi ma alii. E le manatu le Atua e sili atu le lelei pe sili atu le taua o le isi itupa nai lo le isi. Na folafola atu e Peresitene Hinckley i tamaitai faapea “o lo tatou Tama Faavavau … e lei fuafuaina lava faapea e itiiti ifo outou nai le mamalu faapaleina o Ana foafoaga.”4
O alii ma tamaitai e eseese meaalofa, eseese malosiaga, ma eseese vaaiga po o manatu ma lagona. O se tasi lea o mafuaaga autu tatou te manaomia ai le tasi ma le isi. E manaomia se alii ma se tamaitai e fausia se aiga, ma e manaomia le alii ma le tamaitai e faataunuuina le galuega a le Alii. O le tane ma le ava amiotonu o loo galulue faatasi e faaatoatoaina e le tasi le isi. Ia tatou faaeteete e aua nei o tatou taumafai e faaleaga le fuafuaga ma faamoemoega a lo tatou Tama Faalelagi i o tatou olaga.
4. Ua Faamanuiaina i Tatou Uma e ala i le Mana o le Perisitua
A o alii ma tamaitai i le malumalu, ua faaeeina ia i laua uma le mana lava e tasi, o le mana o le perisitua. A o taitaiina le pule o le perisitua e ala i ki o le perisitua, ma ua na o alii agavaa o loo umia ki o le perisitua, o le mauaina o le mana ma faamanuiaga o le perisitua o loo avanoa i fanau uma a le Atua.
E agalelei lo tatou Tama o i le Lagi i Lona mana. E maua e alii ma tamaitai uma lenei mana e fesoasoani ai i o latou olaga. O i latou uma o e osia feagaiga paia ma le Alii ma e faamamaluina na feagaiga o le a agavaa e maua faaaliga faaletagata lava ia, ia faamanuiaina e ala i auaunaga a agelu, e fagatua ma le Atua, e maua le atoaga o le talalelei, ma mulimuli ane, ia avea ma suli faatasi ma Iesu Keriso i mea uma o i ai a lo tatou Tama.
5. E Tatau Ona Tatou Iloa ma Molimau Atu e uiga i le Mataupu Faavae
Tatou te manaomia ia tamaitai o le Ekalesia ia iloa le mataupu faavae a Keriso ma ia molimau atu e uiga i le Toefuataiga i soo se auala e te mafaia ai. E lei i ai se taimi sili ona faigata i le talafaasolopito o le lalolagi. Ua faaatoatoaina e Satani ma ana au ia auupega i la latou faaputuga mo le afe tausaga, ma ua latou poto masani i le faatamaiaina o le faatuatua ma le faalagolago i le Atua ma i le Alii o Iesu Keriso i totonu o le aiga o tagata.
Ua ia i tatou uma—o alii, tamaitai, talavou matutua, autalavou, ma tama ma teine—le Alii ma Lana Ekalesia ina ia puipuia, faasaogalemuina, ma ia faasalalau atu i le lalolagi atoa. Tatou te manaomia atili ia leo tulaga ese ma malosi ma le faatuatua o tamaitai. Matou te manaomia oe e aoao le aoaoga faavae ma malamalama i mea matou te talitonu i ai ina ia mafai ona e tuuina atu lau molimau e uiga i le moni o mea uma—a le o le tuuina atu o na molimau i se tolauapiga a Tamaitai Talavou, i se sauniga molimau, i se lautusi tusitusi, po o le Facebook. Ua na o oe lava e mafai ona faaalia i le lalolagi pe faapei ia foliga ma talitonuga o tamaitai a le Atua ua osia feagaiga.
Tuafafine, o la outou lio o faatosinaga o se lio tulaga ese—o se lio e le mafai ona kopiina e tagata. E leai se tasi e mafai ona puipuia lo tatou Faaola mai ni isi faatauanau po o le mana nai lo oe, o afafine o le Atua,—o oe o loo i ai se malosiaga ma le talitonuga i totonu. O le mana o le leo o se tamaitai ua liua e le mafuatiaina, ma ua sili atu ona manaomia e le Ekalesia o outou leo i le taimi nei nai lo se isi lava taimi.
Ou te tuuina atu lau molimau ua tatou i ai i se taimi ua tatau ai ona tatou tutu faatasi i le lotogatasi. E tatau ona tatou tutu faatasi—alii ma tamaitai, alii talavou ma tamaitai talavou, tama ma teine. E tatau ona tatou tutu atu mo le fuafuaga a lo tatou Tama Faalelagi. E tatau ona tatou puipuia o Ia. O loo ua tuleiesea o Ia. E le tatau ona tatou tutu vale o ni tagata o Le Ekalesia a Iesu Keriso o le Au Paia o Aso e Gata Ai ma faataga lena mea e tupu e aunoa ma le lototele e faaleo atu o tatou leo.
Ia faamanuia outou e le Atua ina ia maua le lototele e suesue ai ma ia iloa ia upumoni faigofie o le talalelei ona faasoa atu lea i soo se avanoa e te mauaina.