O Le Talitonuina o le Agavaa
Mai se faeasaite a le autalavou na tuuina atu i le aso 31 o Tesema, 2006.
Ou te fia talanoa faalauaitele atu e uiga i le auala e mafai ona maua ai se ituaiga faapitoa o le talitonuina.
O la’u savali ia te outou o se savali o le faamoemoe ma le faamalosiauga i le taimi nei ma i o outou olaga atoa. O le tele ia o faafitauli i le lalolagi, ae e tofu lava ia augatupulaga ma vaitau ma faafitauli. Aua le popolevale i ai, ma aua ne’i faavaivai ai. O le a faatumulia ia tausaga a sau i avanoa matagofie ma faamanuiaga sili. O le a faaauau pea ona tatou maua le alualu i luma i le faasaienisi ma tekinolosi, vailaau faafomai ma fesootaiga—o mataupu uma e faia le tele o mea e faatamaoaigaina ai o tatou olaga. Ua outou ola i se vaitau ua sili ona faamamaluina e lei iloaina muamua e le lalolagi, faatasi ai ma le tele o faamanuiaga o le aso ua oo mai i le tele o tagata i le salafa o le lalolagi nai lo se isi lava taimi muamua o le talafaasolopito. Ia manatua—e lei moemiti lou tinamatua i se masini tapeleti ao pei o ia o lou matua, ma e lei iloa e lou tamamatua ona ta se feau tesi. O lea, ia fiafia ai ma ola maloloina ma lelei.
Ou te tau atu lenei mea i se vaega ona o se tusiga sa ou faitau ai talu ai nei o loo tau mai ai o faamai o loo taatele i tagata talavou i le taimi nei e le o le mai suka po o le ma’i fatu po o le kanesa. (O na ituaiga o faafitauli e masani lava ona faapolopolo mo tagata o la’u tupulaga, ae le o outou.) Leai, sa lipotia mai, o faamai o loo mafatia tele ai i latou i lo latou talavou ma le vaitausaga o le 20, o le masalosalo o le tagata ia te ia lava, fefe i le lumanai, maualalo o le faatauaina o le tagata o ia lava, ma le le talitonuina o i latou lava faapea ma le lalolagi o loo siomia ai i latou.
E ui e fai si ou matua atu nai lo outou, ae ou te malamalama i na ituaiga o atugaluga aua o le tele lava o lo’u olaga talavou sa ou feagai ai foi ma tulaga o le le talitonuina o au lava ia. Ou te manatua le tauiviga mo ni togi lelei, ma le faamoemoe ia manumalo i se avanoa mo se sikolasipi, ma mafaufau pe aisea na foliga mai ai ua sili atu le talenia o isi i lena vaega nai lo au. Ou te manatua le tele o tausaga o tauvaga afeleti lea na ou taumafai ai ina ia taalo ma se talitonuga ina ia faamanuiaina i taaloga a le aoga maualuga ma le kolisi, i le manao ma le faananau tele ina ia manumalo i se taaloga taua po o le manumalo i se suega siamupini lea na moomoo i ai le au. Ou te manatua faapitoa le leai o se talitonuga i teine, ma o le tele o taimi, o le popolega tele lea i alii talavou. Ou te matua faafetai i le tuuina mai e Sister Holland o se avanoa ia te au. Ioe, e mafai ona ou manatuaina mea uma e te manatuaina—ou te le mautinoa pe na faapefea o’u foliga pe sa taliaina au pe faapei le lumanai mo au.
O lo’u faamoemoega iinei e le o le talanoaina o na faafitauli uma e feagai ma se tagata talavou lea o le a oo mai ai le masalosalo o le tagata ia te ia lava ma le leai o sina talitonuga, ae ou te fia talanoa faalauaitele e uiga i le auala e maua ai se ituaiga faapitoa lava o le talitonuina—o se talitonuga lea, pe a mauaina sa’o, o le a faia ai ni mea ofoofogia mo isi vaega uma o o tatou olaga, aemaise lava lo tatou faatauaina o i tatou lava ma le ala tatou te tagatagai atu ai i le lumanai. O le tuuina atu o lenei manatu, e manaomia ai ona ou faamatalaina se tala.
O Le Taua o le Agavaa Faaletagata Lava Ia
I le tele o tausaga ua mavae atu nei, a o le’i taitai valaauina au e avea ma se Pulega Aoao, sa ou auai ai o se failauga i se konafesi a talavou matutua. Sa faaiuina le konafesi i se sauniga molimau, lea sa tu ai i luga se faifeautalai talavou aulelei ua maea lana misiona ma tuuina atu lana molimau. Sa lelei, mama, ma toafimalie ona foliga—e pei lava ona tatau ai ia foliga o se faifeautalai ua maea se misiona.
Ina ua amata ona tautala atu, na loimatā ona mata. Sa ia ta’ua lona agaga faafetai i le tu ai i le lotolotoi o se vaega maoae o le autalavou o le Au Paia o Aso e Gata Ai ma maua se lagona lelei e uiga i le olaga sa ia taumafai e ola ai. Ae na o le pau le mea na mafai ai ona maua lena lagona, o lana tala lea, ona o se aafiaga sa oo i ai o ia i ni nai tausaga ua mavae atu, o se aafiaga na mamanuina ai lona olaga e faavavau.
Ona ia faamatalaina lea o le taimi sa foi mai ai i le fale mai se tafaoga faamasani ae lei leva ona faauuina o ia o se toeaina i le 18 tausaga. Sa i ai se mea na tupu i lena aso lea na le fiafia ai o ia. Na te lei faamatalaina auiliili mai, ae e le tatau foi ona ia faamatalaina i se nofoaga faitele. E oo mai i lenei aso ou te le iloa lava le tulaga o le mea na tupu, ae na taua tele ia te ia aua na aafia ai lona agaga ma lona tulaga faatauaina faaletagata lava ia.
Ao nofo o ia i lana taavale mo sina taimi i le auala taavale o lona fale, ma mafaufau loloto ma lagonaina le faanoanoa moni mo le mea na tupu, sa tamoe mai ma le popole lona tina e le lotu mai le fale ma agai sao mai lava i lana taavale. I lena lava taimi sa tau atu [e le tina] ia te ia sa pa’ū le uso laitiiti o lenei alii i le fale, ma sa malosi le tau o lona ulu i lalo ma e foliga mai ua tau oso ai sona ma’i maliu. Sa vave ona valaauina e le tama le lotu le taavale a le falemai, ae e fai sina tuai o le taimi e oo mai ai le fesoasoani.
“Sau e fai se mea,” sa tagi mai ai o ia. “E leai ea se mea a le tou Ekalesia e te faia i taimi faapenei? O loo ia oe le latou perisitua. Sau e fai se mea.”
E lei malamalama tele lona tina e uiga i le Ekalesia i lena taimi, ae sa ia iloaina se mea e uiga i faamanuiaga faaleperisitua. Ae ui o lea, ina ua manaomia lona faatuatua ma lona malosi i lena po e se tasi na te matuai alofa lava i ai, sa le mafai ona tali atu lenei alii talavou. O le tauiviga ma lagona ma le fetuunaiga na ia lagonaina sa na faia—po o le a lava lena mea—sa le mafai ai ona ia alu atu i luma o le Alii ma ole atu mo le faamanuiaga lea sa manaomia.
Sa ia tamoe televave atu mai le taavale ma agai atu i le auala o le fale o se tamalii matua agavaa lea sa faauoina o ia i le uarota talu le liliu mai o le tama i le lua po o le tolu tausaga ua mavae. Sa faamalamalama atu, ma sa la taunuu i le fale ao lei taunuu atu ia fomai. O le faaiuga fiafia o lenei tala e pei ona faamatalaina i lena sauniga molimau o le tuuina atu lea i lena lava taimi e lenei tamalii matua o se faamanuiaga faaleperisitua matagofie ma mamana, ma mafai ai ona maua e le tamaitiiti na lavea le to’a ma se malologa ao lei oo i le taimi na taunuu atu ai le fesoasoani faafomai. O se malaga faatopetope i le falemai ma se suesuega auiliili iina na faaalia mai ai e leai ni tulaga faaleagaina tumau o i ai. Sa tea atu se tulaga faapopoleina o lenei aiga.
Ona fai mai lea o le faifeautalai ua maea lana misiona lea ou te talanoa atu ai: “E leai lava se tasi e lei fetaiai ma le mea sa feagai ma au i lena po o le a iloaina le maasiasi na ou lagonaina ma le faanoanoa sa ou oo i ai i le le lagonaina o le agavaa e faaaoga le perisitua sa ou umiaina. O se manatuaga sili atu ona tiga mo au ona o lou lava uso laitiiti lea sa manaomiaina au faapea ma o’u matua pele e le auai i le ekalesia o e sa popole ma o e sa i ai se aia e faamoemoeina ai ni mea e sili atu mai ia te au. Ae ao ou tu atu i o outou luma i le aso, ou te folafola atu ia te outou le mea lenei,” o lana tala lea. “Ou te le atoatoa, ae mai lava i lena po ou te lei toe faia lava se mea e taofia ai au mai le alu atu i luma o le Alii ma le talitonuga ma ole atu mo Lana fesoasoani pe a manaomia. O le agavaa faaletagata lava ia o se taua lea i lenei lalolagi o loo tatou ola ai,” na ia faailoa mai, “ae o se taua o loo ou manumalo ai. Sa ou lagonaina le tamatamai lima o le tausalaga o faasino mai ia te au i se tasi taimi o lo’u olaga, ma ou te le o faamoemoe ina ia aua nei toe lagonaina pe afai e mafai ona ou faia soo se mea e uiga i ai. Ma, o le mea moni,” na ia faaiu mai ai, “e mafai ona ou faia mea uma e uiga i ai.”
Sa ia faamaeaina lana molimau ma saofai i lalo. O loo mafai pea ona ou vaai atu faalemafaufau ia te ia. O loo mafai pea ona ou vaai atu i tulaga sa matou i ai. Ma o loo mafai ona ou manatua pea le filemu atoa ma le faamomoiloto lea na mulimuli mai i lana lauga ina ua maua e tagata uma sa i ai i le potu sina taimi e sailiili loloto teisi ai lona agaga, ma tauto malosi teisi ai ina ia ola i nei upu mamana na tuuina mai e le Alii:
“Tuu le amiomama e teuteuina ai ou mafaufauga e le aunoa; ona solo malosi ai lea o lou lototele i luma o le Atua; ma o le a to ifo i luga o lou agaga le mataupu faavae o le perisitua e pei o le sau mai le lagi.
“O le a avea le Agaga Paia ma au soa e le aunoa, ma o lou tootoo o le a avea ma se tootoo le feliuliuai o le amiotonu ma le upumoni” (MF&F 121:45–46; faaopoopo le faamamafa).
Olioli i le Agaga o le Atua
Au uo talavou pele, ia maua se olaga matagofie. Mafaufau i le mea sili ma faamoemoe i le mea sili ma ia faatuatua i le lumanai. O loo i ai se olaga maoae mo oe o i luma atu. E alofa lou Tama Faalelagi ia te oe. Afai o i ai ni mea sese ua faia, e mafai ona e salamo mai ai ma faamagaloina e pei lava foi o lenei alii talavou. O loo ia te oe mea uma e te ola ai ma fuafua ai ma talitonu i ai. O le mauaina o le faamaoniga o lou mafaufau pe a tuua na o oe ma mea e te manatuaina o le a mafai ai ona e lagonaina le Agaga o le Atua i se auala e sili ona patino. Ou te manao ina ia e olioli i lena Agaga, ia lagonaina pea e le aunoa lena talitonuga i luma o le Alii. Ia tausia pea e mafaufauga mama le mama aiai o a tatou amioga i le asō ma a taeao ma le faavavau.