Ol Profet long OlTesteman
Jeremaea
“Jeremaea i bin laef long wan taem mo ples we i had, be Lod i bin letem hem i luk fastaem ‘wan taem blong hop long taem blong lata-dei ia blong kam tugeta blong Isrel.’”1 —Linda K. Beton, Rilif Sosaeti jeneral presiden
Foto blong buk i kam long dimdimich/iStock/Thinkstock; Jeremaea, I kam long Wolta Ren © IRI
Mi mi pikinini blong Hilkaea, wan pris long Anatot, kolosap Jerusalem. Long taem we mi yangfala, “toktok blong Lod i kam long mi, mo talem,
“Taem mi mi no wokem yu yet long bel blong mama blong yu, be mi mi save yu finis. Mo taem yu no bon yet, mi mi jusumaot yu, mo mi makemaot yu, mi mekem yu yu tabu, blong yu kam wan profet, blong yu talemaot tok blong mi long ol man blong olgeta kantri long wol.
Mi fiilim se mi no bin rere from koling ia, mo mi ansa, “Mi mi no save toktok, from we mi mi yangfala nomo.”
Lod i ansa, “Yu no talem se yu yu yangfala nomo. Yu mas go long ol man we mi bambae mi sanem yu go long olgeta, mo yu mas talemaot olgeta samting we mi bambae mi talem long yu.
“Yu no mas fraet long olgeta, from we mi bambae mi stap wetem yu blong blokemgud yu. “Nao hem i pusum han blong hem i kam, i tajem maot blong mi.2
Mi bin profesae long Jerusalem blong 40 yia, stat long 626 go kasem 586 b.k., long taem blong king Josaea, Jehoeakim, mo Sedekaea.3 mi bin laef long semtaem long Buk blong Momon profet Lihae. Tugeta, mitufala i bin tok agensem rabis fasin blong ol pipol long Jerusalem mo talemaot we taon ia bae Lod i smasem.4
Lod i bin komandem mi blong raetemdaon olgeta tok ya we hem i stap givim long mi long “wan buk.”5 Taem King Jehoeakim i bin harem ol profesi ia, hem i bonem buk ia. Lod i komandem mi blong raetem ol profesi ia bakegen mo putum moa toktok i go insaed.6
Mi gohed blong fesem hadtaem taem mi prijim toktok blong Lod. Pasuru, pikinini blong jif gavena, i wipim mi mo fasem mi. Ol rabis man ia oli wantem kilim ded mi from mi stap prij. Mi bin wan profet we oli no laekem, mo plante taem oli lokem mi mo putum mi long kalabus. Mi bin laef long wan bigfala taem blong nogud fasin.7
Be nomata se mi laef long medel blong hadtaem, Lod i letem mi luk fastaem se ol pipol blong Isrel bae oli kam tugeta long las dei, mo we Lod bae i raetem ol loa blong Hem “long ol hat blong olgeta,” mo we bae oli karem “wan siti, mo tu famle” i go long Saeon.8
Taem mi gohed blong prijim toktok blong Lod—iven long taem we i had—mi bin lanem se taem mi komitim mi long gospel i lid i go long pis. Taem yumi developem fasin ia blong givhan wetem Lod, yumi evriwan i save eksperiensem hop long medel blong ol trael mo hadtaem.