Al Al eo Am̧ Em̧m̧antata

Angela Olsen Center, Ohio, USA

Kōmeļeļe ko jān Bradley H. Clark

Ej kab m̧ōj aō kōļotak e leddik eo nejūm̧, Rebekah. Aō iien n̄an maron̄ kar kōļotak e ekar aetok, im ikar lukkuun in mōk.

Ke Rebekah kar letok n̄an ioon peiū, iaar obrak kōn en̄jake ekam̧ōņōņō ke iaar aikuj in al al eo aō em̧m̧antata, “N̄a Nejin Anij” (Al, nōm̧. 44). Uwaak eo aō m̧okta ekar, “Jaab, ilukkuun in mōk. Inaaj al n̄an e tokālik.” Innām eaar bar itok ļōmņak eo. Kōn menin, men̄e iaar m̧ōk, iaar jino al eoon eo kein kajuon. Ļeo pāleeō im jinō kar jino al ippa.

Ke ekar jem̧ļo̧k am al al eo, iaar en̄jake juon en̄jake ejenolo̧k ilo ruum̧ eo. Barāinwōt taktō eo, eo me kar aolepān iien eo ekar em̧m̧an an jerbal im kōjparok, kar to̧o̧r dān in kōm̧jaļaaļ ilo mejān. Ekar kam̧oolol kōm̧ kōn am kar al juon al eaiboojoj. Eaar ba bwe ilo aolepān iiō ko eaar kōmmouri kōrā ro rej kōļotak nin̄nin̄ ko, ej jan̄in kar en̄jake kain eo eaar en̄jake iien eo.

Iaar reilo̧k ilo en̄jake in im ļōmņak n̄e imaron̄ pukōt juon kape in al in im leļo̧k n̄an e. Men eo enana, iaar jino boub kōn mour in im meļo̧kļo̧ke.

Innām raan eo eaar jejjet bwe in bar ro̧o̧l im taktō. Ke taktō eo eaar etetal tok n̄an ruum̧ eo, mejān eaar m̧ōņōņō, im eaar bakwij eō. Eaar ba bwe eaar jab maron̄ kadiwōjļo̧k al eo jān kōļmenļo̧kjeņ eo an im eaar barāinwōt mōk in pukōt al eo ilo intōrnet bwe en maron̄ al kake n̄an baam̧le eo an. En̄in n̄e Jetōb Kwojarjar eo ej kakeememej eō bwe ij aikuj bōk juon kape in al eo n̄an e. Iaar kalim̧m̧uri liin bwe inaaj bar ro̧o̧ltok kōn al eo ilowaan wōt wiik eo.

Bon̄ōn eo iaar jar kōn jipan̄ n̄an pukōt karōk in al eo me enaaj lukkuun em̧m̧an n̄an liin. Ālkin rālepān eo juon, iaar wōrtar e juon CD eo ewōr al in ie. Ke ekar tōkektok ilo māeļ jet raan tokālik, ikar kijerjer in leļo̧k e n̄an liin.

Ekar lukkuun m̧ōņōņō ke ej bōke im kar kam̧oolol eō kōn menin leļo̧k eo. Liin eaar jiron̄tok eō bwe ekar jab lukkuun jeļā etke, al in ekar lukkun aorōk bwe en kwaļo̧k e n̄an baam̧le eo an. Ke kōm̧ ar wōnm̧aanļo̧k wōt im bwebwenato, iaar jab kwaļo̧k wōt n̄an e an em̧m̧an al eo ippa ak barāinwōt naan in kam̧ool eo aō kōn m̧ool eo ej katakin kake.

Ke iaar kattōrļo̧k n̄an m̧weo, iaar en̄jake iakwe an Jemedwōj Ilan̄ kōn juon iaan leddik ro Nejin—taktō eo aō. Ejeļā e im Ej iakwe e, im Ekōņaan bwe en meļeļe bwe e barāinwōt maron̄ ro̧o̧lļo̧k n̄an mour Ippān bar juon alen.