Ennaan eo an Būreejtōnji eo Kein Kajuon
Būreejtōn Monson ej Kūr n̄an Peran
Jān Būreejtōn Thomas S. Monson
Pija jān iStock/Thinkstock
Enan̄in juon awa em̧ootļo̧k, Būreejtōn Monson ekar lale, ak ta eo kōm̧ kar kajjitōk kake n̄an kōm̧m̧an kālet ko āinwōt juon ak roktak.
N̄an kōm̧m̧ani kālet ko rejim̧we, eaar ba, ej aikuj wōr ad peran—“peran eo n̄an ba jaab, peran n̄an ba aaet. Kōm̧m̧ani kālet ko ak jek ņaļōmen mejān kajjik eo.1
Ilo ennaan kein, Būreejtōn Monson eaar kakeememej Armej ro Rekwojarjar bwe ren bōk peran n̄an jutak kōn m̧ool im jim̧we, n̄an jurake ta eo rej tōmake, im n̄an jeļm̧ae juon laļ eo ej kowaan aorōk ko im pedped ko indeeo.
Eaar ba, “Peran ej itok n̄an kōj kajjojo.” “Enaaj āindein, im enaaj āindein n̄an indeeo.”2
Peran ej Bōktok kōjeram̧m̧an an Anij
“Jenaal aolep jeļm̧ae mijak, en̄jake būrom̧ōj, im ioon jum̧ae. Jen—aolep—bōk peran n̄an jum̧ae lōmņak eo ebun̄bun̄, peran eo n̄an jurake pedped in katak ko ad. Peran, jab lelaļļo̧k jon̄ok ko am̧, ej bōktok ettōn̄ dikdik im kōmālim an Anij. Peran ej erom juon men emour im etoojlo̧k n̄e ej kalimjōke ejjab wōt āinwōt juon kōņaan n̄an mej kōn utiej, bōtaab kālet mour eo em̧m̧an. Ilo ad wōnm̧aanļo̧k, kajieon̄ ilo ad mour, jenaaj lukkuun bōk jipan̄ eo jān Irooj im maron̄ lo inem̧m̧an ilo naan ko An.”3
Jutak kōn Peran
“Ta meļeļe in niknik n̄an jem̧ļo̧kin? Em̧m̧an ippa meļeļein: jutak kōn peran. Peran emaron̄ menin aikuj bwe kwon tōmak; enaaj ilo tōreen menin aikuj ilo am pokake. Enaaj lukkuun menin aikuj ilo am niknik m̧ae raan eo n̄e kwonaaj likūt mourin.”4
Bōk Peran n̄an Jurake M̧ool eo
“Ij kōjatdikdik bwe kwonaaj bōk peran n̄an jutak kōn m̧ool im jim̧we. Kōnke jon̄ok ko ilo jukjukin pād in em̧ōj aer kiiō em̧akūt jān aorōk ko im pedped ko an Irooj kar litoki, jemaron̄ in jeļa n̄an jurake ta eo jej tōmake. N̄e pedped in naan in kam̧ool eo am epen, enaaj pen ilo am jurake ņae ro rej kowaan tōmak eo am. N̄e epen, naan in kam̧ool eo am kōn ko̧jpeļ in, kōn Rilo̧mo̧o̧r, im kōn Jemedwōj Ilan̄ naaj im̧we aolep kōm̧m̧an ko am ilo aolepen mour eo am.”5
Jej Aikuj Jetōb im Peran
“Ennaan ko rej waļo̧k ilo tipi, pija ko, im ilo media ko jet [rainin] elukkuun pen ilo wāween jum̧aeik ta eo me jej kōņaan bwe ajri ro nejid ren bōke im kōjparoke. Ejjab ad wōt eddo n̄an katakin er bwe ren pād ilo men ko an jetōb im katak ko ak ebarāinwōt jipan̄ er pad etto ļo̧k, jekdo̧o̧n ta eo remaron̄ ioone. Enaaj bōk iien im ad kijejeto—im n̄an maron̄ jipan̄ ro jet, kōj make jej aikuj bōk peran ilo jetōb im ilo kanniōk n̄an jurake nana eo jej loe ilo aolep jikin.”6
Kōm̧m̧an bwe Jen Peran
“Ilo ad etal m̧aan ļo̧k raan n̄an raan, emaron̄ in alikar bwe tōmak eo ad enaaj idajon̄jon̄. Jemaron̄ ilo iien ko lo kōj make jebool kōn armej ro jet im erom̧ m̧ōttan bōnbōn eo edik kōn ta eo watōke em̧m̧an im ta eo ejjab. …
“Jen peran im pojak n̄an jutak kōn ta eo jej tōmake, im eļan̄n̄e jenaaj jutak iaad ilo iaļ in, jen peran ilo ad kōm̧m̧ane, kajoor kōn jeļā eo bwe ilo m̧ool jej jāmin make iaad n̄e jej jutak kōn Jemād ilo Lan̄.”7