Kareel eo Ekajoor ilo Jetōb ippān Kōrā ro
Rijeje eo ej jokwe ilo Utah, USA.
Jejeļā ke kōn kajoor in jetōb eo ilo kōj?
KŌRĀ RO NEJIN JUON ANIJ, JĀN KATLEEN PETERSON, JAB MARON̄ KAPEIKI
Elōn̄ kōrā ro rōm̧m̧an, kōrā ro rettā ilo Kabun̄ in ro rej leļo̧k jerbal in jipan̄ eo ewūjlepļo̧k kōn ejjeļo̧k kōmtālik kōn ta eo ejelet mour ko aer—āinwōt waanjon̄ok in jerbal in jipan̄ ko ilo ānbwin, ak ebarāinwōt leen m̧akūtkūt in kajoor in jetōb eo aer. Juon iaan kōrā rein ej eo jibū, Cherie Petersen. Ekar tiljek im jerbal ilo elōn̄ kūr ko ilo aolepān mour eo an. Eļan̄n̄e kwonaaj kar kajjitikini, enaaj kar ba ejjab kanuuj bwe kapāāl ippān n̄an an kōjerbali ilo laļ in. Bōtaab, ilo aō kar jino ekkatak kake mour eo an, iaar kile jon̄an an ļap kajoor in jetōb eo ippān eo ekar jelet mour eo aō.
Jinen im jemān Cherie raar bōjrak aer itok n̄an jar im rekar jepel ke ekar lukkuun dik, innām ekar rūttoļok ippān jinen, Florence, eo ekar aolep iien jerbal. Florence ekar bareinwōt juon eo eļapļo̧k an kar jool āinwōt juon ajri, ilo an kar rūttoļo̧k ilo jikuuļ eo rej likūt ajri ro ie bwe ren jokwe ie, ilo an jinen, Georgia, eo ekar mour ilo wijwaan ko an mour in. Mekarta wāween ko reppen ekar iiooni ke ekar rūttoļo̧k, Cherie ekar niknik wōt ilo gospel in, tiljek ilo an itok wōt n̄an jar ippān baam̧le eo an eo jibūn jinen Elizabeth im ippān ro m̧ōttan. Ekar lo ippān baam̧le eo aer ta eo ekōņaan n̄an baam̧le eo an make. Ekar jab lukkuun jeļā ta eo juon baam̧le ej aikuj in āinwōt, ak ekar jeļā ta eo ejjab aikuj in āinwōt, im ekar ļōmņak bwe baam̧le eo an en kab naaj oktak ilju im jekļaj.
Ļeo pāleen Cherie–Jimma Dell–juon iien ekar ba n̄an eō, “N̄an bōk juon naan in kam̧ool ej aikuj wōr am̧ kōņaan bwe en wōr. Cherie aolep iien ej kōņaan bwe en wōr an naan in kam̧ool. Bōtaab ilo jinoin kar pālele eo aer ekar obrak kōn wāween ko reppen, raar kajjieon̄ bwe ren pen wōt āinwōt juon baam̧le. Raar jāniknik ilo iiō eo m̧oktata in pālele eo aerro itok wōt jen jikejuuļ in jerbal eo an Dell, ak juon kūr n̄an jerbal ilo Būraimere ekar im̧we Cherie n̄an jino bar kobatok, im Dell ekar bar jino kobaļo̧k ippān n̄an jar āinwōt juon rikakpilōklōk ilo doulul eo an tikōn ro. Erro ļak kar jim̧or niknik ilo Kabun̄ in jān iien eo. An Cherie m̧ōņōņō in jerbal im leke n̄an ejaake juon baam̧le ekajoor ekar jipan̄ jinō erom juon kōrā ekajoor, waanjon̄ok eo an jinō ekar jipan̄ eō ļam̧ļam̧e mour eo aō, eļaptata āinwōt kiiō ij jino baam̧le eo aō make.
Āinwot kōrā ro, emaron̄ wōr juon kareel ekajoor ippād n̄an mour ko an ro otemjej ipeļaakid. Ilo m̧ool, Joseph Smith ekar katakin bwe eddo eo ad “ejjab wōt n̄an jipan̄ ro rijeram̧ōļ, ak n̄an lo̧mo̧o̧ren jetōb ko aer.”1 Jisōs Kraist ej kūr kōrā ro ilo Kabun̄ eo An n̄an aer erom̧ An rijilōk im bwe ren kajoor ilo Jetōb. Kajoor im kareel in jetōb eo ad eļap tokjāer im raorōk ilo eddōkļo̧k eo an jerbal in lo̧mo̧o̧r, im jej aikuj pukot iien ko rōm̧m̧an n̄an kōkajoorļo̧k ro ipeļaakid ilo jetōb. Ilo ad kōm̧m̧ane, kajoor in kareel in tōmak im wāppen eo ad enaaj tōpar ijo jeban maron̄ loe.
Kūr n̄an Erom̧ Rijilōk ro
Elder James E. Talmage (1862–1933) jen Doulul eo an Jon̄oulruo Rijilōk ro ear jeje, “Rijipan̄ eo em̧m̧an tata ilo laļ in n̄an kōrā im jabdewōt kōrā ej Jisōs Ri Kraist eo.”2 Ļōmņak, n̄an waanjon̄ak, kōn ta eo E ekar katakin ruo iaan ro rikaļoran ilo kalim̧m̧ur ekāāl, sister Meri im Matha. Bok eo Daughters in My Kingdom ej kōmeļeļeiki: “Luk 10 ekitbuuj juon bwebwenato in an Matha kōppeļļo̧k m̧weo im̧ōn n̄an Jisōs. Liin ekar jerbal n̄an Irooj ilo an kake aikuj ko An ilo mour in kanniōk, im Meri ear jijet waneen M̧aajta eo im ron̄jake katak ko An.
“Ilo tōre in kōrā ro rekōn jipan̄ wōt ilo jerbal ko ilo ānbwin, Rilo̧mo̧o̧r eo ekar katakin Matha im Meri bwe kōrā ro remaron̄ barāinwōt bōk koņaer ilo jerbal in jetōb eo An. Ekar karuwaineneik er n̄an erom An rikaļoor im bōk lo̧mo̧o̧r, ‘m̧ōttan eo an menin’ bwe menin ejāmin naaj bōk jān er.”3
Āinwōt Matha, jet iien jej bōd im lōmnak bwe eddo eo eļap tata an kōrā ej kōm̧m̧an jerbal ko ilo ānbwin, āinwōt kōpooj m̧ōn̄ā ko, keke, im karreo n̄an ro jet. Jerbal in jipan̄ ej wūjlepļo̧k eo eaorōk im ekam̧ōņōņō, ijoke, men̄e eļapļo̧k An aikuji kōrā ro remaron̄ keke kōmat, Irooj ej aikuji kōrā ro ewōr aer kajoor ilo jetōb ro retōmak, wāppen, im iakwe em̧ool ej rom̧aak ilo mour. E ejeļā bwe kōj kajjojo eļap ijo koņaad n̄an leļo̧k. Jisōs Kraist ej kūr kōj wōj aolep n̄an ejaake kajoor ko ad ilo jetōb im maron̄ eo ad n̄an bōk im m̧akūtkūt ekkar n̄an revelesōn eo n̄an kōm̧akūt m̧aanļo̧k jerbal eo An. Linda K. Burton, Būreejtōn eo eutiej an Doulul eo an Kōrā ro, ekar ba n̄an kōrā ro, “Kwaar jilkintok n̄an laļ ilo tarlepin iien in kōnke wōn kwe im ta eo kwaar m̧aanjebpopo n̄an kōm̧m̧ane! Mekarta ta Satan enaaj kajjieon̄ n̄an kareel kōj n̄an ļōmņak wōn kōj, kadkad eo ad em̧ool ej bwe juon rikaļoor an Jisōs Kraist!4
Irooj ejeļā kajeed im jekjek ko jepād ie, E ewōr juon an jerbal n̄an kōj n̄an kōm̧m̧ane ioon laļ in. Ejjeļo̧k kōrā ejeļā jidik wōt ak ewōr jejjo tōļan ko ippān n̄an erom̧ juon kareel ekajoor ilo jetōb n̄an em̧m̧an im n̄an bōktok ro jet n̄an Kraist. Kōn kōjatdikdik in ekwojarjar ewōr ippād eddo eo n̄an erom̧ ritōl ro ilo jetōb ilo m̧ōko im̧ōd im jukjukinpād ko ad. Elder M. Russel Ballard jen Doulul eo an Joñoulruo Rijilōk ro ear ba: “Aolep sister ilo Kabun̄ in ro raar kōm̧m̧an bujen ko ippān Irooj ewōr ippāer juon eddo ekwojarjar n̄an jipan̄ lo̧mo̧o̧ren jetōb ko, n̄an tōl kōrā ro ilo laļ in, n̄an kōkajoorļo̧k m̧ōko ilo Zaion n̄an kalōk aelōn̄ in kiin̄ eo an Anij.”5
Jej jab aikuj pād ilo jerbal ko routiej ak kōm̧m̧an men ko reļļap n̄an jipan̄ ro ipeļaakid kōm̧m̧an kālet ko renaaj kepaakeļo̧k er n̄an Jisōs Kraist—eddo eo ad eaorōk tata. Men ko reļļap im ko reddik jim̧or jej kōm̧m̧ani ilo mour an juon ak ruo armej, men̄e ilowaan wōt baam̧le eo ad, enaaj wōr oktak eļap.
Kōrā ro ilo Jerbal in Lo̧mo̧o̧r eo
Juon al em̧m̧an ej ba, “Jerbal eo an enjeļ ro ej ilo̧k n̄an kōrā ro; Im menin ej menin leļo̧k eo me, āinwōt sister ro, jej ba,”6 Eļap ijo jemaron̄ door ilo mour ko an ro otemjej jej iakwe. Elder Richard G. Scott jen Doulul eo an Jon̄oulruo Rijilōk ro ekar kwaļo̧k bwebwenato ko kōn wāween an kar kajoor in jetōb eo an kōrā ro ruo kar im̧we mour eo an:
“Ke iaar juon ajri, jema eaar jab juon membōr in Kabun̄ in im jinō eaar jino janiknik. Jet allōn̄ ālkin birthday eo aō kein karuwalitōk, Bubu Whittle eaar lotok kōm̧. Bubu eaar inepata kōn n̄a im ļaddik eo jeiū eļan̄n̄e kom̧ro ar jab peptaij. Iaar jab jeļā ta eo eaar ba n̄an ro jinō im jema kōn inepata in, ak ij lukkuun jeļā bwe juon jibbon̄ eaar bōk ļaddik eo jeiū im n̄a n̄an juon baak im kar kwaļo̧k n̄an kōmro kōn en̄jake ko an kōn aorōk eo an peptaij im pād emakijkij ilo kweilo̧k ko an Kabun̄ in. Iaar jab kemeemej lukkuun ta ko eaar ba, ak naan ko an raar m̧weer ilo būruwō, im tok ālik ļaddik eo jeiū im n̄a kar peptaij. …
Būbū eaar kwaļo̧k peran im kōņaan jipan̄ jem̧ōm̧ kile aorōk eo ilo an bōk ļo̧k kōm̧ n̄an im̧ōn jar eo n̄an kweilo̧k ko am̧. Ilo jabdewōt wāween ko rejjejet, eaar jipan̄ kōm̧ n̄an en̄jake juon aikuj eo an ko̧jpeļ eo ilo mour ko am.”7
Armej eo kein karuo ekajoor jetōb eo an ej kōrā eo pāleen Elder Scott, Jeanene. Ke erro kar jino jem̧jerāik doon erro kar jino bwebwenato kōn ilju im jekļaj eo aerro. Jeanene, eo ekar rūttoļo̧k ilo juon imōn mijinede eo ekajoor, eaar kwaļo̧k an kōņaan m̧areik juon eo ej kab ro̧o̧ltok jān mijen ilo tampeļ eo. Elder Scott, eo ekar jab lukkuun ļōmņak kōn juon mijen m̧okta, eaar lukkuun oktak n̄an lijūr aō n̄an kōļmenļo̧kjeņ. “Iaar ro̧o̧l n̄an kapijuknen im jab maron̄ ļōmņak kōn jabdewōt men. Iaar ruj aolepen bon̄on eo. … Ālkin elōn̄ jar ko iaar kōm̧m̧ane jokālet eo n̄an ioon bisop eo aō im jino peba in mijen eo aō.”8 Men̄e Jeanene ekar leļo̧k n̄an e tōl im im̧we eo eaikuji, Elder Scott eaar ba, “Jeanene eaar jab ba bwe in jerbal e juon mijen n̄an e. Eaar iakwe eō n̄an kwaļo̧k tōmak ko an im letok n̄an eō iien em̧m̧an n̄an jerbale iaļen mour eo aō make. Kōm̧ro jim̧or kar jerbale mijen ko im tok ālik kar liāp ilo tampeļ eo. Peran eo an Jeanene im wūjļepļo̧k eo n̄an tōmak eo an eaar kōm̧m̧ani aolep oktak ko ilo mour ko amro jim̧or. Ijeļā bwe kom̧ro ban kar lo m̧ōņōņō eo kōm̧ij loe n̄e eban kar tōmak eo an ekajoor ilo pedped eo n̄an jerbal n̄an Irooj m̧oktata. Ej juon kōrā em̧m̧an, waanjon̄ak em̧m̧an!9
Ekar jen kareel eo ekajoor ilo jetōb an kōrā in enjeļ rein ilo mour eo an ro rekar jipan̄ juon likao—Elder Scott—kōm̧m̧an jet kālet ko raorōk tata ilo mour eo an: n̄an peptaij, n̄an jerbal juon mijen, im n̄an m̧are ilo tampeļ eo.
Jemaron̄ jipan̄ ro jet kōņaan in kōm̧m̧an kālet ko rem̧m̧an jān waanjon̄ok eo ad, m̧akūtkūt ko, naan ko, im wāppen eo ad make. Sister Carole M. Stephens, rikakpilōklōk eo kein kajuon ilo būreejtōnji eo eutiej an Doulul eo an Kōrā ro, ej kwaļo̧k, “Jej leddik in bujen ro ilo aelōn̄ in kiin̄ eo an Irooj, im ewōr ippād iien eo em̧m̧an n̄an kein jerbal ko ilo Pein. Jino ad bōk kuņaad ilo jerbal in lo̧mo̧o̧r kajjojo raan ilo wāween ko reddik im ļam waan—mije, kōkajoorļo̧k, im katakin doon,”10 Ilo ad kōjatdikdik kōn jetōb im kate kōj m̧aanļo̧k ilo m̧ool im kate ko rōttā n̄an jipan̄ ro ipeļaakid bwe ren itok n̄an Kraist, jenaaj lo tōl ilo ta eo jemaron̄e im bōk kajoor n̄an kōm̧m̧ane, im jenaaj en̄jake m̧ōņōņō eo kōn ad bōktok ajri ro nejin Irooj n̄an E.
Erom̧ juon Kareel Ekajoor ilo Jetōb.
Jeļā eddo eo ad, jemaron̄ kajjitōk āinwōt rikaļoor ro etto, “Ta eo kōmin kōm̧m̧ane” (Jerbal 2:37) n̄an erom̧ juon kareel ekajoor ilo jetōb. Ilo kweilo̧k eo eļap ej kab jem̧ļo̧kļo̧k, Sister Burton ekar kajjitōk ippān sister ro n̄an kōļmenļo̧kjeņ kōn “jet jain ko ilo jetōb “jipan̄ riaikuj” rejelet jerbal in lo̧mo̧o̧r in:
-
Jipan̄ riaikuj: ro jinen im jemān rej karūttoļo̧k ajri ro nejier ilo meram im m̧ool
-
Jipan̄ riaikuj: leddik … , sister ro … , m̧am̧a ro … , riliki ro, bubu ro, im ro rem̧ool n̄an jerbal āinwōt rikatakin ro im leļo̧k pein jipan̄ ko ikebonin iaļ in bujen eo
-
Jipan̄ riaikuj: ro rej eo̧ron̄ im̧we ko an Jetōb Kwojarjar eo im m̧akūtkūt ekkar n̄an im̧we ko rej būki
-
Jipan̄ riakuj: ro rej mour kōn ko̧jpeļ eo aolep raan ilo wāween ko reddik im reļam waan
-
Jipan̄ riaikuj: rijerbal in menmenbwij an baam̧le im tampeļ n̄an kobaik baam̧le ko indeeo
-
Jipan̄ riaikuj: mijenede ro n̄an kajedeede “nuuj ko rem̧m̧an”—ko̧jpeļ eo an Jisōs Kraist
-
Jipan̄ riaikuj: rilo̧mo̧o̧r ro n̄an pukōt ro rejebwābwe ilo iaļ eo aer
-
Jipan̄ riaikuj: rikōjparok bujen ro n̄an jutak pen kōn m̧ool im jim̧we
-
Jipan̄ riaikuj: rikaļoor ro em̧ool an Irooj Jisōs Kraist11
Men kein rejjab kāāl, ak eļan̄n̄e jej pukōt kilen bwe en maron̄ wōr iien em̧m̧an n̄an bōk koņaad ilo jerbal in lo̧mo̧o̧r, jenaaj kōļapļo̧k m̧aron̄ eo ad n̄an jipan̄ ro otemjej ipeļaakid. Elder Ballard ekar ba, “Ejjeļo̧k men en ilo lalin elukkuun make wōt, ej kokajririk, ak ej ukot mour āinwōt men ko rej waļo̧k jen juōn kōrā eo ejim̧we”12 Ilo ad ejaake kajoor in jetōb eo ad jān jar eo ad make im ekkatak jeje ko rekwojarjar, dim ilo pokake, im tiljek kōjparok bujen ko ad, jenaaj erom̧ kain kareel in ekajoor.
Ilōn̄in Ta Eo Jemaron̄ Loe
Būreejtōn Brigham Young (1801–1877) ekar ba. “Kom̧ maron̄ ba jon̄an em̧m̧an eo m̧am̧a im leddik ro in Israel rej maron̄e n̄an kōm̧m̧ane? Jab, eban tōprak. Im men eo em̧m̧an renaaj kōm̧m̧ane enaaj ļoor er n̄an indeeo.”13
Kālet ko rejim̧we an jibu kar jelet epepen ko an rem̧ootļo̧k kōn ta eo ekar maron̄ loe āinwōt juon kōrā. Bōtaab, kareel eo ekajoor ilo jetōb an kōrā ro ilo baam̧le eo aō rekar wanlikļo̧k n̄an tōre ko m̧okta. Cherie ekar bōk eļap jān kajoor in jetōb eo an make jān an lale an jibun jibun (jibun eo kein kajilu likļo̧k) Elisabeth. Waanjon̄ok eo an Elizabeth kōn tōmak etōbar ruo epepen likļo̧k ikijeen jāniknik im ejipan̄ leddik eo jibūn Cherie ukōt wāween eo ikijeen rub in baam̧le im bar jepļaaktok n̄an Kabun̄ in.
Ilo ad erom̧ kajoor ilo jetōb n̄an ro otemjej ipeļaakid, kareel eo ad ekajoor enaaj erakrakļo̧k ilōn̄in ta eo jemaron̄ loe. Būreejtōn Gordon B. Hinckley (1910–2008) ekar ba, “Jej kūr ioon kōrā ro an Kabun̄ in n̄an jutak ippān doon kōn wāppen. Rej aikuj ijjino ilo m̧ōko m̧weer make. Remaron̄ katakin menin ilo kūlaaj ko aer. Remaron̄ kōnono kake ilo jukjukinpād ko aer. …
“Ij loe menin āinwōt juon kōjatdikdik erabōlbōl an meram ilo juon laļ eo ej make wōnm̧aanļo̧k ilo kakkure e make.14
Ilo ad kakūrm̧ool kean̄ in, jerbal eo an Irooj enaaj rōjan̄ kōj wōnm̧aanļo̧k jim̧or ilo laļ in ipeļaakid im, eļaptata, ilo baam̧le ko ad im mour ko an ro jej iakwe.