Mga Importanting Panghitabo sa Ika-185 nga Tinuig nga Kinatibuk-ang Komperensya sa Ang Simbahan ni Jesukristo sa mga Santos sa Ulahing mga Adlaw

“Ang mga hilisgutan sa mga pakigpulong sa kinatibuk-ang komperensya gisangun—dili pinaagi sa mortal nga awtoridad apan pinaagi sa mga pag-aghat sa Espiritu,” mipasabut si Elder Dallin H. Oaks sa Korum sa Napulog Duha ka mga Apostoles (pahina 32). Sa makapadasig nga kinatibuk-ang komperensya nga gisugdan sa kinatibuk-ang sesyon sa mga babaye ug gitapos sa Dominggo sa Pasko sa Pagkabanhaw, ang mga mamumulong naghisgot kabahin sa pamilya, pagpuasa, buhat sa templo, pagkadisipulo, Igpapahulay, ug sa Pag-ula sa Manluluwas, mao ang pipila sa gihisgutan sa daghang mga baruganan sa ebanghelyo (tan-awa sa pahina 3).

Ang mosunod mao ang pipila ka importanting mga panghitabo:

• Si Presidente Thomas S. Monson mipahibalo sa bag-ong mga templo nga tukuron sa Abidjan, Ivory Coast; Port-au-Prince, Haiti; ug Bangkok, Thailand. Kabahin niini, siya miingon, “Pagka-talagsaon sa mga panalangin nga giandam alang sa atong matinud-anong mga miyembro niini nga mga dapit ug, sa pagkatinuod, bisan asa sa tibuok kalibutan nga adunay mga templo” (pahina 91).

• Ang mga miyembro sa Simbahan mipaluyo og lima ka bag-ong sakop sa Unang Korum sa Seventy, bag-ong kinatibuk-ang kapangulohan sa Young Men, ug bag-ong magtatambag sa kinatibuk-ang kapangulohan sa Primary.

• Ang tinuig nga estatistikanhong report mitala sa 15.3 ka milyon nga mga miyembro sa Simbahan sa 3,114 ka mga stake ug 561 ka mga district. Tulo ka bag-ong mga templo ang gipahinungod sa miaging tuig, nakapahimo nga aduna nay 144 ka mga templo ang magamit.

• Ang komperensya gihubad sa 95 ka mga pinulongan. Nagsunod sa kausaban [innovation] nga gisugdan sa miaging Oktubre, tulo ka mamumulong namulong gamit mismo ang ilang pinulongan.

Namulong panahon sa Pasko sa Pagkabanhaw, pipila ka mga mamumulong nagpamatuod sa Pagkabanhaw sa Manluluwas. “Siya ang Anak sa Dios,” mipamatuod si Presidente Thomas S. Monson. “Siya kadtong mibangon gikan sa lubnganan niadtong unang kabuntagon sa Pasko sa Pagkabanhaw, Iyang gidala ang gasa sa walay katapusan nga kinabuhi alang sa tanang mga anak sa Dios” (pahina 93).