Nagpaabut sa Anak nga Nawala

Ni Elder Brent H. Nielson

Sa Seventy

Hinaut nga kita makadawat sa pagpadayag aron mahibalo sa labing maayo nga paagi unsaon pag-agni kadtong napahilayo sa atong kinabuhi.

Ang Manluluwas nga si Jesukristo migahin sa Iyang yutan-ong pangalagad sa pagtudlo sa Iyang pagpang-ayo ug makaluwas nga gahum. Usa ka higayon diha sa Lucas kapitulo 15 sa Bag-ong Tugon, sa tinuoray gisaway Siya sa pagkaon ug paggahin og oras sa mga makasasala (tan-awa sa Lucas 15:2). Gigamit sa Manunubos kini nga pagsaway isip oportunidad sa pagtudlo kanatong tanan unsaon pag-agni niadtong kinsa napahilayo sa ilang dalan.

Gitubag Niya ang Iyang mga kritiko pinaagi sa pagpangutana kanila og duha ka importanting mga pangutana:

“Kinsa bang tawhana kaninyo, nga may usa ka gatus ka mga karnero, nga kon kawad-an siyag usa ka buok niini, dili mobiya sa kasiyaman ug siyam diha sa kaawaawan, ug moadto sa pagpangita niadtong usa nga nawala, hangtud nga hikaplagan niya kini?” (Lucas 15:4).

“O kinsa bang babayhana nga may napulo ka buok nga mga drakma, nga kon siya kawad-an og usa ka buok niini, dili modagkot og suga, ug dili niya silhigan ang balay, ug dili niya kini pangitaon pag-ayo hangtud iyang makaplagan?” (Lucas 15:8).

Ang Manluluwas dayon mitudlo sa sambingay sa anak nga nawala. Kini nga sambingay dili mahitungod sa 100 ka karnero o sa 10 ka buok nga mga drakma [sinsilyo]; kini mahitungod sa usa ka minahal nga anak kinsa nawala. Pinaagi sa sambingay, unsa ang gitudlo kanato sa Manluluwas mahitungod unsay buhaton kon ang usa ka sakop sa pamilya nahisalaag?

Ang anak nga nawala mipahibalo sa iyang amahan nga gusto na niyang kuhaon ang iyang bahin sa katigayunan. Gusto niyang biyaan ang kaluwasan diha sa iyang panimalay ug pamilya ug naninguha sa kalibutanong mga tinguha (tan-awa sa Lucas 15:12–13). Palihug timan-i nga diha sa sambingay sa Manluluwas ang amahan mahigugmaong mitubag pinaagi sa paghatag sa anak nga lalaki sa iyang bahin sa katigayunan. Sa tinuod tingali gihimo sa amahan ang tanan niyang mahimo sa pagkumbinsir sa iyang anak nga lalaki sa pagpabilin. Hinoon, dihang ang hamtong nga anak nga lalaki mihimo sa iyang pagpili, ang iyang maalamong amahan mipalakaw kaniya. Niana ang amahan nagpakita og sinserong gugma, ug siya nagbantay ug siya naghulat (tan-awa sa Lucas 15:20).

Ang akong pamilya may samang kasinatian. Ang akong duha ka matinud-anong igsoon nga mga lalaki, talagsaong igsoon nga babaye, ug ako gipadako og sulundong mga ginikanan. Gitudloan kami sa ebanghelyo diha sa among panimalay, nahimong hamtong, ug kaming upat na-seal sa among mga kapikas sa templo. Bisan pa, niadtong 1994 ang among igsoong babaye, si Susan, nawad-an og gana sa Simbahan ug pipila sa mga pagtulun-an niini. Gidani siya niadtong kinsa mibiay-biay ug misaway sa unang mga lider sa Simbahan. Gitugutan niya ang iyang pagtuo sa buhing mga propeta ug mga apostoles nga mawala. Sa kadugayan, ang iyang mga pagduda mibuntog sa iyang pagtuo, ug mipili sa pagbiya sa Simbahan. Gihatagan ako og permiso ni Susan nga ipakigbahin ang iyang sugilanon uban sa paglaum nga kini makatabang sa uban.

Ang akong igsoong mga lalaki ug ako ug ang among byudang inahan nahugno. Dili kami makahunahuna unsa kahay hinungdan sa pagbiya niya sa iyang gituohan. Ang mga pagpili sa akong igsoong babaye ingon og nakapaguol kaayo sa among inahan.

Ang akong igsoong mga lalaki ug ako nakaserbisyo isip mga bishop ug mga presidente sa korum, ug among nasinati ang kalipay sa kalampusan uban sa mga miyembro sa ward og sa korum sa among pagbiya sa kasiyaman og siyam ug gipangita ang usa. Hinoon, sa among igsoong babaye, ang among makanunayong mga kahago sa pagluwas kaniya ug sa pagdapit kaniya sa pagpabalik nagduso lamang kaniya og samot sa pagpalayo.

Sa among pagpangayo og langitnong giya unsay husto namong buhaton kaniya, naklaro nga kinahanglan among sundon ang ehemplo sa amahan diha sa sambingay sa usikang anak. Si Susan mihimo sa iyang pagpili ug siya among gitugutan—apan gipahibalo namo siya ug gipabati sa among sinserong gugma alang kaniya. Ug busa, uban sa gibag-o nga gugma ug kalooy, kami nagbantay ug naghulat.

Wala gayud mohunong ang akong inahan sa paghigugma ug pag-amuma ni Susan. Sa matag higayon ang akong inahan mitambong sa templo, isulat niya ang pangalan ni Susan diha sa prayer roll, wala gayud kawad-i og paglaum. Ang akong magulang nga lalaki ug ang iyang asawa, kinsa nagpuyo duol kaayo ni Susan sa California midapit kaniya sa tanang mga kalihokan sa pamilya. Mag-andam sila og panihapon diha sa ilang panimalay sa birthday ni Susan kada tuig. Gisiguro nila nga kanunay silang mangumusta kaniya ug nga siya nakahibalo sa ilang tiunay nga gugma alang kaniya.

Ang akong manghud nga lalaki ug ang iyang asawa miadto sa mga anak ni Susan sa Utah ug giatiman ug gihigugma sila. Gisiguro nila nga ang iyang mga anak kanunay nga ma-imbitar sa mga pagpundok sa pamilya, ug sa miabut ang panahon nga bunyagan ang apong babaye ni Susan, ang akong igsoong lalaki miadto aron sa pagpahigayon sa ordinansa. Si Susan usab dihay mahigugmaong mga home teacher ug visiting teacher kinsa wala gayud moundang.

Sa nagmisyon ug nagminyo ang among mga anak, giimbitar ug gipatambong si Susan niini nga mga pagsaulog sa pamilya. Makugihon kaming naningkamot sa paghimo og mga kalihokan sa pamilya aron si Susan ug ang iyang mga anak mauban kanamo ug ilang mahibaloan nga, labaw sa tanan, amo silang gihigugma ug sila kabahin sa among pamilya. Sa pagdawat ni Susan og taas nga degree sa usa ka unibersidad sa California, didto kaming tanan sa pagsuporta kaniya sa iyang gradwasyon. Bisan tuod og dili namo madawat ang tanan niyang mga pagpili, kami sa tinuod makagakos kaniya. Among gihigugma, gibantayan, ug gihulat siya.

Kaniadtong 2006, human milabay ang 12 ka tuig sukad mibiya si Susan sa Simbahan, ang among anak nga babaye nga si Katy mibalhin ngadto sa California aron ang iyang bana makaeskwela og abogasiya [law]. Diha sila sa samang siyudad ni Susan. Kining batan-ong magtiayon misalig sa ilang iyaan sa tabang ug suporta, ug ilang gihigugma siya. Mitabang si Susan sa pag-amuma sa among dos anyos nga apong babaye, si Lucy, ug si Susan mitabang ni Lucy sa iyang mga pag-ampo sa gabii. Mitawag kanako si Katy usa ka adlaw ug nangutana kon nagtuo ba akong mobalik si Susan sa Simbahan. Gipaniguro ko siya nga ako nagtuo nga siya mobalik ug gikinahanglan namo ang padayon nga pagpailub. Samtang laing tulo ka tuig ang milabay, uban sa nagpadayong gugma, kami nagbantay ug nagpaabut.

Unom ka tuig ang milabay sukad niining tapos sa semana, ang akong asawa, si Marcia, ug ako nanglingkod sa atubangan niining Conference Center. Ako pagapaluyohan isip usa ka bag-ong General Authority nianang adlawa. Si Marcia, kinsa kanunay may impluwensya sa Espiritu, may mubo nga sulat kanako nga nag-ingon, “Ako naghunahuna nga panahon na para ni Susan sa pagbalik.” Ang akong anak nga babaye nga si Katy misugyot nga ako molakaw ug motawag ni Susan aron pagdapit kaniya sa pagtan-aw sa kinatibuk-ang komperensya nianang adlawa.

Giaghat niining duha ka talagsaong mga babaye, ako milakaw ngadto sa lobby ug mitawag sa akong igsoong babaye. Nadawat nako ang iyang voice mail ug gidapit lang nako siya sa pagtan-aw niana nga sesyon sa kinatibuk-ang komperensya. Nadawat niya ang mensahe. Sa among kalipay, gibati niyang motan-aw sa tanang sesyon sa komperensya. Nakadungog siya gikan sa mga propeta ug mga apostoles nga iyang gihigugma sa unang mga tuig. Nakadungog siya og bag-ong mga pangalan nga wala niya madunggi kaniadto, sama ni Presidente Uchtdorf ug Elder Bednar, Cook, Christofferson, ug Andersen. Atol niini ug sa ubang talagsaong balaang naimpluwensyahan nga mga kasinatian, ang akong igsoong babaye—sama sa anak nga nawala—nauli (tan-awa sa Lucas 15:17). Ang mga pulong sa mga propeta ug mga apostoles ug ang gugma sa iyang pamilya miaghat kaniya sa pagsugod og sunod sa ebanghelyo. Human sa 15 ka tuig ang among anak nga babaye ug igsoong babaye kinsa nawala nakaplagan. Ang pagbantay ug ang paghulat nahuman.

Gihulagway ni Susan kini nga kasinatian sama gayud sa paghulagway ni Lehi niini diha sa Basahon ni Mormon. Gibuhian niya ang gunitanan nga puthaw ug nakaplagan niya ang iyang kaugalingon diha sa gabon sa kangitngit (tan-awa sa 1 Nephi 8:23). Miingon siya nga wala siya makahibalo nga siya nawala hangtud ang iyang pagtuo napukaw pag-usab sa Kahayag ni Kristo, nga hayag kaayong mipakita sa dakong kalainan tali sa unsay iyang gisinati dinhi sa kalibutan ug unsay gitanyag sa Ginoo ug sa iyang pamilya.

Usa ka milagro ang nahitabo sulod sa unom ka tuig. Si Susan adunay nabag-ong pagpamatuod sa Basahon ni Mormon. Nadawat niya ang iyang temple recommend. Nagserbisyo siya isip usa ka ordinance worker sa templo, ug sa karon nagtudlo og klase sa Gospel Doctrine sa iyang ward. Ang mga tamboanan sa langit naabli ngadto sa iyang mga anak ug mga apo, ug bisan tuod dihay malisud nga mga sangputanan, ingon og wala gayud siya mibiya.

Daghan kaninyo, sama sa pamilya Nielson, adunay mga sakop sa pamilya kinsa temporaryong nahisalaag. Ang panudlo sa Manluluwas ngadto sa tanang may 100 ka karnero mao ang pagbiya sa kasiyaman ug siyam ug pag-apas ug pagluwas sa usa. Ang Iyang panudlo niadtong adunay 10 ka buok nga mga drakma [sinsilyo] ug nawad-an og usa mao ang pagpangita hangtud nga makit-an kini. Kon ang nawala mao ang inyong anak, inyong igsoon, ug siya mipili sa pagbiya, among nakat-unan sa among pamilya nga, human sa tanan natong buhaton, atong higugmaon kana nga tawo sa tibuok natong kasingkasing ug kita magbantay, kita mag-ampo, ug kita magpaabut sa impluwensya sa Ginoo diha kanila.

Tingali ang labing importanting leksyon nga gitudlo sa Ginoo kanako pinaagi niini nga proseso nahitabo atol sa among pamilya nga pagtuon sa kasulatan human mibiya ang akong igsoong babaye sa Simbahan. Ang among anak nga lalaki nga si David nagbasa samtang kami nagdungan og tuon sa Lucas 15. Sa iyang pagbasa sa sambingay sa anak nga nawala, lahi ang akong nadungog nianang adlawa sukad nga nadungog ko kini kaniadto. Sa pipila ka katarungan, kanunay nakong gibati nga sama sa anak nga lalaki kinsa nagpabilin sa balay. Sa pagbasa ni David nianang buntaga, nakaamgo ako nga sa pipila ka mga paagi ako mao ang anak nga nawala. Kitang tanan nakabsan sa himaya sa Amahan (tan-awa sa Mga Taga-Roma 3:23). Kitang tanan nanginahanglan sa Pag-ula sa Manluluwas sa pag-ayo kanato. Kitang tanan nawala ug kinahanglan nga makaplagan. Kining pagpadayag nianang adlawa mitabang kanako nga mahibalo nga ang akong igsoong babaye ug ako nagkinahanglan sa gugma sa Manluluwas ug sa Iyang Pag-ula. Si Susan ug ako sa tinuod anaa sa samang dalan pabalik ngadto sa Dios.

Ang mga pulong sa Manluluwas diha sa sambingay sa paghulagway niya sa iyang anak nga nawala gamhanan, ug nagtuo ako kini mao ang paghulagway sa kasinatian ninyo ug nako nga atong maangkon uban sa Amahan kon kita mobalik ngadto Kaniya. Nagtudlo kini kanato sa usa ka amahan kinsa naghigugma, nagpaabut, ug nagbantay. Kini mao ang mga pulong sa Manluluwas: “Apan samtang didto pa siya sa halayo, nakita siya sa iyang amahan, ug kini giabut og kalooy, ug midagan, ug migakos kaniya, ug gihagkan siya” (Lucas 15:20).

Hinaut kamo ug ako makadawat sa pagpadayag aron mahibalo sa labing maayo nga paagi unsaon pag-agni kadtong napahilayo sa atong kinabuhi ug, kon gikinahanglan, magbaton og pailub ug gugma sa atong Amahan sa Langit ug sa Iyang Anak, si Jesukristo, samtang kita naghigugma, nagbantay, ug nagpaabut sa anak nga nawala. Sa pangalan ni Jesukristo, Amen.