Mary R. Durham

Ikaduhang Magtatambag sa Kinatibuk-ang Kapangulohan sa Primary

Samtang nagbalanse sa mga kinahanglanon sa kinabuhi sa panimalay, mga calling sa Simbahan, trabaho, ug uban pang mga responsibilidad sa iyang kinabuhi isip minyo, si Mary Richards Durham nakamatikod nga kon unahon niya ug sa iyang bana ang Ginoo, ang tanan mamaayo ra. “Nindot kini nga butang. Kon kamo mosalig, ang Ginoo mopanalangin kaninyo,” miingon siya.

Kini ang tema nga kadaghan na niyang nakita. Siya gitawag sa pagserbisyo isip presidente sa Young Women sa ward samtang ang iyang bana nagserbisyo diha sa kapangulohan sa stake. Sa wala madugay silang duha nagserbisyo sa diha nga ang iyang bana midumala sa Japan Tokyo Mission gikan 2000 hangtud 2003. Karon siya moserbisyo isip ikaduhang magtatambag sa kinatibuk-ang kapangulohan sa Primary samtang ang iyang bana nagsugod sa pagserbisyo isip Area Seventy.

“Samtang kaming duha magtinabangay ug uban sa Ginoo, ang tanan mahimong mas sayon,” miingon siya.

Si Mary Lucille Richards natawo niadtong Marso 15, 1954, sa Portsmouth, Virginia, ngadto kang L. Stephen Richards Jr. ug Annette Richards. Samtang ang iyang amahan nag-ekswela sa pagkadoktor, ang pamilya mibalhin ngadto sa Minneapolis, Minnesota, sa wala pa mopuyo sa Siyudad sa Salt Lake, Utah.

Naamumahan pinaagi sa hugot nga pagtuo ug gugma sa iyang mga ginikanan ug sa mga kaparyentihan, iyang nasayran nga ang ebanghelyo tinuod. “Kalipay ang kasinatian niadtong nagsunod sa ebanghelyo. Dili kini lisud. Makalingaw kini,” miingon si Sister Durham.

Isip batan-ong babaye, siya nakadayeg sa kaimportante sa pagpangita og takus nga lalaki nga minyoan ug ilakip kini sa kada adlaw nga pag-ampo ug kada semana nga pagpuasa. Human sa high school siya mieskwela sa Brigham Young University isip eskolar tungod kay maayo siyang mosayaw [dance scholarship] ug nahimamat si Mark Durham, kinsa nag-eskwela sa University of Utah. “Nakita dayon nako iyang kabuotan,” miingon siya.

Ang magtiayon naminyo niadtong Hunyo 1974 sa Salt Lake Temple. Sila adunay pito ka mga anak.

Si Sister Durham nakaserbisyo isip presidente sa Relief Society sa stake, magtatambag sa kapangulohan sa Relief Society sa ward, magtutudlo sa Doktrina sa Ebanghelyo, presidente sa Young Women sa ward, ug, kinabag-ohan, isip sakop sa Primary general board.