Paghimo sa Komperensya nga Kabahin sa Atong mga Kinabuhi

Hunahunaa ang paggamit sa pipila niini nga mga kalihokan ug mga pangutana isip pagsugod sa panaghisgutan o personal nga pagpamalandong.

Para sa mga Bata

Si Elder David A. Bednar sa Korum sa Napulog Duha ka mga Apostoles mipakigbahin sa istorya nga nahadlok human wala niya tuyoa nga makabuak sa bintana sa tindahan duol sa iyang balay (pahina 46). Dayon siya mitudlo nga kon kita modangop kang Jesukristo ug mosunod Kaniya, kita mobati og kalinaw imbis kahadlok. Unsay inyong buhaton kada adlaw aron pagtabang sa inyong mga anak nga modangop sa Manluluwas? Unsaon ninyo pagtudlo kanila nga magpadayon sa unahan kang Kristo bisan sa panahon sa kalisud?
Si Sister Linda K. Burton, kinatibuk-ang presidente sa Relief Society, naghisgot sa usa ka pamilya nga mibalhin og bag-ong balay nga walay koral ang nataran (pahina 29). Ang amahan mimarka sa mga utlanan sa nataran gamit ang pisi ug giingnan iyang mga anak nga sila luwas kon sila magpabiling anaa sulod sa linya. Ang mga bata misunod, bisan sa dihang ang bola miuntol lapas sa pisi. Unsaon sa mga ginikanan pagtabang sa ilang mga anak nga maluwas? Unsa nga mga panalangin ang maangkon gumikan sa pagsunod sa atong mga ginikanan? Unsa nga mga utlanan nga gihatag sa Langitnong Amahan ngari kanato?
Si Bishop Gérald Caussé, Unang Magtatambag sa Presiding Bishopric, naghisgot sa tulo ka lalaki sa Africa kinsa naglakaw og duha ka semana sa lapukong mga agianan aron motambong og miting sa district (pahina 98)! Sila nagpabilin og usa ka semana aron sila makaambit sa sakrament sa dili pa sila mouli. Dayon ilang gilukdo ang mga kahon nga puno sa mga kopya sa Basahon ni Mormon aron ilang mahatag sa mga tawo sa ilang balangay. Naghunahuna ba kamo nga ang ebanghelyo talagsaon nga butang? Unsa nga mga sakripisyo ang andam ninyong buhaton aron ikinabuhi ang ebanghelyo?

Para sa mga Kabatan-onan

Daghang mga pakigpulong niining komperensya naghatag og gibug-aton sa kaimportante sa pamilya ug sa panimalay. Sama pananglit, si Sister Bonnie L. Oscarson, kinatibuk-ang presidente sa Young Women, naghangyo sa mga miyembro sa Simbahan nga “panalipdan ang panimalay isip usa ka dapit nga ikaduha lamang sa templo sa pagkabalaan” (pahina 14). Unsa ang inyong mahimo aron sa pagpanalipod sa panimalay? Unsa ang inyong matabang aron mahimong sagrado nga dapit inyong panimalay?
Si Elder Russell M. Nelson sa Korum sa Napulog Duha ka mga Apostoles mitudlo nga ang atong kinaiya ug pamatasan sa Igpapahulay usa ka timaan tali sa Langitnong Amahan ug kanato (pahina 129). Samtang inyong basahon ang pakigpulong ni Elder Nelson, kamo maghunahuna sa umaabut nga Dominggo ug mangutana, “Unsa nga timaan ang akong ihatag ngadto sa Dios?”
Si Elder Ulisses Soares sa Seventy naghisgot kabahin sa deacon kinsa misunod sa ehemplo ni Kapitan Moroni (pahina 70). Sa dihang siya nakakita sa pipila niya ka kaklase nga nagtan-aw og pornograpiya sa ilang cell phone, siya miingon kanila nga sayop ang ilang gibuhat ug kinahanglang hunungon kini nila. Usa ka higala ang mihunong. Unsaon nato nga makadawat og kalig-on sa pagpili sa husto? Unsaon nato pagkasayud unsay luwas nga atong kalingawan?
Ang elektronik nga mga himan makahatag og pagbati nga gamhanan tungod kay kini makahatag og access sa walay limit nga impormasyon ug media. Apan kamo mihunong ug nangutana kon kini ba nagkontrolar kaninyo? Si Elder José A. Teixeira sa Seventy miingon, “Makapahayahay ang pagpadaplin sa atong mga electronic device sa makadiyot” (pahina 96). Sulayi kini. Sa dili madugay, pagpili og adlaw nga dili mogamit sa device. Tingali kini ang dili kaayo ninyo gustong buhaton, apan masurprisa mo sa panahon nga inyong gigahin sa pagpakig-istorya ug paghimo og mga panunduman uban sa inyong mga higala ug pamilya.
Ang pagpuasa mao ang usa sa pinakamaayong paagi aron makaangkon og espirituhanong gahum. Si Presidente Henry B. Eyring, Unang Magtatambag sa Unang Kapangulohan, nagpahinumdom kanato nga ang pagpuasa ug pag-ampo nakalig-on ni Jesus batok sa tintasyon ni Satanas samtang ang Manluluwas didto sa kamingawan (pahina 22). Sa sunod nga Dominggo sa pagpuasa, sunda ang ehemplo ni Jesus ug pagpuasa nga may katuyoan. Kamo makadawat usab og balaanong tabang ug proteksyon.

Para sa mga Hamtong

Pipila sa mga mamulong sa komperensya naghisgot sa kaimportante sa kaminyoon ug pamilya diha sa katilingban ug sa plano sa kaluwasan. Mahimo ninyong tubagon ang lima ka pangutana ni Sister Burton diha sa pahina 31 ug mainampoong mamalandong kon unsaon ninyo nga mas makatabang ug mohigugma niadtong suod kaninyo. Isip pamilya, hisguti kon unsaon ninyo nga mas masentro sa inyong panimalay si Jesukristo ug unsaon ninyo nga mas makasuporta sa usag usa.
Si Presidente Thomas S. Monson nagpahinumdom kanato sa mga panalangin gumikan sa pagsimba sa templo, lakip ang pagka-espirituhanon, kalinaw, ug sa paglig-on sa pagbuntog sa mga tintasyon ug mga pagsulay (pahina 91). “Kon motambong kita sa templo,” siya miingon, “dunay moabut nato nga matang sa pagkaespirituhanon ug pagbati sa kalinaw nga molabaw pa sa bisan unsang pagbati nga moabut sa kasingkasing sa tawo.” Unsay inyong buhaton aron mahimong mas makahuluganon ang inyong pag-adto sa templo?
Ang hugot nga pagtuo kang Jesukristo usa ka baruganan sa buhat. “Dili sulagma nga kita motuo sa Manluluwas ug sa Iyang ebanghelyo kay sa kita sulagmang nag-ampo o nagbayad sa ikapulo,” miingon si Elder L. Whitney Clayton sa Kapangulohan sa Seventy. “Kita aktibong mopili nga motuo” (pahina 36). Samtang kamo nagbasa sa iyang pakigpulong ug sa mga pakigpulong ni Elder Dallin H. Oaks sa Korum sa Napulog Duha ka mga Apostoles (pahina 32); Rosemary M. Wixom, kinatibuk-ang presidente sa Primary (pahina 93); Bishop Gérald Caussé (pahina 98); ug Elder Kevin W. Pearson sa Seventy (pahina 114), ikonsiderar ang paglista og mga pamaagi sa paglig-on sa inyong pagtuo ni Jesukristo ug sa Iyang ebanghelyo. Dayon paglista sa gisaad nga mga panalangin tungod sa napalig-on nga pagtuo.
Si Elder Jeffrey R. Holland sa Korum sa Napulog Duha ka mga Apostoles mitudlo nga ang Pag-ula ug Pagkabanhaw sa Manluluwas naglangkob sa “labing mahinungdanong pagpakita sa balaanong gugma nga sukad napakita sa kasaysayan sa kalibutan” (pahina 104). Sa unsang paagi ang inyong mga panghunahuna, mga pulong, ug mga aksyon mas nagpakita sa inyong pagdayeg sa unsay nabuhat sa Manluluwas?
Si Presidente Dieter F. Uchtdorf, Ikaduhang Magtatambag sa Unang Kapangulohan, mipasabut sa milagrusong gasa sa grasya ug sa kaimportante sa pagkamasulundon ug paghinulsol. “Ang pagpaninguha sa pagsabut sa gasa sa grasya sa Dios sa tibuok natong kasingkasing ug hunahuna naghatag kanatong tanan sa paghigugma ug pagsunod gyud sa atong Langitnong Amahan uban sa kaaghup ug pasalamat,” miingon siya (pahina 107). Ikonsiderar ang pagpadayon sa inyong pagtuon kabahin sa grasya pinaagi sa pagbasa sa Mga Taga-Roma 3:23; 6:1–4; 2 Nephi 25:23, 26; Mosiah 2:21; 5:2; 27:25; Alma 34:10, 15; Ether 12:27; ug Moroni 10:32.