Elder Kim B. Clark

Unang Korum sa Seventy

Ang tibuok kinabuhi nga edukasyon—pagka-estudyante ug magtutudlo—makabenepisyo ni Elder Kim Bryce Clark sa iyang bag-ong assignment sa Unang Korum sa Seventy. Gipaluyohan niadtong Abril 4, 2015, si Elder Clark magsugod sa iyang pagserbisyo mga pipila lang ka semana human matapos ang iyang assignment isip presidente sa Brigham Young University–Idaho.

“Nag-eskwela nako sukad singko anyos pa lang ko,” miingon ang bag-ong gi-call nga Seventy. “Ganahan kaayo ko nga magkat-on ug magtudlo.”

Siya natawo sa Siyudad sa Salt Lake, Utah, niadtong Marso 20, 1949, ngadto kang Merlin ug Helen Mar Clark, kinamagulangan sa tulo ka anak. Nagdako siya sa Siyudad sa Salt Lake hangtud 11 anyos, sa dihang ang iyang amahan nakatrabaho sa Spokane, Washington.

Bisan tuod siya nagplano nga moeskwela sa Brigham Young University sa Provo, Utah, isip junior sa high school siya mibati nga kinahanglan siyang mosusi sa ubang mga opsyon ug mihukom nga mo-apply sa Harvard University sa Massachusetts—dapit nga nahimo niyang panimalay sobra sa tulo ka dekada.

Pagkahuman sa iyang unang tuig sa pagtuon sa Harvard, si Elder Clark miserbisyo sa South German Mission gikan 1968 hangtud 1970. Sa iyang pag-uli siya mieskwela sa BYU, diin sa wala madugay iyang nahimamat si Sue Lorraine Hunt sa iyang ward. Mga pipila ka bulan ang milabay sila naminyo niadtong Hunyo 14, 1971. Mga ginikanan sila sa pito ka mga anak.

Pagkahuman sa ilang kasal, ang magtiayon mibalhin sa Boston, Massachusetts, ang dapit, diin si Elder Clark mi-enroll pag-usab sa Harvard. Didto iyang naangkon ang bachelor of arts degree, ang master of arts degree, ug PhD—ang tanan sa economics. Si Elder Clark nahimong magtutudlo sa Harvard Business School niadtong 1978 ug sa wala madugay nahimong dean sa eskwelahan niadtong 1995. Niadtong 2005 siya nahimong presidente sa BYU–Idaho, diin siya miserbisyo og hapit usa ka dekada.

Si Elder Clark nakaserbisyo isip presidente sa elders quorum, executive secretary sa ward, magtatambag sa bishop, bishop, high councilor, magtatambag sa stake mission president, ug Area Seventy.