Mga Website Nag-feature sa Pagserbisyo

Unsay gibuhat sa mga Santos sa Ulahing mga Adlaw nga mahimong mas maayong tawo sa komunidad kon asa sila nagpuyo? Susiha pinaagi sa pag-adto sa MormonNewsroom.org. Ania ang pipila ka mga ehemplo gikan sa bag-ong mga posting sa internasyonal nga mga Newsroom website.

New Zealand ug Vanuatu

Sa dihang ang Cyclone Pam miigo sa gamayng isla nga nasud sa Pasipiko nga Vanuatu, ang mga Santos sa Ulahing mga Adlaw sa Auckland, New Zealand—inabagan sa Church Humanitarian Services—nagkapundok aron pagtabang niadtong nagun-ob tungod sa unos. Sila miimpake og 2,000 ka kahon nga pagkaon aron pagtabang kutob sa mahimo sa mga naapektuhan. Ang kada sudlanan adunay harina, bugas, prutas nga de lata, mga batong, corned beef, isda, mga biskwit, mga raisin, mga noodle, chocolate milk powder, ug pang-abri sa lata. Ang sudlanan mismo magamit pa og lain, sama sa kasudlan og tubig.

Dominican Republic ug Canada

Sa Dominican Republic ug Canada, ang mga babaye nga Santos sa Ulahing mga Adlaw miapil sa pagsaulog sa International Women’s Day, usa ka kahilokan nga gipasiugdahan sa United Nations. Sobra sa 1,200 ka mga babaye ang nagkapundok sa mga meetinghouse sa Simbahan sa lain-laing dapit sa Dominican Republic aron sa pagpasidungog sa daghang kontribusyon sa mga babaye sa tibuok kalibutan. Mga lider sa relihiyon, sa sibiko, ug sa militar ang miapil sa kalihokan, nga naglakip og programa sa musika ug pagpamulong. Sa Canada, ang mga babaye nga Santos sa Ulahing mga Adlaw nagsaulog usab sa adlaw pinaagi sa pagpakigbahin og impormasyon kabahin sa Relief Society, naghatag og gibug-aton nga usa kini ka “talagsaon kaayong paagi sa pagserbisyo sa tibuok kalibutan.”

United Kingdom

Ang orihinal nga tumong mao ang pagtahi og 100 ka sinina para sa nanginahanglang mga bata sa Africa, apan sa dihang nahuman sila, ang mga babaye sa Coventry Ward sa England nakatahi og sobra sa 230. Ang yanong mga sinina, nga hinimo gikan sa mga punda sa unlan, sayon ra nga himoon. Usa ka sister, kinsa wala pa kasulay og tahi, nakahimo og tulo niini.

Arkansas, USA

Sobra sa 600 ka mga tawo ang mitambong sa debosyonal sa interfaith community sa hilisgutan kabahin sa kagawasan sa relihiyon nga gipasiugdahan sa Little Rock Arkansas Stake, lakip ang mga representante gikan sa Katoliko, Methodist, ug komunidad sa Islam ug usa ka Evangelical radio personality. Ang kalihokan sa lain-laing tinuohan naglakip usab og mensahe nga gi-videotape gikan sa state lieutenant governor ug panapos nga pag-ampo gikan sa usa ka state senator, silang duha mga Baptist. Ang mga nag-organisar sa kalihokan miingon nga kini “nagsumpay sa pagsinabtanay.”