Elder Allen D. Haynie

Unang Korum sa Seventy

Si Elder Allen D. Haynie gipaluyohan isip sakop sa Unang Korum sa Seventy niadtong Abril 4, 2015.

Si Elder Haynie natawo niadtong Agosto 29, 1958, ngadto kang Van Lloyd ug Sarah Lulu Lewis Haynie.

Siya natawo sa Logan, Utah, apan sa iyang pagkabatan-on nagdako siya sa lain-laing mga siyudad sa amihanang Utah ug sa Silicon Valley sa California. Siya mieskwela sa lima ka lain-laing eskwelahan sa elementarya, duha ka eskwelahan sa junior high, ug sa katapusan mieskwela og high school sa Bountiful, Utah.

Kining lain-laing kasinatian “mitudlo nako og importante kaayong leksyon sa pagkat-on unsaon sa pagdayeg ang tanan,” siya miingon, “tungod kay morag kada tuig mobalhin ko og dapit ug gikinahanglan nga makighigala na usab ko og lain. Usa sa mga butang nga akong ganahan kaayo sa Simbahan mao nga kini naghatag kanato og oportunidad nga makig-ila-ila sa mga tawo ug makakaplag og bili sa ilang lain-laing mga kaagi [background], kasinatian, talento, ug abilidad.”

Nagserbisyo siya sa Argentina Cordoba Mission gikan 1977 hangtud 1979.

Nakahuman og bachelor’s degree sa political science gikan sa Brigham Young University, Si Elder Haynie nagpadayon nga makaangkon og juris doctorate gikan sa J. Reuben Clark Law School niadtong 1985.

Siya nagtrabaho og usa ka tuig isip judicial clerkship sa U.S. Ninth Circuit Court of Appeals sa San Diego, California, sa wala pa moapil sa law firm sa Latham and Watkins, nagtrabaho isip abogado sa ilang opisina sa San Diego. Mga lima ka tuig ang milabay siya ug ang iyang igsoon nga lalaki mitukod og ilang kaugalingong law firm.

Si Elder Haynie nagserbisyo usab isip presidente sa elders quorum, presidente sa Young Men sa ward, magtutudlo sa seminary, high councilor, bishop, presidente sa stake, ug Area Seventy.

Iyang nahimamat si Deborah Ruth Hall samtang nag-eskwela sa BYU, ug silang duha naminyo niadtong Disyembre 19, 1983, sa Salt Lake Temple. Mga ginikanan sila sa unom ka mga anak.

Nahimong emosyonal sa paghisgot sa iyang pagpamatuod, si Elder Haynie miingon nga una niyang nabasa ug namarkahan ang Basahon ni Mormon sa dihang siya 12 anyos. “Wala ko makahinumdom nga ako wala motuo; wala ko makahinumdom nga ako wala mag-ampo.”