Elder Hugo Montoya

Unang Korum sa Seventy

Si Elder Hugo Montoya masabtang nabug-atan sa dihang siya gitawag sa Unang Korum sa Seventy. Siya nakakaplag og kahupayan sa mabinationg mga pulong ni Presidente Thomas S. Monson atol sa miting sa pagbansay sa bag-ong mga General Authority: “Kamo anaa dinhi tungod kay kamo nahigugma sa Manluluwas.” Si Elder Montoya mibati og kadasig, nasayud nga ang iyang bag-ong calling nakapahimutang niya diha sa buluhaton sa Ginoo.

“Nahigugma ko sa Manluluwas, ug ako moadto bisan asa ako paadtuon,” miingon siya. “Buhaton nako bisan unsay ipabuhat kanako. Isulti nako bisan unsay ipasulti kanako.” Si Elder Montoya gipaluyohan atol sa sesyon sa Sabado sa Hapon sa Ika-185 nga Tinuig nga Kinatibuk-ang Komperensya sa Simbahan.

Si Elder Montoya nakakaplag usab og kalig-on gikan sa kabilin nga pagtuo sa iyang pamilya. Ang iyang apohan sa tuhod nga si Rafael Monroy usa ka mahinungdanong tawo sa kasaysayan sa Simbahan sa Mexico. Niadtong 1915 si Brother Monroy ug kauban nga miyembro, si Vicente Morales, giaresto sa grupo sa mga rebolusyanista panahon sa Mexican Revolution. Silang duha gisultian nga sila buhian kon, usa sa ilang demanda, ilang ilimod ang ilang relihiyon.

Silang duha wala mosugot ug gipatay sila pinaagi sa firing squad.

Si Elder Montoya miingon nga ang ehemplo sa iyang apohan sa tuhod nagpabiling gamhanang impluwensya sa iyang kinabuhi. “Akong nakat-unan nga ang mga pagbati sa kahadlok mabuntog pinaagi sa mga pagbati sa pagtuo ug pagpamatuod kon kamo nasayud nga inyong gibuhat ang husto nga mga butang.”

Si Elder Montoya natawo niadtong Abril 2, 1960, sa Fresno, California, ngadto kang Abel Montoya ug Maclovia Monroy. Siya halos nagdako sa Mexico.

Iyang giminyoan si Maria del Carmen Balvastro sa Hermosillo; sila nabugkos sa Mesa Arizona Temple niadtong Abril 6, 1983. Sila adunay lima ka mga anak.

Human og serbisyo isip full-time nga misyonaryo sa Mexico City North Mission gikan 1979 hangtud 1981, siya miserbisyo isip presidente sa Young Men sa ward, high councilor, bishop, presidente sa stake, area auditor, ug Area Seventy.

Siya migradwar sa Sonora State University niadtong 1986 uban sa agricultural engineering degree ug nagtrabaho og daghang mga posisyon sa pagdumala [management position] sa Xerox ug isip magtutudlo sa institute sa Simbahan.