Tulo ka Templo Gipahibalo

Mga templo giplano para sa Port-au-Prince, Haiti; Abidjan, Ivory Coast; ug Bangkok, Thailand, gipahibalo ni Presidente Thomas S. Monson atol sa sesyon sa Dominggo sa buntag sa kinatibuk-ang komperensya. Sa kada usa niini, kini mao ang unang templo nga itukod sa nasud. Ang eksaktong mga lokasyon sa templo ipahibalo sa umaabut nga petsa.

“Pagka-talagsaon sa mga panalangin nga giandam alang sa atong matinud-anong mga miyembro niini nga mga dapit ug, sa pagkatinuod, bisan asa sa tibuok kalibutan nga adunay mga templo” miingon si Presidente Monson.

Port-au-Prince Haiti Temple

Ang Haiti panimalay sa sobra sa 20,000 ka mga Santos sa Ulahing mga Adlaw sa nasud nga may mga 10 ka milyon nga mga tawo. Ang misyonaryo nga buhat opisyal nga gisugdan niadtong 1980. Ang pinakaduol nga templo mao ang Santo Domingo Dominican Republic Temple. Bisan nahimutang sa sama nga isla, ang gilay-on sa templo hapit usa ka adlaw nga biyahe.

Abidjan Ivory Coast Temple

Ang Ivory Coast (Côte d’Ivoire) panimalay sa sobra sa 27,000 ka mga miyembro sa Simbahan sa nasud nga may mga 20 ka milyon ka mga tawo. Ang misyonaryo nga buhat opisyal nga gisugdan niadtong 1988. Ang pinakaduol nga templo mao ang Accra Ghana Temple, nga 340 ka milya (550 km) ang gilay-on.

Bangkok Thailand Temple

Ang Thailand panimalay sa sobra sa 19,000 ka mga Santos sa Ulahing mga Adlaw sa nasud nga may mga 67 ka milyon nga mga tawo. Ang Simbahan opisyal nga naorganisar sa Thailand niadtong 1966. Ang Bangkok Thailand Temple moserbisyo sa mga Santos sa Ulahing mga Adlaw sa Thailand, ingon man usab sa Southeast Asia. Sa karon, ang pinakaduol nga templo sa Thailand mao ang Hong Kong China Temple, nga sobra sa 1,000 ka milya (1,610 km) ang gilay-on.

Dugang mga Balita kabahin sa Templo

Ang mga petsa sa open house, pagsaulog sa kultura, ug pagbukas sa lima ka templo gipahibalo na para sa tuig 2015 sa Córdoba, Argentina; Payson, Utah, USA; Trujillo, Peru; Indianapolis, Indiana, USA; ug Tijuana, Mexico. Ang gibag-o nga Mexico City Mexico Temple ipahinungod og usab sa 2015.

Sa milabayng duha ka tuig, ang Simbahan nagpahinungod sa mga paningkamot niini sa pagkompleto sa miaging gipahibalo na nga mga templo. Dugang sa 3 ka bag-ong mga templo, adunay 144 ka mga templo nga magamit, 5 nga gipanindot, 13 nga gitukod pa, ug 13 nga gipahibalo na sa una nga anaa na sa lain-laing mga kahimtang sa pagpangandam sa dili pa sugdan og tukod.