Wan Desisen blong Stap Win
Hemia i bin janis blong hem blong plei long tim ia we i stap win—?olsem wanem nao bae hem i talem no?
“Tingbaot Sabat dei blong holem i tabu” (Mosaea 13:16).
Miranda i hariap i go tru long doa long fored, wetem glad se haos blong hem i moa kolkol bitim weta blong aotsaed we i hot tumas. Hem i bin swet afta we hem i bin plei las futbol gem blong sisen ia mo i harem nogud from Teal Turbos (Til Turbo) i bin lus. Bakegenr.
Mama i karem i kam long rum wan botel wota mo wan basket blong aranis we oli bin slaesem long taem blong gem mo haf i stap. “Yu bin plei gud tumas. Blong stap wan gol kipa, i no wan impoten wok.”
Miranda i bin plei gud—hem i bin blokem plante poen mo i kik moa strong bitim oltaem. Be plante long ol gel insaed tim blong hem oli neva bin plei futbol bifo, mo tedei hem i ofisol: oli lusum evri gem long sisen ia.
“Sapos nomo mi save stap long wan tim we i win wanwan taem, ?Yu save?” Smol wota blong ae i ron daon long ol ae blong Miranda mo i foldaon i go long blu-grin jesi blong hem. Taem hem i sarem ol ae blong hem, telefon i ring.
Mama i pikmap telefon mo afta smol taem hem i talem. “hem i blong yu.”
“Halo ?Miranda? Hemia Tom, koj blong Ol Jili Kika. Mi bin stap luk gem blong yu tedei. Yu bin mekem gud tumas long fil.”
Hat blong Miranda i stat blong pam kwik. Ol Jili Kika oli bin bes futbol tim long lig!
“Tim blong mi i stap go long rejinol jampionsip gem nekis manis. Yu bin plei gud tumas tedei we i mekem se mi wantem yu blong kam wetem mifala olsem wan bakap gol kipa.”
Kolosap hat blong Miranda i kamaot long jes blong hem. Hemia i bin wan janis blong hem blong plei wetem wan tim we i stap win.
“!Mi laekem blong kam!” Miranda i talem: Tufala i bin toktok blong smol taem abaot ditel blong tim ia bifo hem i putum daon telefon mo ron i go long narafala rum blong talem long mama blong hem. Tugeta tufala i stat blong raetem ol deit blong ol trening mo ol gem long famle kalenda.
Wantaem nomo, mama i stop blong raet, pen blong hem i fas antap long wan kalenda bokis.
“O-o. Miranda, ol gem ia oli stap long ol Sandei. Hemia, luk.” Hem i poenem ol deit blong ol gem mo tanem raon i go long Miranda wetem wan fes we i wari. ?Wanem nao yu ting se bae yumi mas mekem?
Hat blong Miranda i harem nogud, mo hem i kakae lips blong hem taem hem i stap tingbaot wanem desisen nao bae hem i tekem. Ating mama bae i letem hem i plei sapos hem i askem, be taem hem i tingbaot blong plei long Sandei-speseli nao blong mestem jos-hem i filim sik long bel blong hem. Hem i bin save se Sandei hem i blong go long jos mo wosipim Papa long Heven, mo bae hem i no save mekem ol samting ia taem hem i stap plei futbol.
“Mi ting se mi mas ringimbak hem mo talem long hem se mi no save plei,” Miranda i talem. Hem i traehad blong no krae. Nomata hem i bin save raet joes, be i bin had blong givap long wan samting we hem i wantem tumas.
“?Mo yu save wanem tingting blong mi?” Mama i talem long hem, mo haggem hem. “Mi ting se yu wan gudfala pikinini.”
Long Sandei ia, taem Miranda i sidaon long Praemeri, hem i stap tingting long gudfala desisen we hem i bin mekem. Koj i bin sapraes taem Miranda i ringim hem mo talem se hem i no save plei futbol long ol Sandei. Hem i traem blong jenisim tingting blong Miranda, be hem i stanap long desisen blong hem. Naoia, taem hem i lisin long ol singsing mo lesen blong Praemeri, Miranda i smael. Filing blong pis insaed hat blong hem i talem long hem se hem i stap long raet ples. Be long en, hem i bin mekem wan desisen we i win.