Luklukbak
?Pamkin o Melen?
Man we i raet, i stap long Yuta, YSA.
Samtaem i nogat wan rong joes. I gat wan joes nomo blong mekem.
Pikja i kam long Karolin Vibet
Papa blong mi i bin sapraes tumas blong faenemaot se ol sid blong pamkin we hem i bin planem las yia oli spring aot long medel blong garen blong melen long sama ia. Ol melen ia oli stap gro gud we—be ol pamkin tu. Oli gro gud tumas mekem se papa blong mi wantem blong letem ol pamkin ia i gro nomo. Be yet hem i save se pamkin ia bae i spolem gro blong ol melen.
Hem i gat wan joes blong mekem Hem i save pulumaot ol pamkin ia blong mekem ol melen i gro gud o letem ol pamkin i gro mo wajem oli tekova long garen melen mo mekem se bae tugeta bae nosave karem gud frut. ?Pamkin o melen? Joes i stap bitwin tu gufala samting tugeta.
Taem hem i stap skelem tufala joes ia, papa blong mi i mekem ap tinting blong pulumaot ol gudfala pamkin ia. I no from se olgeta i let blong gro, be from se hem i wantem ol melen we hem i bin plan from bitim ol pamkin we hem i sapraes long hem.
Esperiens ia i mekem mi tingbaot ol joes we yumi stap mekem, speseli long ol rilesensip blong yumi wetem ol nara man. Wetem ol famle blong yumi, ol fren blong yumi, ol bos blong yumi, o olgeta we yumi stap deit wetem o maredem, taem we yu mas jus bitwin tu gudfala samting, samtaem i had blong luksave raet o bes joes, speseli taem yumi no wantem mekem rong joes. Blong fraet blong mekem rong joes samtaem i mekem se yumi no mo save muv, mo fraet ia i save stopem yumi blong muv i go fored wetem fet. Be tru tok hem i, samtaem i nogat wan rong joes. I gat wan joes nomo blong mekem. Long stori blong papa blong mi, hem i mekem joes blong hem long wanem hem i luk se i moa impoten. Hem i no wante luk ol pamkin oli ded, be hem i save se bae hem i harem nogud moa spoa ol pamkin oli damejem ol melen.
Long laef, sam joes we yumi mas mekem i no inpoten tumas, olsem, ?wanem nao bae mi kakae long brekfas? ?Wanem kala dres nao bae mi werem tedei? Taem yumi fesem wan joes bitwin tu gudfala samting, yumi save mekem olsem we papa blong mi i bin mekem mo askem kewstin, “?Wijwan nao i moa impoten long mi?” Afta mekem wan joes afta muv fored wetem fet, gat tras se bae Lod i korektem yumi sapos yumi rong.
Be sam narafala joes oli moa impoten Presiden Tomas S. Monson i bin talem: “Ol joes oli stap long fored blong yumi oltaem. Blong mekem ol waes joes, yumi nidim strong tingting—strong tingting blong talem no, strong tingting blong talem yes. I tru ol joes oli talemaot fiuja” (“The Three Rs of Choice,” Liahona, Nov. 2010, 68). Taem yumi fesem ol kaen joes olsem, wan gudfala kwestin blong askem hem i, “?Wanem nao Lod i luk se i moa impoten? Sapos yumi save ansa blong kwestin ia, yumi nid blong stretem ol tingting blong yumi wetem blong Hem mo mekem joes ia. Bae hem i raet joes oltaem.