?Olsem Wanem Hemia I Impoten?

Keli Laing, Wasington, YSA

Taem mi stap long trip blong mi long YSS, Wes Vejinia, wan ofisa we i toktok long lanwis blong Potugal i askem blong mi go long wan tri‑wik eksjenj wetem ol ami blong Brasil. Mi wan nomo long sabmarin ia we mi save toktok lanwis blong Potugal.

Fas filing blong mi se mi bae mi no go. Mi jes finis long wan tri–manis patrol mo stap wet blong luk famle blong mi, be eksjenj ia i no save lego maen blong mi. Mi go long Papa long Heven long prea, mo kasem wan strong ansa se, mi mas go mo akseptem wok ia.

Fasin blong folem i soem se i gat ol hadtaem mo ol problem. I kam long wan taem we mi filim se mi bae mi givap. Mi bin tingting se be, “olsem wanem hemia i impoten? Nomata long filing ia, tabu Spirit i toktok long mi blong gohed blong go.

Pikja i kam long Alen Kans

Long en, afta long samfala samting oli mekem se mifala i late, mifala i kasem sip blong olgeta long Brasil. Taem we oli tekem mi i go long ples blong kakae blong ol ofisa, kapten blong sip i stap singaot bigwan mo poentem finga long wan yangfala ofisa. Kapten i luk mi, i stop, mo talem long broken English, “Ah, Amerikan fren blong mi i jas kam tru. Welkam Yu wantem wan samting blong drink?”

Mi ansa long lanwis blong Potugal se mi laekem wan limonad blong Brasil we i popula mo mi no bin drink longtaem afta long misin blong mi. Hem i talem long mi se sip i gat evri kaen blong strong drink long sip, be mi talem se mi no drink ol strong drink.

Afta long hemia, wan man i noknok long doa blong smol rum blong mi long sip. Taem mi openem doa, mi luk yangfala ofisa ia we mi luk hem long rum blong kakae blong kapten.

“Yu wan man Amerika,” hem i talem. “Yu no drink ol strong drink. Yu toktok lanwis blong Potugal. I tru se yu wan Momon?”

Yes mi wan Momom,” mi ansa long hem.

Hem i sakem ol han blong hem i go raon long mi mo hem i krae.

Ofisa ia, Lt. Mendes, hem i bin wan ones man we i jes baptaes nomo mo hem i jes graduet long Naval Akademi long Brasil. Insaed long sip, hem i lanem kwik nomo se kapten i wantem hem blong serem wael fasin blong laef blong ol ofisa taem oli visitim ol haba. Be long nara saed, Lt. Mendes i gohed blong mekem volontia wok long ol haba insaed long kaontri blong hem mo lego ol aktiviti long ol haba blong ol defren ples. Kapten i statblong wari long hemia. Taem hem i kam insaed long rum ia blong kakae, kapten ia i singaot strong long Lt. Mendes from hem i no wantem joenem hem.

“Bae yu go aot wetem ol nara ofisa long nekis haba,” hem i givim oda ia long ami ofisa ia. “Bae yu soem long Ofisa blong Amerika ia olsem wanem yumi stap gat wan gud taem. Hemia nao wanem hem i wantem long yumi.”

Blong plante manis, Lt. Mendes i bin stap prea se kapten blong hem bae i andastanem mo akseptem ol prinsipol blong hem. Afta we mi kam tru, diskasen blong gospel i kam senta blong plante long ol toktok insaed long rom blong kakae. Mifala i toktok wetem ol nara ofisa abaot Josef Smit, Restoresen, tok blong waes, mo lao blong jastiti. Ol filing tuwod Lt. Mendes oli stap jenis. Ol ofisa oli tekemaot ol pikja blong ponografi, mo long nekis haba mifala evri wan i hapi blong kaekae tugeta long restrong be no go long wan klab.

Kolosap long en blong tri wik blong mi long sip, mo afta long plante diskasen wetem kapten mo ol ofisa abaot ol bilif blong yumi, ol man ol mekem hat blong olgeta i sopsop. “Naoia mi andastanem,” wanem kapten ia i talem long Lt. Mendes bifo mi go, hem i talem se hem bae i nomo askem yang ofisa ia blong hem i go agensem ol prinsipol blong hem.

Mi bae neva fogetem eksperiens ia. Lt. Mendes mo mi i lanem se Papa long Heven i save long yumi wanwan, mo i lavem yumi, mo i gat konsen long ol personol laef blong yumi.