Ol Gudfala Yang Man mo Yang Woman insaed long Skripja
Man we i raet, i bin wan seminari tija, mo i stap long Jemani mo i ded long 2012.
Yu save lanem long, mo folem ol eksampol blong plante yut we oli gat stret mo gud fasin we ol stori blong olgeta, oli rekodem gud i stap insaed ol skripja.
Illustration by Andrew Bosley
Lod i lavem ol yut blong Jos. Hem i gat wan bigfala tras long yu. Long evri yia, Lod i givim insperesen long ol yang man mo yang woman we oli gat karej blong lidim mo blesem ol pikpol blong Hem. Hem i nidim olgeta from ol waes tingting, strong tingting, mo stamba tingting blong olgeta. I bin olsem oltaem mo bambae i gohed blong stap olsem oltaem.
Plante eksampol blong ol yang hiro ia, i olsem wan gol tred we i folem tru insaed skripja. Nomata se oli bin laef longtaem bifo, yu save folem ol eksampol blong olgeta mo folem laef stael blong olgeta. Oli bin gat famle problem; oli bin laef long medel blong ol pipol we oli no stret mo no gud; oli bin fesem plante “Golaeat”, be strong tingting blong olgeta, fasin blong olgeta blong obei, mo fet blong olgeta long Jisas Kraes, i mekem oli go tru ol jalenj blong olgeta-semmak olsem we ol kwaliti i save mekem long yu tu.
Ebraham
Fasin blong Ebraham blong kasem wan samting, gat strong tingting, mo wiling blong leftemap vois blong hem agensem rabis fasin i bin gud tumas-iven i gud tumas moa taem yu tingbaot papa blong hem we i bin stap wosipim ol aedol. Olsem wan yang man, hem i bin stanap strong from stret mo gud fasin, we i mekem kolosap oli kilim hem olsem wan sakrifaes. (Luk long Abraham 1:2–7.)
Josef blong Ijip
Hem i bin gat 17 yia taem ol bigfala brata blong hem i bin salem hem olsem wan slef, be wetem ol blesing blong Lod, Josef i save mekem wan gud samting aot long ol hadtaem we hem i fesem. Oli neva winim hem, from hem i neva givap. Hem i bin gohed blong stap trastem Lod. From hem i gat wan gudfala hat, i soem respek we hem i gat taem hem i stap fogivim olgeta we oli mekem i nogud long hem. (Luk long Jenesis 37; 45.)
Deved
Olsem wan yangfala, Deved i bin wan man blong lukaot long sipsip, mo hem i bin faet wetem wan bea mo wan laeon blong protektem ol sipsip blong papa blong hem. Tras we hem i gat long hemwan i no bin kam long wanem hem i save mekem olsem wan man blong lukaot sipsip; be i kam from fet blong hem long Papa long Heven, mo hem i soem taem hem i faet agensem Golaeat. (Luk long Fas Samuel 17:32–54.)
Esta
Hem i wantem putum laef blong hem long denja blong save sevem pipol blong hem. I no bin from Esta i naes be from fasin blong hem long saed blong spirit we i bin mekem hem wan impoten woman. (Luk long Esta 4–5.)
Daniel
Illustration by Andrew Bosley
Hem i obei long loa blong helt blong Lod nomata se olgeta raon long hem oli no stap mekem. Hem i bin prea, nomata se King i komandem olgeta blong no stap prea long Papa long Heven. From stret mo gud fasin blong hem mo fasin blong hem blong openem hat blong hem long Spirit, Lod i blesem Daniel wetem presen blong intepretem ol drim mo visin. Hem i bin kasem paoa mo wisdom i kam long Papa long Heven wetem tingting ia se sam taem long taem blong denja, hem i save kasem help i kam antap. (Luk long Daniel 1; 6.)
Nifae
Nifae i wan nambawan eksampol taem hem i talem, “Bae mi go mo mekem ol samting we Lod i bin talem” (1 Nifae 3:7). Hem i bin gat strong tingting blong mekem wanem we oli askem hem blong mekem. ?Hem i bin stap long wan gudfala haos? No, hem i bin stap long drae ples blong plante yia. ?Ol samting i bin go gud long saed blong hem? No, ol brata blong hem oltaem oli kros long hem mo samtaem oli traem blong kilim hem. Tru evri samting ia, hem i obei long ol komanmen blong Lod.
TuTaosenYangfala Soldia
Ol yangfala man ia, ol fetful papa mo mama nao i lukaotem olgeta, mo fet blong olgeta long ol toktok blong ol mama blong olgeta i bin blesem olgeta. Oli bin lanem blong lisin mo obei folem stret fasin, mo long ol faet blong olgeta, tingting blong olgeta i strong fulwan se Papa blong olgeta long Heven bae i protektem olgeta. (Luk long Alma 56:45–48.)
Momon
Taem hem i bin gat 15 yia, Lod i bin visitim hem from hem i bin gat tingting i stap daon, klin, mo klin gud, nomata ol rabis fasin we ol pipol raon long hem i stap mekem. Mo tu taem hem i gat 15 yia, Momon i bin kam wan lida blong ol ami. Samtaem afta hem i bin kasem wok ia blong kipim ol skripja. (Luk long Mormon 1–2.)
Josef Smit
Taem hem i gat 14 yia, hem i lukaotem insaed skripja mo prea blong save wijwan jos blong joenem. Lod i singaotem hem blong putumbak gospel mo Jos blong Jisas Kraes. Josef i givim fulwan laef blong hem blong fulfilim wok ia, nomata i had, mo plante hadtaem. Taem hem i gat 17 yia, enjel Moronae i bin visitim hem, mo soem hem ol gol plet. Nomata se hem i yang, Josef Smit i bin wan tija wetem paoa mo wan gudfala eksampol long olgeta raon long hem. (Luk long Joseph Smith—History 1.)
Dei blong Yu
?Ol dei blong ol gudfala yang man mo woman i pas finis? !No! Enjel Moronae i talem long Josef Smit se profesi blong Joel bae i fulfil i no longtaem:
“Mi [Lod] bambae mi givim Spirit blong mi long olgeta man; mo ol boe mo gel bae oli save talem ol tok we bae mi givim long olgeta, ol olfala blong yufala oli save drim ol drim, mo ol yang man oli save luk ol vison:
“Nating we ol boe blong wok mo ol gel blong wok nomo, be long taem ya, bambae mi givim Spirit blong mi long olgeta, blong oli kasem fulpaoa blong hem” (Joel 2:28–29; see Joseph Smith—History 1:41).