Wan Telefon Kol we Oli Taemem
Woman ia we i raet i stap long Yuta YSA.
Taem mi stap gro i kam antap, mi no bin bilivim se i gat wan God. Laef blong mi i fulap long plante hadtaem, mo long ol taem we mi blakaot, mi harem nogud gogo we mi wantem ded nomo. Hemia i bin taem ol misinari i bin stap noknok long doa blong mi. Gospel i bin stret wanem we mi nidim; Mi bin hang long hem wantaem olsem wan stil.
Ol trael blong mi i no bin stop afta we mi bin joenem Jos, be mi bin stap long wan moa gud ples blong save winim paoa blong Setan. Blong fastaem mi bin filim save i olsem wanem blong stap glad.
Be, mi no bin kam blong harem gud fulwan yet. I bin kam long wan taem we mi bin wantem givap bakegen. Long taem ia, Sista Ting, waef blong bisop i bin ring. Hem i bin talem long mi se hem i bin gat wan filing se hem i nidim blong ringim mi. Hem i bin askem sapos mi oraet. Mi bin serem hat blong mi long hem. Long mi, hem i olsem wan enjel we God i bin sendem i kam.
Wanem we i bin hapen ii givim mi paoa. Fet blong mi i bin kam strong moa. Mi bin filim olsem se mi save winim ded. Mi bin filim olsem se mi bin kamaot, olsem we i stap long Alma 36:2–3:
“Oli bin stap long slef; mo ino gat wan man we i save mekem olgeta i kamaot be … God nomo. …
“… eni man we bae i putum tras blong hem long God bae God i sapotem olgeta long ol hadtaem blong olgeta, mo trabol blong olgeta, bae God i leftemap olgeta long las dei.
Mi gohed blong gat ol trael, be bae i no save mekem mi harem nogud tumas bakegen. God i bin sapotem mi tru evri trael mo wari blong mi. Hem i bin sevem mi aot long kalabus mo slef long saed blong spirit, iven ded. Hem i Sevya blong yumi