Ol Kwestin mo Ansa
“Taem mama blong mi i bin sik, mifala i bin livim kakae mo prea from hem, be afta hem i ded. ?Olsem wanem bae mi save gat pis wetem hemia?”
Hemia wan taem long laef blong yu we yu sore tumas. Hem i nomol blong wantem save trutok mo ol ansa long plante kwestin blong yu: “?From wanem hem i no laef? ?Bae mi save luk hem bakegen? ?Olsem Wanem bae mi mekem we hem i no stap?
Gospel blong Jisas Kraes i givim tugeta kamfot mo ol ansa. Lod i bin promes, “Olgeta evriwan we i krae bae i kasem blesing from Lod bae i leftemap tingting blong olgeta” (3 Nifae 12:4). Lukaotem Tabu Spirit, from Hem i kamfota.
Yu stap tingting sapos Hem i harem ol prea blong yu. Gat tras: Papa long Heven oltaem i harem ol prea blong yumi. Olgeta skripja mo ol profet we i laef tedei, oli promesem yumi se i tru. Wanem we Lod i talem long Josef Smit, i go tu long yu: “Ol prea blong yu mo ol prea blong ol brata blong yu i bin kasem ol sorae blong mi” (D&C 90:1). Be yumi nidim blong tingbaot se Papa long Heven i ansarem ol prea blong yumi wetem wan lukluk we i no save finis long maen (luk long Aesea 55:8–9). From samting ia nao yumi folem eksampol blong Sevya blong askem ol blesing be afta wetem tru hat, askem blong tingting blong Papa i hapen (luk long Luk 22:42).
Nomata se i had, be hadtaem ia i save kam wan taem blong yu gro. Yu save lanem blong gat fet long tingting blong God, iven sapos hemia i minim se mama blong yu i no bin oraet. I tru yu wantem hem blong laef. Be tes blong laef long wol ia hem i blong trastem God long evri taem-speseli taem i had tumas. Sapos yu trastem Hem, “evri samting bae i wok tugeta blong gud blong yu” (D&C 90:24).
Ded I Pat blong Plan.
Folem plan blong stap glad we Papa blong yumi long Heven i mekem blong yumi, fasin blong yumi blong gobak long ples blong Hem i dipen long ded mo resureksen, we bae i helpem yumi jenis blong kamaot long laef blong wol ia i go long wan laef we i nomo save ded. Yu nidim nomo blong akseptem tru fasin ia se ded i pat blong plan mo bilivim se wan dei bae yu save mekem blong stap bakegen wetem mama blong yu we i ded. Wetem save ia se mama blong yu i stap long spirit wol mo we hem i stap wet long yu
Deved M., 18 yia, Kasaï-Wes Provins Demokratik Ripablik blong Kongo
Hem i stap long Spirit Wol
Mama blong mi i bin kasem kansa tu yia i finis. Mi no laekem stap luk hem i harem nogud, mo sapos nomo mi save mekem wan samting. Mo nomata se mama blong mi i kam oraet gud, i bin wan had eksperiens. Mama blong yu i stap long wan ples we bae hem i nomo save filim soa o safa. I had blong nomo luk hem, be yu neva stap yuwan. Bae hem i oltaem lavem yu, mo Papa blong yumi long Heven bae i oltaem stap ia blong leftemap yu taem yu stap daon. Bae i nogat man i lego yu stap yuwan. Jisas Kraes i bin safa from ol harem nogud blong wol ia; Hem i save olsem wanem yu filim mo wanem yu stap go tru long hem. Mekem olsem we mi bin mekem long taem blong trael blong mi: go long Hem mo bae Hem i mekem ol hevi samting long yu i nomo hevi.
Silo W., 18 yia, Jihuahua, Meksiko
Famle blong yu bae i kam tugeta bakegen
Mama blong mi i bin ded taem mi bin gat 12 yia nomo. Long taem ia, mi no bin wan memba blong Jos. Taem hem i bin sik, mi bin prea plante blong mama blong mi bae i oraet. Fet blong mi i bigwan, mo mi bin trastem God wetem hop ia se bae hem i kam oraet bakegen. Sori nao from hem i no kam oraet. Mi bin kwestinim from wanem hem i yang nomo mo i mas ded mo lego mi long taem ia we mi yangfala yet. Mi bin kros mo long en mi gat tu tingting se God i laef o no. Naoia we mi wan memba blong Jos, mi andastanem plan blong fasin blong sevem man. Mi save se hem i stap wet long mi mo we famle blong mifala bae i kam tugeta bakegen.
Inaet L., 19 yia, Minas Gerais, Brasil
Ol Trael I Tijim Yumi
Mama blong mi i ded tri yia i pas finis. Rilesensip blong yu wetem Papa long Heven mo Sevya bae i gro sapos yu luk long olgeta long taem blong nid. Bae yu faenem se trael ia, nomata i strong olsem wanem, i save kam wan blesing tu. Prea long Papa blong yu long Heven blong pis mo tras se evri samting bae i oraet. Trastem plan blong Lod we i mekem blong yu. Akseptem se Papa long Heven i save wea yumi stap go mo wanem yumi nidim blong kasem longwe. Lod i lavem yu mo wantem yu blong stap glad. Ol trael blong yumi oli kam blong tijim yumi mo mekem yumi kam moa strong.
Megan B., 18 yia, Ontario, Kanada
Bae Yumi Luk Hem Bakegen
Mama blong mama blong mi i bin ded taem mi bin gat 17 yia. Famle i bin livim kakae mo prea from hem blong sam wik bifo hem i ded. Hem i bin kasem wan prishud blesing. Samting we i bin givim pis long mama blong mi hem i save ia se hem i save luk mama blong hem bakegen long nekis laef. Gol blong mama blong mi, hem i blong laef long wan laef we i hem i save stap klin inaf from blesing ia. Mi sore se bae mi neva save mekem blong luk hem long laef ia, be mi luk fored from taem we bae mifala i mit bakegen long en.
Kari R., 15 yia, Yuta, YSA