Rod blong Mi blong Lukaotem Trutok
Woman we i raetem hemia i stap long Kalifonia, YSA.
Mi bin stap kasem tijing se i neva gat wan samting olsem wan God, be mi disaed blong lukaotem blong miwan.
Pikja i kam long Dan Ber
Mi bin gro i kam antap long wan kantri blong Esia we i gat fulap kompetisen mo no biliv long Kraes, mi bin stap wantem tumas longtaem blong kam wan man wetem sakses, be mi no bin gat nating ol prinsipol we i no save finis o ol trutok blong givhan long mi. Long kantri blong mi, “blong kam sakses fulwan” i minim blong kam rij mo gat paoa.
Papa mo mama blong mi i bin tijim mi se i neva gat wan samting olsem wan God. Long tufala, relijin o God i bin ol krangke samting nomo mo hem i blong ol pipol we i no strong. Blong longtaem mi bin wan man we i no biliv se i gat wan God. Oli bin tijim mi se mi no save trastem wan man, be mi nomo. Mekem se long taem we mi bin yang, mi bin yusum wanem we mi wantem tumas blong mekem olsem strong tingting blong stadi mo wok had plante.
Papa mo mama blong mi, oli bin gat bigfala plan blong mi. Tufala i bin wantem mi blong gohed blong gat ol hae mak long skul evri taem. I bin mekem mi harem nogud blong luk fes blong tufala i nogud o blong harem tufala i raorao wetem tufala bakegen taem mak blong mi long skul i nogud. Wetem ol nomol homwok, bae mi mas mekem tu sam moa homwok long wiken blong mekem se mi save gat wan A mak.
Be afta komplitim ol gol we mi bin putum, mi bin filim yet se i bin gat wan samting moa i stap blong laef blong mi. Dip insaed long hat blong mi, mi bin save tru se i gat moa long hemia.
Wan dei mi disaed se mi mas go blong faenemaot blong miwan sapos i bin gat wan God. Sapos i tru se hem i laef, mi wantem save wanem nao Hem i wantem long mi o sapos relijin i wan krangke samting nomo we ol man long wol oli mekemap. Mi no bin fraet blong kasem wan long tufala ansa ia. Mi jes wantem trutok nomo.
Samples long taem ia, mi bin kam gud fren wetem wan long ol tim memba blong mifala long basketbol we nem blong hem Teila. Wan moning mi askem hem blong tekem mi mi go long skul. Hem i talem yes, be mi mas girap wan aoa eli blong go long seminari wetem hem. Mi talem yes olsem nomo, mo no save wanem ia. Mi bin laekem seminari, hemia from wanem we mi bin filim bitim wanem we mi bin lanem.
Samtaem afta long taem ia, Teila i bin askem mi blong go long jos wetem hem. Fastaem, mi bin ting se jos i no bin intresting mo i defren, be sloslo mi bin stat blong gat wom filing ia mo filing blong pis we mi bin filim long seves ia.
Be, yet mi no bin ting se gudfala filing ia i wan samting we i kam long God. ?Olsem wanem bae mi save se i no bin kam long miwan? ?Olsem wanem bae mi save se mi no bin mekem miwan mi filim olsem?
Afta long plante tingting insaed mi, mi bin go luk mama blong Teila blong kasem ol ansa. Hem i talem long mi se mi save kasem ol ansa taem mi ridim ol skripja mo stap prea abaot ol ansa we mi stap lukaotem. Mi bin prea mo no kasem wan ansa nating mo traehad blong obei long ol rul mo ol komanmen we mi bin stap lanem. Plante taem mi stap filim nogud. Mi stap ting se bae i gat wan gudfala wei we God bae i kamaot long hem o tru sam wei blong merikel blong pruvum se God i laef. Wanem we i impoten, mi wantem gat wan testemoni we i strong wantaem. Be wanem we i tru, moa mi prea, mi filim ol samting i kam moa klia long laef blong mi. Taem mi folem moa ol komanmen, mi kam moa hapi. Moa mi ridim ol skripja, mi kasem moa revelesen. Slo slo, testemoni blong mi i stap gro, olsem san we i stap girap long moning.
I bin tekem mi tu yia blong disaed blong kasem baptaes mo kam wan memba blong Jos blong Jisas Kraes blong Ol Lata dei Sent. Nomata se mi bin laef folem plante gud mo klin standet mo prinsipol, naoia mi save talem se mi bin faenem stret trutok we i no save finis: God i laef. Jisas Hem i Kraes, Sevya mo Ridima blong yumi. Ol heven oli open. Wan profet blong God i stap laef long wol tedei. Atonmen blong Jisas Kraes i tru. God i fogivim tru evri man we oli mekem sin mo oli sakem sin. Ating mi no smat gud o gat wan talen olsem ol nara wan, be save we mi gat i nogat praes long hem.