Tikit blong Trak i Pak
Woman we i raetem hemia i stap long Kalifonia YSA
Fatima
Pikja i kam long Braean Bij
Mi go luk muvi wetem sam fren blong mi blong jos. Taem mifala i go insaed long bigfala bilding ia, oli bin givim wan tikit blong trak i save pak. Afta we muvi i finis, mifala i luksave se mifala i bin lusum tikit ia blong trak i pak. Long fastaem, mifala i ting se bae mifala i save pem tikit ia nomo, be i nogat wan long mifala i gat 1,800 vatu blong faen.
Risal blong no pem ples blong trak i pak, i mekem se trak i mas stap long bigfala bilding blong oli pulum yusum wan nara trak, mo hemia bae i moa sas. Wari i kavremap ol fren blong mi, speseli hemia we i draevem trak from hem i trak blong papa blong hem. Mi kamaot long olgeta mo mekem wan prea. Mi bin askem Papa long Heven wetem evri fet mo hat blong mi we i stap daon, blong soem wan wei long mifala blong stretem problem ia mo gobak hom sef long ol hom blong mifala. Bae mi neva fogetem wanem i bin hapen long smol taem ia afta we mi finisim prea blong mi.
Taem mi stap wokbaot i gobak long trak, wan man biaen mi i stat blong singaotem nem blong mi. Hem i Fransisko, wan fren long hae skul. Hem i askem wanem mi stap mekem, o mi bin talem long hem wanem i bin hapen. Kwiktaem nomo, hem i karem paos blong hem mo givim mi inaf mane blong pem tikit ia we i lus. Fasin ia blong stap kaen i bin wan stret mo kwik ansa long prea blong mi i go long Papa long Heven.
Maet bae Fransisko i neva save bigfala help we hem i bin givim, be mi save se bae mi no stop blong talem tangkyu long hem truaot long laef blong mi.
Samtaem ol wei we Papa long Heven i ansarem ol prea blong yumi i mekem yumi sapraes, be oli no hapen olsem nomo, from hemia i no tru. Papa blong yumi long Heven mo Jisas Kraes oli save gud yumi evriwan mo muvum ol hadtaem long laef blong yumi.
Mi save se taem yumi laef long stret mo gud fasin, yumi stap glad long plante blesing we Papa long Heven nomo i save givim long yumi, wetem promes blong Hem long yumi se “sapos [yumi] mekem ol samting ia, bae [yumi] save sef long las dei” (Alma 37:37).