Sista Spafod I Stap Toktok long Mi

Sandi Hauson, Ohaeo, YSA

Mi bin stap ple wan gem blong restrong long intanet long wan naet taem hasban blong mi i wokbaot pas mo talem aot se hem i stap go silip nao.

“Bae mi kam insaed i no long taem,” mi talem long hem.

“Bae mi bilivim taem bae mi luk,” hem i talem.

Mi stap ple wan gem we mi mekem ol wok blong kukum ol tru kaekae insaed long wan tru restoron blong ol tru kastoma. Mi lukluk long skrin blong komputa mo talem, “Bae, kaekae blong mi i rere afta long 15 minit.”

Blong pasem taem ia, taem mi stap wet, mi pikimap buk ia Ol Pikinini Gel blong mi long Kingdom blong mi: Histori mo Wok blong Rilif Sosaeti, we i bin stap ledaon long tebol stat long taem we mi bin kasem long Rilif Sosaeti. Mi stat blong ridim introdaksen. Long namba tri pej mi faenem olgeta samting we i kam long Bel S. Spafod, namba naen Rilif Sosaeti jenerol presiden.

“Ol nomol woman tedei, mi biliv,” hem i wraetem, “bae i save mekem gud samting spos hem i lukluk bageken long ol interes blong hem, skelem ol aktiviti we hem i stap mekem, mo afta tekem ol step blong mekem laef blong hem i isi, blong putum ol samting we i impoten fas wan, mo lukluk plante wea ples nao ol gud saed blong hem bae i bigfala mo bae save stap kasem en, mo tekem aot hem wan long ol aktiviti we oli gat smol gud samting nomo long hem” (2011, xiii).

I neva gat wan samting we mi ridim mo i tajem mi bigwan olsem hemia mo ol skripja. Woman ia we i ded bitim 30 yia finis i stap toktok long mi. Ol toktok blong hem oli moa impoten tedei bitim long taem we hem i bin talem olgeta.

Mi save kwik taem nomo se bae mi neva ple gem long intenet bageken. Mi ofem kompiuta, mo go long bed, afta taelm long hasban blong mi long disisen we mi tekem. Long nekis dei, mi nomo onem kompiuta. Be, mi wokem aot hamas aoa mi bin stap westem long ol gem ia long evridei.

Mi maltiplae wetem tri aoa long wan dei blong 365 (dei long wan yia) mo difaedem wetem 24 (aoa long wan dei). Mi bin sek blong lanem se mi bin stap westem 45.62 dei long wan yia, Olgeta impoten aoa ia mo dei ia oli go fogud. Mi shud spendem olgeta taem ia blong ridim ol skrija, spendem taem wetem hasban blong mi mo ol pikinini, givim seves long ol nara man, o wok long ol koling blong mi.

Ol Jeneraol Adoroti plante taem ol tokbaot topik ia long ol taem blong jenerol konferens. Be ol toktok ia i neva bin tajem mi, mo mi no tingt se ol toktok ia i blong mi.

Mi mi talem tangkiu se Tabu Spirit i helpem mi blong luk save se ol Jenerol Adoroti—mo Bel S. Spafod—oli bin stap toktok long mi.