Toʻo Kongokonga Lalahi mei he Konifelenisi Lahi Fakavaeuataʻu Hono 185 ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní

Naʻe pehē ʻe Palesiteni Tōmasi S. Monisoni ʻi he fakataha konifelenisi lahi ʻo e pongipongi Sāpaté, “Ko ha foha pe ʻofefine koe ʻo ʻetau Tamai Hēvaní. Kuó ke haʻu mei Hono ʻaó ke nofo ʻi he māmaní ni ʻi ha vahaʻa taimi, ke fakafōtunga atu e ʻofa mo e akonaki ʻa e Fakamoʻuí pea tuku lototoʻa hoʻo māmá ke ulo ke mamata ki ai ʻa e taha kotoa. Ko e taimi ʻe ngata ai ʻa e faʻahitaʻu ko iá ʻi māmaní, kapau ne ke fai hoʻo tafaʻakí, te ke maʻu ʻa e tāpuaki nāunauʻia ʻo e foki ke nofo mo Ia ʻo taʻengatá.

Naʻe fakahaaʻi ʻi he konifelenisi lahí ni ʻa e mālōlō kimuí ni mai ʻa Palesiteni Poiti K. Peeka mo ʻEletā L. Tomu Peuli, mo Lisiate G. Sikoti ʻo e Kōlomu ʻo e Kau ʻAposetolo ʻe Toko Hongofulu Mā Uá. Hikinimaʻi ʻe he kāingalotu ʻo e Siasí e kau mēmipa foʻou ʻe toko tolu ʻo e kōlomú: ʻEletā Ronald A. Rasband, Gary E. Stevenson, mo Dale G. Renlund.

Ngaahi meʻa mahuʻinga kehe:

• Naʻe fakamamafaʻi ʻe he ngaahi lea ʻa ʻEletā M. Russell Ballard, David A. Bednar, pea mo D. Todd Christofferson ʻo e Kōlomu ʻo e Kau ʻAposetolo ʻe Toko Hongofulu Mā Uá e ʻuhinga ʻoku fokotuʻu ai ʻe he ʻEikí Hono Siasí, mo e kau palōfitá mo e kau ʻaposetoló ko hono fakavaʻé, ke fai ʻEne ngaué pea fakaivia kitautolu ke tau toe foki hake kiate Ia (vakai, peesi 24, 128, mo e 108).

• Fakamatalaʻi ʻe he ngaahi lea ʻa Palesiteni Russell M. Nelson mo ʻEletā Jeffrey R. Holland ʻo e Kōlomu ʻo e Kau ʻAposetolo ʻe Toko Hongofulu Mā Uá ʻa e ngaahi fatongia mahuʻinga ʻo e houʻeiki fafiné. Naʻe pehē ʻa Palesiteni Nalesoni: “ʻOku ʻikai pea he ʻikai kakato e puleʻanga ʻo e ʻOtuá ka ʻikai kau ai e kau fefine ʻoku nau fai mo tauhi e ngaahi fuakava toputapú, mo e kau fafine ʻoku nau lava ʻo lea ʻi he mālohi mo e mafai ʻo e ʻOtuá!” (peesi 96).

• Naʻe toe fakapapauʻi mai ʻe ʻEletā Dallin H. Oaks ʻo e Kōlomu ʻo e Kau ʻAposetolo ʻe Toko Hongofulu Mā Uá naʻe “aʻusia mo foua ʻe hotau Fakamoʻuí ʻa hono kakato ʻo e ngaahi faingataʻa fakamatelié kotoa pē. … Pea tuʻunga heni, hono fakaivia Ia ʻe Heʻene Fakaleleí ke ne tokoniʻi kitautolu—ke foaki mai ʻa e ivi ke tau lava ʻo fuesia iá” (peesi 61–62).