ʻOku Pehē ʻe he Fānaú, “Ko Hono Toʻukupú Kitautolu”
Naʻe tali loto vēkeveke ʻe he fānau ʻi he funga māmaní e pole ke ngāue tokoni ne tuku atu ʻe he ngaahi makasini ʻa e Siasí. Ne fakaafeʻi ʻe he ngaahi makasiní ʻa e fānaú ke kumi ha ngaahi founga ke tokoni ai, pea tā leva honau laʻinimá ʻi ha laʻi pepa, ʻo hiki e ngāue tokoni ne nau faí ʻi he laʻipepa kuo tā ai honau laʻinimá, pea ʻave ki he Liahoná.
Naʻe maʻu ʻe he makasiní ha ngaahi laʻinima ne lahi hake ʻi he 30,000 mei he fānau ne nau ō atu ʻo vahevahe ʻa e ʻofa ʻa e Fakamoʻuí, ʻo faitapuekina e ngaahi fāmilí mo e kaungāʻapí ʻi he māmaní.
Naʻe hoko mai ʻa e ueʻi fakalaumālie ki he ngāué ni mei ha lea ʻa Palesiteni Tieta F. ʻUkitofa, Tokoni Ua ʻi he Kau Palesitenisī ʻUluakí, ʻi he konifelenisi lahi ʻo ʻEpeleli 2010, ʻoku ui ko e “Ko Hoku Ongo Nimá Kimoutolu.” Naʻe fai ʻe Palesiteni ʻUkitofa e talanoa kau ki ha tā tongitongi ʻo Sīsū Kalaisi ne maumau lolotonga e Tau Lahi hono II ʻa Māmaní. Naʻe tānaki atu ʻe he kakai ʻo e koló e ngaahi lea ko ʻení ki he fakavaʻé ʻi he ʻikai lava ke nau lava ʻo fetongi e nima ʻo e tā tongitongí. “Ko Hoku Ongo Nimá Kimoutolu.”
Kuo makehe fau ʻa e ngāue tokoni ʻa e fānaú ʻo hangē pe ko e ngaahi lauʻinima kuo nau fakahū maí. Hangē ko ʻení:
Naʻe fakahū mai ʻ e Natalie S., taʻu 5, mei Hong Kongo ha lauʻinima ʻe ua. Ne pehē ʻe ha taha, “Naʻá ku tokoni ki heʻeku faʻeé ʻi falé,” pea ko e tahá, “Naʻa ku tokoni ke teke ha taha ʻi ha sea saliote teketeké.”
Ne fakamatala ʻa Erik S., taʻu 11, mei Lūsia ʻo pehē, “ʻOku faʻa momoko fau e faʻahitaʻu momokó.” Naʻe hiki mai ha fāmili ki hono koló, pea naʻe ʻikai ʻi ai haʻanau vala māfana. Naʻe pehē ʻe ʻEliki “Ne u lava ʻo foaki hoku koté maʻa ʻAfa, pea naʻá ne hoko ko hoku kaungāmeʻa.”
Ne tohiʻi ʻe Kelela P. taʻu hongofulu mei Venesuelá ʻi hono laʻinimá ʻo pehē: “Naʻá ku ʻi he kalasi veimau ʻi ʻapiakó mo hoku kaungāmeʻá. Naʻá ku kumi ha taha ke ma vaʻinga pea naʻá ku sio atu ki ha tamasiʻi foʻou naʻe ngali loto mamahi. Naʻá ku loto ke tokoni, ka naʻe ʻikai teu ʻilo pe ʻe founga fēfē. Pea ne talamai ʻe ha leʻo ʻoku fie maʻu pē ke u hoko ko hono kaungāmeʻa. Ne u ʻalu ʻo talanoa ki ai. ʻOkú ma lolotonga hoko ko ha kaungāmeʻa mamae.”
Naʻe fakaʻaliʻali ʻa e ngaahi lauʻinimá ʻi he hetikuota ʻo e Siasí ʻi Sōleki Siti, ʻIutā, USA, ʻi ha uike ʻe ua ʻi Sepitema mo ʻOkatopa.