Fakahoko ha Tokoni ki he kau Kumi Hūfangá

ʻOku hokohoko atu hono tokoniʻi ʻe he ngaahi Kautaha Tokoni ʻOfa, mo e tokoni fakaetangata ʻa e Siasí, ʻa e ngaahi feituʻu ne hoko ai ha ngaahi faingataʻa ʻo tokolahi ai ha niʻihi ne nau ʻi ha ngaahi tūkunga fie maʻu vivili. Ko ha ngaahi sipinga ʻeni ʻe tolu:

Kuo tūkuhausia ha kakai e lauimiliona talu mei he 2014 ʻi he fepaki ʻi ʻIukuleiní. Ko e pēseti ʻe onongofulu ʻo e kau tūkuhausiá ko ha kau toulekeleka. Naʻe tokoni ʻa e Ngaahi Kautaha Tokoni ʻOfa ʻa e SIASÍ ki he Polokalama Fakalakalaka ʻa e Ngaahi Puleʻanga Fakatahatahá ke kau ʻi ha ngāue ne fakafekauʻaki mo e ngaahi kautaha ʻoku ʻikai fakapuleʻangá ʻa ia ʻoku nau tokangaʻi e kau tūkuhausia masivesivá mo e toulekeleká. Naʻe foaki atu ʻe he Kautaha Tokoni ʻOfa ʻa e SIASÍ ha ngaahi nāunau haisini, ngaahi nāunau ki he maʻá, mo ha meakai feʻunga mo ha mahina ʻe 3 ki ha ngaahi fale ʻe 37 ʻa ia te nau tokoniʻi ha kakai ʻe toko 13,000.
Talu mei Sānuali, kuo laka hake he kakai kumi hūfanga ʻe toko 350,000 kuo nau hola mei he tau fakalotofonua ʻi Sīliá ʻo kumi hūfanga ʻi ʻIulope, ʻoku ʻamanaki ʻe liunga ua ʻa e tokolahi ko iá ʻi he fakaʻosinga ʻo e taʻú. ʻOku ngāue fakataha ʻa e Kautaha Tokoni ʻOfa ʻa e Siasí mo ha ngaahi kautaha fakavahaʻa-puleʻanga ʻoku ʻikai ʻa e puleʻangá, ngaahi kolo lalahi fakalotofonua, mo e kautaha fakafonua ʻa e puleʻangá ke feau e ngaahi fie maʻu ʻa e kau kumi hūfangá pea ʻoku nau ʻoatu ha ngaahi maʻuʻanga tokoni ki he kakai Siasi fakalotofonuá ke fakaʻaongaʻi ʻi heʻenau ngaahi feinga tokoní.
Ke ʻoatu ha nofoʻanga lelei ange ki he ngaahi ʻapitanga kumi hūfanga ʻi he funga ʻo e māmaní, ʻoku kau atu ʻa e Ngaahi Kautaha Tokoni ʻOfa ʻa e Siasí ki ha ngāue ʻa e Komisiona Lahi ʻo e Ngaahi Puleʻanga Fakatahatahá maʻá e kau kumi Hūfangá. Kuo faʻufaʻu ʻe ha fale nāunau fakavahaʻapuleʻanga ha fale ʻoku lelei ange ʻi hono fakafehoanaki ki he ngaahi tēnití. ʻOku kau ʻi he fale ko ʻení ha ngaahi matapā, matapā sioʻata koeʻuhí ke malu ange pea mo ha ʻato ʻoku fefeka angé ke maluʻi ʻa e kau nofó mei he ngaahi ʻelemēnití. ʻOku lolotonga fokotuutuʻu ha ngaahi fale ʻe 333 ʻa ia kuo foaki atu ʻe he Ngaahi Kautaha Tokoni ʻOfa ʻa e Siasí ki ha ʻapitanga kumi hūfanga ʻi Ketisitani, ʻIulaki.