ʻEletā L. Whitney Clayton

Palesiteni Pule ʻo e Kau Fitungofulú

Naʻe ako ʻe ʻEletā L. Uitinī Keleitoni ʻi heʻene kei siʻí, ke saiʻia ʻi he ngāué mo ʻofa ʻi hono fāmilí. ʻE mavahe pongipongia ʻene tangataʻeikí, naʻe hoko ko ha toketā, ke fakahoko e ngaahi fatongia fakafaitoʻó ʻi he ʻaho Tokonaki kotoa pē. Kimuʻa peá ne mavahé, te ne hiki ʻi he palakipoé ha lisi ʻo e ngaahi ngāue ke fai ʻi he ʻaho ko iá. ʻI heʻene foki maí, te ne ngāue fakataha mo hono ngaahi fohá. Naʻe ako ʻe ʻEletā Keleitoni mei heʻene tamaí, ha ʻulungaanga fakangāue kuó ne tāpuekina ʻene moʻuí.

Naʻe ʻilo foki ʻe he fāmili ʻo ʻEletā Keleitoní ko e taimi maʻu meʻatokoni efiafí ko ha taimi ia ʻa e fāmilí. “Naʻa mau talanoa ki he ngaahi meʻa fakapolitikalé, meʻa naʻe hoko ʻi he akó, kaungāʻapí, ongoongoleleí, mo e Siasí. … Ko ha konga fakaʻofoʻofa ʻeni ʻi he kei tupu haké.” Naʻe hoko ʻa e ngaahi fealeaʻaki ʻi he taimi maʻu meʻatokoní ko ha founga kuó ne muimui ai mo hono uaifí mo ʻena fānaú.

Naʻe ui ʻa ʻEletā Keleitoni ko e Palesiteni Pule ʻo e Kau Fitungofulú ʻi he ʻaho 6 ʻo ʻOkatopa 2015. ʻOkú ne fetongi ʻa ʻEletā Lēnati A. Lasipeni, naʻe ui ki he Kōlomu ʻo e Kau ʻAposetolo ʻe Toko Hongofulu Mā Uá.

Naʻe hikinimaʻi ʻa ʻEletā Keleitoni ko ha Fitungofulu Taki Māʻolunga ʻi he ʻaho 31 ʻo Māʻasi 2001. Kuó ne hoko ko ha mēmipa ʻo e Kau Palesitenisī ʻo e Kau Fitungofulú talu mei he 2008 mo maʻu ha fatongia fakapule ki ha ngaahi ʻēlia ʻi ʻIutā. Naʻá ne tokoni kia ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi hono puleʻi e ʻēlia Fakatonga Hahake mo Fakahihifo ʻo ʻAfiliká. ʻOkú ne hoko foki ko ha mēmipa ʻo e Kōmiti Fetuʻutaki mo e Kakaí. Naʻá ne hoko ko ha tokoni ʻi he Kau Palesitenisī Fakaʻēlia ʻi Saute ʻAmeliká ʻi he 2002–2003, pea palesiteni lolotonga e 2003–2006.

Naʻe fāʻeleʻi ʻi Sōleki Siti, ʻIutā, USA, ʻi he 1950, pea naʻe mali mo Kefi ʻEni Kipi ʻi he 1973 ʻi he Temipale Sōlekí. Ko ha mātuʻa kinaua ki ha fānau ʻe toko 7 mo ha kui ki ha makapuna ʻe toko 20.

Naʻe maʻu ʻe ʻEletā Keleitoni ha mataʻitohi BA ʻi he meʻa fakapaʻangá ʻi he ʻUnivēsiti ʻo ʻIutaá mo ha mataʻitohi he laó ʻi he ʻUnivēsiti ʻo e Pasifikí. Naʻá ne hoko ko ha loea ʻi Kalefōniá, USA, mei he 1981 ki he 2001.

Kuó ne hoko ko ha Fitungofulu Fakaʻēlia, fakafofonga fakavahelahi, tokoni palesiteni fakamisiona, aleaʻanga māʻolunga, pīsope, palesiteni misiona faka-siteiki, mo e faiako ʻi he Tokāteline ʻo e Ongoongoleleí. Naʻá ne hoko ko ha faifekau taimi kakato ʻi Pelū mei he 1970 ki he 1971.