Pīsope Gérald Caussé

Pīsope Pulé

Naʻe kei kamata e ngāue ʻa Sēlati Kōseí ʻi he kautaha tufaki meʻakai ʻi Falanisē ʻi hono taʻu 33, ʻi he taimi ne ui ai ia ʻe he palesiteni ʻo e kautahá ke na talanoa. Naʻá ne fakatokangaʻi e ngaahi meʻa fakalaumālie ne tui ki ai ʻa Sēlati mo ʻene malava ke fakakaukau lelei mo fakatahaʻi e kau ngāué—ko ha ngaahi ʻulungaanga naʻe tupulaki ʻi he ʻekitivitī, ngāue tokoni, mo e tuʻunga fakatakimuʻa ʻi he Siasí. Naʻe pehē ʻe he palesitení ko ha tangata falalaʻanga ʻa Sēlati.

Naʻe ʻohovale ʻa Sēlati ʻi hono ʻoange e fatongia ke ne puleʻi e kau ngāue ʻe 1,800. ʻI hono ui ia ʻi ha taʻu ʻe hongofulu mei ai ke hoko ko ha Fitungofulu Taki Māʻolunga ʻi ʻEpeleli 2008, naʻá ne puleʻi ha ngaahi kautaha tufaki meʻakai lahi.

ʻE tokoni e ngaahi taukei fakapisinisi mo fakapule ʻa Pīsope Kōseí, fakataha mo ʻene ngāue fakalotú mo e aʻusia fakatakimuʻá, ʻi heʻene hoko ko e Pīsope Pule foʻou ʻa e Siasí. Naʻe maʻu ʻe Pīsope Kōsei, ʻa ia naʻe hoko ko e Tokoni ʻUluaki ʻi he Kau Pīsopeliki Pulé talu mei Māʻasi 2012, ʻa hono uiuiʻi foʻoú hili pē ha ngaahi ʻaho siʻi mei he konifelenisi lahi ʻo ʻOkatopá. ʻOkú ne fetongi ʻa ʻEletā Keuli E. Sitīvenisoni, ʻa ia naʻe hikinimaʻi ki he Kōlomu ʻo e Kau ʻAposetolo ʻe Toko Hongofulu Mā Uá ʻi he ʻaho 3 ʻo ʻOkatopa 2015.

Naʻe fāʻeleʻi ʻa Pīsope Sēlati Seani Kōsei, ko e Pīsope Pule hono 15 ʻo e Siasí, ʻi Pōteau Falanisē, ʻi he 1963. Naʻá ne mali mo Valeli Pāpini ʻi he 1986, ʻi he Temipale Peeni Suisalaní. ʻOku ʻi ai haʻana fānau ʻe toko nima mo e makapuna ʻe toko nima.

Makehe mei heʻene aʻusia ʻi he Kau Pīsopeliki Pulé mo ʻene hoko ko ha mēmipa ʻo e Kau Fitungofulú, kuó ne hoko ko ha tokoni ʻi he Kau Palesitenisī Fakaʻēlia ʻo ʻIulopé mo ha Fitungofulu Fakaʻēlia, palesiteni fakasiteiki, tokoni palesiteni fakasiteiki, tokoni pīsope, kulupulita ʻo e taulaʻeiki lahí, mo e palesiteni ʻo e kōlomu ʻo e kaumātuʻá.

ʻI heʻene kei talavoú, naʻe maʻu ʻe Pīsope Kōsei ʻa e fiefiá mo e tuí ʻi heʻene ngāue tokoni ʻi he Siasí. ʻI hono taʻu 12, naʻá ne hoko ko ha tokotaha tā piano ʻa e Palaimelí pea mo e palesiteni ʻo e Lautohi Faka-Sāpaté ʻi hono taʻu 16. Naʻá ne femoʻuekina foki ʻi he ngaahi fatongia ʻi he Lakanga Taulaʻeiki Faka-ʻĒloné.

ʻOkú ne pehē, “Naʻe tokoni ʻa e ngāue ʻi he Siasí,” kau ai mo ʻene ngāue fakataha mo ʻene tangataʻeikí ʻi heʻene hoko ko ha pīsope mo ha palesiteni faka-koló, “ke maʻu ʻeku fakamoʻoní.”

Naʻe maʻu ʻe Pīsope Kōsei ha mataʻitohi MA ʻi he pisinisí mei he ʻApiako Pisinisi ESSEC ʻi Falanisē ʻi he 1987. Kimuʻa pea toki kamata ʻene ngāue maʻuʻanga moʻuí, naʻá ne ngāue ʻi he Laulāpuna Falaniseé, ʻa ia ne vahe ai ia ki ha kulupu ʻi he NATO.